سارقان اۋدانىنىڭ لەپسى اۋىلىنداعى اۋرۋحانا جاڭا جىلدان باستاپ جۇمىس جۇكتەمەسىن ازايتادى. ەندى اۋىل تۇرعىندارى ءۇشىن دارىگەرلىك امبۋلاتوريا عانا قىزمەت كورسەتپەكشى.
ەلىمىزدە تۇرعىن سانى از اۋىلدىق وڭىرلەردەگى مەديتسينا نىساندارىن وڭتايلاندىرۋ باستالدى. دەنساۋلىق ساقتاۋ ءمينيسترىنىڭ 236-بۇيرىعى بويىنشا, ادام سانى 5000 تۇرعىننان كەم اۋىلدىڭ بارلىعىندا قىسقارتۋ جۇرگىزىلۋدە. ال لەپسى اۋىلىنىڭ حالقى قازىر بۇل مەجەگە دە جەتپەيدى ەكەن.
-تۇرعىندارعا بۇل وڭتايلاندىرۋدىڭ جايى تۇسىنىكسىز بولىپ وتىر. اۋىلداعى اۋرۋحانا قىسقارسا, ناۋقاستارعا العاشقى جەدەل كومەكتەن باسقا قىزمەت الۋ ءۇشىن 220 شاقىرىم جەردەگى اۋدان ورتالىعىنا نەمەسە 180 شاقىرىم قاشىقتىقتاعى تالدىقورعان قالاسىنا بارۋىنا تۋرا كەلەدى. اسىرەسە, اۋىرعان بالا مەن جۇكتى ايەلدەرگە قيىن تيەتىنى وكىنىشتى. بىراق, امال نەشىك, اۋىلدا ادام سانى از. ءبارى قالاعا ناپاقا ىزدەپ كوشىپ جاتىر. مۇندا تەمىرجول مەن بالقاش كولىنەن بالىق اۋلاۋدان باسقا كۇنكورىس كوزى جوق. لەپسىدەگى حالىقتى ۇستاپ تۇرعان دەپو جابىلعالى حالىق بوسىپ كەتتى. اۋىلداعى پوليتسيا ءبولىمى دە قىسقارىپ, ۋچاسكەلىك پۋنكتكە اينالدى. بانكتەر بانكوماتىن جاپتى. زەينەتكەرلەر اي سايىنعى زەينەتاقىسىن الۋ ءۇشىن قالاعا تاكسي ارقىلى كارتاسىن بەرىپ جىبەرىپ جاتىر, دەيدى اۋىل بەلسەندىسى رۋسلان ساتتىبەكوۆ.
ايتپاقشى, وسى سارقان اۋدانىندا جىل سوڭىنا دەيىن جاڭا اۋرۋحانا پايدالانۋعا بەرىلمەكشى. قۇنى 2 ملرد 400 مىڭ تەڭگە تۇراتىن جوبا بۇعان دەيىن «ساقالدى قۇرىلىستىڭ» قاتارىندا تۇرعان 2500 شارشى مەتر عيماراتقا جان ءبىتىردى. ەندى مۇندا كۇنىنە 100 ادامعا قىزمەت كورسەتەتىن, 105 ورىندىق اۋدانارالىق اۋرۋحانا جۇمىسىن باستايدى.