قازاقستان رەسپۋبليكاسى پارلامەنتى سەناتىنىڭ توراعاسى داريعا نازارباەۆا پارلامەنتتىك تىڭداۋلارعا دايىندىق اياسىندا فەرمەر وداقتارى مەن اگروونەركاسىپ كەشەنى ونىمدەرىن وندىرۋشىلەر قاۋىمداستىقتارىنىڭ باسشىلارىمەن بىرقاتار جۇمىس كەزدەسۋلەرىن وتكىزدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
11 جەلتوقساندا استىق بىرلەستىكتەرىنىڭ وكىلدەرىمەن كەزدەسۋ بولدى. وعان اۋىل شارۋاشىلىعى وندىرۋشىلەرى تاراپىنان «قازاقستان استىق وداعى» زاڭدى تۇلعالار بىرلەستىگىنىڭ توراعاسى ن.وسپانوۆ, وسى مەكەمەنىڭ اتقارۋشى ديرەكتورى ش.بادىحان, قازاقستاننىڭ استىق وڭدەۋشىلەر وداعىنىڭ پرەزيدەنتى ە.گان جانە وداقتىڭ ديرەكتورلار كەڭەسىنىڭ مۇشەسى د.تاۋكەباەۆ قاتىستى.
شاراعا قازاقستان رەسپۋبليكاسى پارلامەنتى سەناتىنىڭ دەپۋتاتتارى ر.اكىموۆ, ب.ەلامانوۆ, م.جۇماعازيەۆ, ا.نۇراليەۆ, م.تاعىموۆ جانە ءا.قۇرتاەۆ قاتىستى.
كەزدەسۋدە ءسوز العان «قازاقستان استىق وداعى» زاڭدى تۇلعالار بىرلەستىگىنىڭ توراعاسى نۇرلان وسپانوۆ ەلدەگى استىق ءوندىرىسىن ۇلعايتۋعا مۇمكىندىك بەرەتىن نەگىزگى سەبەپتەرگە توقتالا كەلىپ: اۋىل شارۋاشىلىعى وندىرۋشىلەرى شىعىنداردىڭ ءبىر بولىگى بويىنشا مەملەكەت تاراپىنان وتەماقىلاردى قاجەت ەتەتىنىن, سونداي-اق اگروتەحنولوگيالار مەن تۇقىمدىق ماتەريالدى جاقسارتۋ قاجەت ەكەنىن جەتكىزدى.
وسىمدىكتەردى قورعايتىن كونەرگەن قۇرالدار تۋرالى دا ايتىلدى. «بىزدە القاپتاردىڭ لاستانۋ دەڭگەيى وتە جوعارى. ەگىن القاپتارىنىڭ لاستىعى 30 پايىزعا دەيىن ءونىمدى جويادى. ەگەر وسىمدىكتەردى قورعاۋ قۇرالدارىن قولدانبايتىن بولساق ساپالى ءونىم الا المايمىز. بۇگىنگى كۇنى ءبىزدىڭ ءتىزىلىم 90-شى جىلداردان باستاپ ەنگەن ءدارى-دارمەكتەردەر تۇرادى. جاڭا دارىلەر ۋاقىت وتكەن سايىن از تىركەلۋدە», دەدى ن.وسپانوۆ.
قازاقستاننىڭ استىق وڭدەۋشىلەر وداعىنىڭ پرەزيدەنتى ەۆگەني گاننىڭ ايتۋىنشا, ەكسپورتتاۋشىلاردى قولداۋ جۇيەسىنىڭ جوقتىعى نارىققا قاتىسۋشىلاردىڭ كوبىنە زاردابىن تيگىزىپ وتىر. «قازاقستان تۇتىنۋدان ارتىق ۇن ەكسپورتتايتىن جالعىز ەل بولۋىنا قاراماستان, شيكىزات ەكسپورتتاۋشىلار ءالى كۇنگە دەيىن كوپتەگەن قيىندىقتارعا تاپ بولۋدا. ماسەلەن, قوسىمشا قۇن سالىعىن قايتارۋ ماسەلەسى وتە وتكىر بولىپ وتىر, ويتكەنى تاۋەكەلدەردى باسقارۋ جۇيەسى كەز كەلگەن دەڭگەيدە تەكسەرۋ جۇرگىزە الادى», دەدى ول.
كەزدەسۋگە قاتىسۋشىلار وتاندىق اۋىل شارۋاشىلىعى تەحنيكاسىن جيناۋ جانە ونى كادەگە جاراتۋ الىمى, سونداي-اق تاريفتىك شەكتەۋلەردى, ۇلتتىق كومپانيالاردىڭ ساتىپ الۋ ساياساتىنىڭ ساپاسى مەن دەمپينگكە قارسى باج ماسەلەلەرىن دە قوزعادى.
سەنات توراعاسى داريعا نازارباەۆا كەزدەسۋدى قورىتىندىلاي كەلىپ, استىق سالاسىن دامىتۋ جونىندەگى اۋىل شارۋاشىلىعى سالاسى وكىلدەرىنىڭ ۇسىنىستارىن 2020 جىلعا جوسپارلانعان پارلامەنتتىك تىڭداۋلارعا دايىنداۋ ءۇشىن قازاقستان رەسپۋبليكاسى پارلامەنتى سەناتىنىڭ اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنە جىبەرۋدى ءوتىندى.