قازاقستاندىق دەلەگاتسيا پولشانىڭ اۆياتسيالىق بيلىگىمەن كەلىسسوزدەر جۇرگىزدى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
مەملەكەت باسشىسىنىڭ تاپسىرماسىنا سايكەس ەنگىزىلگەن «اشىق اسپان» رەجيمى اياسىندا ەكى ەل اراسىندا قاتىنايتىن رەيستەر ۇلعايتىلاتىن بولدى. قازىرگى ۋاقىتتا ولاردىڭ سانى اپتاسىنا 4 رەت بولسا, ەندى 14-كە جەتكىزىلەدى. اتاپ ايتقاندا, نۇر-سۇلتان-ۆارشاۆا باعىتى كۇندەلىكتى رەيس بولادى, سونداي-اق ۆارشاۆا-الماتى باعىتىنا اپتاسىنا 7 رەت قاتىنايدى.
كەلىسسوزدەردىڭ قورىتىندىسى بويىنشا LOT Polish Airlines اۋە كومپانياسى 2020 جىلدىڭ جازىنان باستاپ ۆارشاۆا-نۇر-سۇلتان باعىتىنداعى رەيستەر سانىن اپتاسىنا 4-تەن 7-گە دەيىن ارتتىراتىن بولدى. سونىمەن قاتار الداعى جىلى الماتىعا تۇراقتى رەيستەر اشپاقشى. پولشانىڭ اۋە كومپانياسى شىمكەنتكە دە رەيستەر اشۋدى جوسپارلاپ وتىر.