«استانا بالەت» ساحناسىندا «كۇلشە قىز» بالەتىنىڭ پرەمەراسى وتەدى. جەلتوقساننىڭ 20, 21 مەن 22 كۇندەرى استانالىق تەاتر شارل پەررونىڭ اتتاس ەرتەگىسىنىڭ جەلىسىمەن, زامانىمىزدىڭ ھاس حورەوگرافتارىنىڭ ءبىرى نادەجدا كالينينا قويعان ەكى كورىنىستى «كۇلشە قىز» بالەتىن ۇسىنادى. بۇل تۋرالى تەاتردىڭ ءباسپاسوز قىزمەتى حابارلادى.
وسى بالەت جايلى ەستىگەن ونەر سۇيەر قاۋىم پرەمەرادان ءبىر اي بۇرىن بيلەتتەردىڭ ءبارىن ساتىپ العان.
كورەرمەننىڭ وسىنالىقتى ىنتىزارلىق تانىتىپ وتىرعانىنىڭ سەبەبى سول, ەلىمىزدە اتالعان ەرتەگى بالەت ساحناسىندا العاش قويىلىپ وتىر. سەرگەي پروكوفەۆتىڭ عاجايىپ مۋزىكاسىن قويۋشى-ديريجەر ارمان ورازعاليەۆ باسقاراتىن وركەستر ورىنداپ شىعادى.
پرەمەراعا دايىندىق ەكى اي بۇرىن باستالعان. حورەوگراف نادەجدا كالينينانىڭ ايتۋىنشا, «كۇلشە قىز» - شىعارماشىلىق جولىنداعى ەڭ كۇردەلى جوبالارىنىڭ ءبىرى.
- بۇل العاش قويىلىپ جاتقان دۇنيە. حورەوگرافيا, دەكوراتسيا, كوستيۋمدەر, بەينە كونتەنت – وسىنىڭ ءبارىن ويدان شىعارىپ, ارنايى «استانا بالەت» ءۇشىن دايىنداپ, كيىمدەرىن تىگىپ جاتىرمىز. ادام بالاسى ەرتەگىنى قاجەتسىنەدى. ءبىزدىڭ ماقسات وتباسىڭىزبەن بىرگە كورەتىن, زاماناۋي ستيلدە جاسالعان, تارتىمدى كەيىپكەرلەرى كوپ, ءازىلى بار جارقىن سپەكتكل جاساۋ. بالەتتە كومەديا جانرى مۇلدەم سيرەك قولدانىلادى, ويتكەنى, ساحنادا تەنتەكتىڭ كەيىپىن سومداۋ, كۇلدىرۋ وتە كۇردەلى. ول ءۇشىن بەلگىلى ءبىر دارەجەدە ىشكى بوستاندىق قاجەت, - دەدى بالەتمەيستەر.
كۇلشە قىزدىڭ وگەي اپكەلەرى, ولاردىڭ كاۆالەرلەرى, وگەي شەشە, ءتىپتى حانزادانىڭ وزىنە قىزىقتى حورەوگرافيالىق رەپليكالار قوسىلعان.
- ءوز باسىم حانزادانىڭ تىم سالماقتى, دۇردەي بولعانىن قالامادىم. اراكىدىك ول-داعى تەنتەكتىك جاسايدى. سپەكتاكل حورەوگرافياسىن جاساعاندا مەن ارتىستەرگە يەك ارتامىن, ولاردى ءاردايىم وسى دۇنيەنى بىرگە تۋدىرۋشى رەتىندە قابىلدايمىن. «استانا بالەت» ارتىستەرىنە قاراپ شابىتتانامىن. ترۋپپانىڭ كاسىبي تۇرعىدا وسىنشالىقتى وسكەنى تاڭ قالدىرادى, تامساندىرادى. سەبەبى, ولارمەن وسى تەاتر قۇرىلعان شاقتا جۇمىس ىستەگەنىم بار,- دەدى ن. كالينينا.
حورەوگراف نادەجدا كالينينا ليبرەتتونىڭ دا اۆتورى. دەكوراتسيا مەن كوستيۋم سۋرتەشىسى - تانىمال ستسەنوگراف سەرگەي نوۆيكوۆ. ونىڭ ينتەرپرەتاتسياسىنا سايكەس, بالەت وقيعاسى كۇلشە قىزدىڭ كۇندەلىگى رەتىندە ءوربيدى. سول سەبەپتى, كىتاپ تاقىرىبى سپەكتاكلدىڭ ءون بويىنان سەزىلەدى.
الداعى پرەمەراعا تەاتردىڭ بالەت ترۋپپاسى تۇگەل قاتىسادى. ناقتى ەشكىمنىڭ ەسىمىن اتاعان جوق, دەگەنمەن ءبىر نارسە ايقىن. باستى پارتيالاردىڭ بىرىنە ارتىستەردىڭ ءۇش-ءتورت قۇرامىن دايىنداپ وتىر.
سپەكتاكل 20-جەلتوقساندا, ساعات 19:30, ال, جەلتوقساننىڭ 21, 22 كۇندەرى, ساعات 18:00 باستالادى.