قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەباەۆ تاۋەلسىزدىك كۇنىنىڭ قارساڭىندا «Egemen Qazaqstan» گازەتىنىڭ رەداكتسياسىندا قوناقتا بولىپ, باسىلىم ۇجىمىن مەرەيتويمەن قۇتتىقتادى.
جانسەيىت تۇيمەباەۆ گازەت ۇجىمىن تاۋەلسىزدىك كۇنىمەن تۇسپاس-تۇس كەلگەن عاسىرلىق مەرەيتويىمەن قۇتتىقتاپ, بىرقاتار ءجۋرناليستى ماراپاتتادى.
«Egemen Qazaqstan» گازەتىنىڭ مەرەيتويى جىل باسىنان بەرى تويلانىپ كەلەدى. بۇگىن قاراشاڭىراققا كەلىپ, گازەت ۇجىمىن ارنايى قۇتتىقتاۋدى ءجون كوردىك. «ەگەمەن» رەسپۋبليكامىزدا شىعاتىن بارشا باسىلىمنىڭ باستاۋشىسى, ۇزاق جىلداردان بەرى قازاق حالقىنىڭ مۇددەسىن قورعاپ كەلە جاتقان بىردەن-ءبىر گازەت. وسى جولدا قىزمەت ەتىپ, جازىپ جۇرگەن, تەحنيكالىق جاعىنان قامتاماسىز ەتەتىن وزدەرىڭىز سەكىلدى ۇجىمنىڭ ەڭبەگى زور. سىزدەردىڭ ەرەن ەڭبەكتەرىڭىز ءۇشىن العىس بىلدىرەمىن, باستىسى زور دەنساۋلىق, وتباسىلارىڭىزعا اماندىق جانە شىعارماشىلىق تابىس تىلەيمىن», - دەدى ج.تۇيمەباەۆ.
سونداي-اق بىرقاتار جۋرناليست قازاقستان حالقى اسسامبلەياسىنىڭ ماراپاتىنا يە بولدى. ۇلتارالىق كەلىسىم مەن جالپىۇلتتىق بىرلىكتى نىعايتۋعا ۇلەس قوسقانى ءۇشىن «Egemen Qazaqstan» گازەتىنىڭ شولۋشىسى انار تولەۋحان مەن جۋرناليست مايگۇل سۇلتان «مەيىرىم توسبەلگىسىمەن» ماراپاتتالدى. ەكونوميكا ءبولىمىنىڭ مەڭگەرۋشىسى ارنۇر اسقار, گازەت شولۋشىسى بەكەن قايرات ۇلى, قۇرمەتتى ارداگەرلەر بەرىك سادىر مەن جىلقىباي جاعىپار ۇلى, جۋرناليست ورىنبەك پازىلوۆ, ەركەجان ايتقازى جانە سۆەتلانا عالىمجانقىزىنا العىس حاتتار تابىستالدى.
جيىن سوڭىندا «Egemen Qazaqstan» گازەتىنىڭ باسقارما توراعاسى دارحان قىدىرالى قوناقتارعا العىس ءبىلدىرىپ, جانسەيىت تۇيمەباەۆقا مەرەيتويعا ارنايى دايىندالعان 100 جىلدىق تاريحتى قامتيتىن گازەت تىگىندىسىنىڭ ەلەكتروندى نۇسقاسىن, عاسىرلىق فوتو-شەجىرە جيناقتالعان البوم مەن «Egemen Qazaqstan» گازەتىنىڭ ء«جۇز جىلدىق جىلناماسىنىڭ» بەس تومىن تابىس ەتتى.