ەلجان ءبىرتانوۆ: ماسەلە پاتسيەنتتىڭ پايداسىنا شەشىلۋى ءتيىس

القا وتىرىسىنا سەنات پەن ءماجىلىستىڭ دەپۋتاتتارى, دسم قوعامدىق كەڭەسىنىڭ وكىلدەرى, مەديتسينالىق قىزمەتتىڭ ساپاسى بويىنشا بىرىككەن كوميسسيانىڭ, بيزنەس كەڭەستىڭ مۇشەلەرى, وبلىستاردىڭ, رەسپۋبليكالىق ماڭىزى بار قالالاردىڭ جانە استاناداعى دەنساۋلىق ساقتاۋ باسقارماسىنىڭ, تكقسبك, مامسق, رەدو ايماقتىق فيليالدارىنىڭ, ۆەدومستۆوعا قاراستى ۇيىمداردىڭ باسشىلارى قاتىستى.

مەديتسينالىق ساقتاندىرۋ قورى باسقارماسىنىڭ توراعاسى ايباتىر جۇماعۇلوۆ دەنساۋلىق ساقتاۋ سالاسىن قارجىلاندىرۋ كولەمى ايتارلىقتاي ارتقانىن ايتتى. ماسەلەن, 2020 جىلى امبۋلاتوريالىق-ەمحانالىق كومەكتى قارجىلاندىرۋ 78%-عا وسەدى, ياعني 740,9 ملرد تەڭگە بولىنەدى, كونسۋلتاتسيالىق-دياگنوستيكالىق قىزمەتتەرگە - 169 ملرد تەڭگە قاراستىرىلعان, ونىڭ ىشىندە 18 ملرد تەڭگە مەكتەپ مەديتسيناسىنا باعىتتالادى, ەمحانا دەڭگەيىندە مەديتسينالىق وڭالتۋعا -16,6 ملرد تەڭگە بولىنەدى, تمككك شەڭبەرىندە جانە ءمامس  جۇيەسى بويىنشا  امبۋلاتوريالىق ءدارى-دارمەكپەن قامتاماسىز ەتۋ 2 ەسە ارتادى دا, جالپى شىعىن  197 ملرد تەڭگە جەتەدى.

جالپى, 2019 جىلى حالىققا مەديتسينالىق كومەك كورسەتۋ بيۋدجەتى ءمامس ەسەبىنەن 51%-عا  نەمەسە 580 ملرد تەڭگەگە ءوستى.

سونداي-اق مەديتسينالىق ۇيىمداردى تەحنيكامەن جابدىقتاۋ, ينفراقۇرىلىم جانە كادرمەن قامتاماسىز ەتۋ ماسەلەسىنە نازار اۋدارىلدى.

القا جيىنىندا دەنساۋلىق ساقتاۋ جۇيەسىن تسيفرلاندىرۋعا جانە مەديتسينالىق اقپاراتتىق جۇيەلەردى ينتەگراتسيالاۋعا ەرەكشە باسىمدىق بەرىلدى.

دەنساۋلىق ساقتاۋ ۆيتسە-ءمينيسترى ولجاس ابىشەۆ مەديتسينالىق ۇيىمدار كومپيۋتەرلىك تەحنيكامەن جانە ينتەرنەتپەن 100% اۋداندىق دەڭگەيدە قامتاماسىز ەتىلگەنىن ايتتى.

بۇگىندە ەلەكتروندىق دەنساۋلىق پاسپورتى, امبۋلاتورلىق كارتالار, ديسپانسەرلىك ەسەپكە الۋ تولىق تسيفرلاندىرىلعان.

دەنساۋلىق ساقتاۋ باسقارماسىنىڭ باسشىسى ەرجان نۇرلىباەۆ قاراعاندى وبلىسىنداعى قاناتقاقتى جوبانىڭ ناتيجەسىن قورىتىندىلاي كەلە, وڭىردە بارلىق مەديتسينالىق ۇيىم بىرىڭعاي مەديتسينالىق اقپارات جۇيەگە كوشكەنىن جەتكىزدى. سونىمەن قاتار اۋىلدارداعى  85 مەديتسينالىق پۋنكت سپۋتنيكتىك بايلانىس ارقىلى ينتەرنەتكە قوسىلعان.

ەرجان نۇرلىباەۆ وڭالتۋ قىزمەتتەرى 1,5 ەسەگە, كۇندىزگى ستاتسيوناردا مەديتسينالىق كومەك 1,2 ەسەگە, كونسۋلتاتسيالىق-دياگنوستيكالىق قىزمەتتەردىڭ كولەمى 2 ەسەگە ارتىپ, قىمبات دياگنوستيكا (كت جانە مرت) سانى تامىز ايىندا 1265-تەن قاراشا ايىندا 3885-گە دەيىن وسكەنىن اتاپ ءوتتى.

ۆيتسە-مينيستر ليازات اقتاەۆا ءمامس ەنگىزىلگەن سوڭ, العاشقى ايلاردا  الدىمىزدان شىعۋى مۇمكىن  9 تاۋەكەلدى اتاپ ءوتتى: ساقتاندىرىلماعان ازاماتتار, قورعا تۇراقسىز تولەم جاسايتىن جۇمىس بەرۋشىلەر, وڭىرلەردەگى ءوزىن-ءوزى جۇمىسپەن قامتىپ جۇرگەن  ادامدار جانە بىرىڭعاي ستاتيستيكالىق ەسەپ جۇرگىزۋ.  مەديتسينالىق ساقتاندىرۋ قورى وسى قاۋىپ-قاتەردى  شەشۋدىڭ ءتيىمدى  ستسەناريلەرى مەن تەتىكتەرىن ازىرلەدى. مىسالى, جەڭىلدىك جاسالعان ساناتتاعى ازاماتتاردىڭ  ساقتاندىرۋ مارتەبەسى بەلگىسىز بولعان جاعدايدا, جەڭىلدىك مارتەبەسىن راستايتىن قۇجات, ستۋدەنتتىك بيلەت, تۋ تۋرالى نەمەسە زەينەتاقى كۋالىگىن كورسەتسە بولدى.

ءوزىن-ءوزى جۇمىسپەن قامتىعان ادامدار ارنايى تەرمينال ارقىلى مەديتسينالىق ساقتاندىرۋ قورىنا تولەم جاسايدى جانە بىردەن ساقتاندىرىلعان مارتەبەسىن الىپ, ءمامس جۇيەسىنە جىلدام قوسىلا الادى. 

ءمامس قورىنىڭ باسشىسى ا. جۇماعۇلوۆ  جۇمىس بەرۋشىلەر تۇراقتى تولەم جاساۋ ءۇشىن سالىق ورگاندارى باقىلاۋدى كۇشەيتەتىنىن ەسكە سالدى.

سونداي-اق ۆيتسە-مينيستر مەديتسينا قىزمەتكەرلەرىن تمككك جانە ءمامس پاكەتتەرىن, ىشكى بيزنەس-پروتسەستەردى بىلۋگە وقىتۋدى جالعاستىرۋ قاجەتتىگىن اتاپ ءوتتى.

مينيستر القا وتىرىسىن قورىتىندىلاي كەلە, مەديتسينالىق ساقتاندىرۋدى ەنگىزۋگە دايىندىق دەڭگەيىن جوعارى باعالادى.

ۆەدومستۆو باسشىسى  ايماقتىق دەنساۋلىق ساقتاۋ باسقارمالارىن قورمەن بىرلەسىپ, جەتكىزۋشى مەديتسينالىق مەكەمەلەرگە  مەنشىگىنە قاراماي  2020 جىلى مەديتسينالىق قىزمەتتەردى وبەكتيۆتى جانە ءتيىمدى  بولۋگە شاقىردى.

- مەديتسينالىق كومەك كورسەتۋ بارىسىندا داۋلى جاعدايلار كەزدەسسە, ماسەلە پاتسيەنتتىڭ پايداسىنا شەشىلۋى ءتيىس, - دەدى ەلجان ءبىرتانوۆ.

ول دەنساۋلىق ساقتاۋ باسقارمالارى مەن مامسق فيليالدارىنىڭ باسشىلارىنان  مەديتسينالىق ۇيىمداردى جاڭا جۇيەگە دايىنداپ, اسىرەسە مەديتسينا قىزمەتكەرلەرىن ءمامس بويىنشا جۇمىس ىستەۋگە وقىتۋ شارالارىنا ەرەكشە نازار اۋدارۋدى تالاپ ەتتى.