شەتەلدىك قانداستار تۋرالى كىتاپ جارىق كوردى

ومىرباياندىق تسيكلدىڭ العاشقى ەكى كىتابىنا شەتەلدە تۇراتىن 50 قازاقتىڭ وقيعاسى اڭگىمەلەنگەن. عالىمدار, بيزنەسمەندەر, سپورتشىلار, ارتىستەر مەن كومپانيا جەتەكشىلەرى – ولاردىڭ ارقايسىسىنىڭ ءوز تاريحى بار.

كەيىپكەرلەر ءوز ومىرلەرى, تاڭداعان جولى مەن بولاشاققا جوسپارلارى تۋرالى اڭگىمەلەيدى.

«وسى كىتاپ ارقىلى ءبىز قازاق دەگەن ۇلتتىڭ ءبىرتۇتاس, مىزعىمايتىن مىقتى ءارى اسا قابىلەتتى حالىق ەكەنىن, قاي ەلدى, قاي جەردى مەكەن ەتسە دە, ۇلتتىق بولمىسىن, ءتۇپ تامىرىن جوعالتپايتىنىنا وتانداستارىمىزدىڭ نازارىن اۋدارعىمىز كەلدى. سونداي-اق قازاقتاردىڭ الەمدىك قاۋىمداستىقتاعى وزىندىك بىرەگەي ورنىنا, قوناقجايلىلىق, كەڭپەيىلدىلىك, ۇلكەنگە قۇرمەت, كىشىگە ىزەت سىندى قۇندىلىقتارىن الەمگە ءوز سالت-ءداستۇرى, مۋزىكاسى مەن كوركەمونەرى, مىنەز-قۇلقى ارقىلى تانىتىپ كەلە جاتقانىنا كەڭىرەك توقتالىپ, كوبىرەك كوڭىل ءبولۋدى ماقسات ەتتىك»,- دەدى ۇيىمداستىرۋشىلار.  

بۇل كىتاپتىڭ بەلگىلى ءبىر اۆتورى جوق, كىتاپتا كەيىپكەرلەرىنىڭ وزدەرى ايتقان وقيعالارلىنىڭ توپتاماسى جيناقتالعان. قازىر قازاق تىلىندە «قازاق الەمى» دەپ اتالعان ەكى كىتاپ جانە ورىس تىلىندە «مير كازاحوۆ» اتىمەن ەكى كىتاپ باسپادان شىقتى. ءبىرىنشى كىتاپتا 24 ەتنيكالىق قازاقتىڭ ءومىربايانى توپتاستىرىلعان. ەكىنشى كىتاپقا 26 جاس كەيىپكەردىڭ ءومىر تاريحى قامتىلدى.

وقىرمان تۋعان-تۋىستارىنان, دوستارىنان الىس, ءوز وتانىنان جىراقتا ءومىر سۇرەتىن قازاقتاردىڭ تاريحىمەن تانىس بولادى.

قۇراستىرۋشىلاردىڭ ايتۋىنشا, كىتاپقا ءدال وسى ادامدار ادەيىلەپ تاڭداپ الىنباعان. بۇل ەلۋ كەيىپكەر – قازاق حالقىنىڭ ۇلىلىعىن كورسەتۋدى, كەز كەلگەن ەلدە, كەز كەلگەن جەردە قازاق دەگەن اتتى ماقتانىشپەن الىپ جۇرۋگە, قايدا دا بولسا, ءوز جولدارىن تابۋعا, بۇل ومىردە كىرپىش بولىپ قالانۋعا بولاتىنىن ارقايسىمىزدىڭ سانامىزعا جەتكىزۋدى ماقسات تۇتقان «وتانداستار» قورىنىڭ باستاماسىنا العاشقى بولىپ ءۇن قوسقاندار.

ءبىرىنشى كىتاپتا قامال بۇزار قىرىق جاستان اسىپ, قاتارلاستارى مەن ىزىنەن ەرگەن جاس بۋىنعا ەڭبەكقورلىق پەن ادامدىقتىڭ ۇلگىسى بولىپ جۇرگەن قانداستارىمىز تۋرالى ايتىلادى. ەكىنشى كىتاپقا جاسى قىرىققا جەتپەگەن جاستار توپتاستىرىلعان.