الماتى مۋزەيىندە «جيۆايا پاميات» مونوگرافياسى تانىستىرىلدى

2016 جىلى «جيۆايا پاميات» جوباسى اياسىندا 30 جىللدار تاريحىنا قاتىستى: يندۋستريالاندىرۋ, كۇشتەپ ۇجىمداستىرۋ جانە ونىڭ زارداپتارى, ساياسي رەپرەسسيا مەن الەۋمەتتىك-ەتنيكالىق توپتاردىڭ دەپورتاتسيالانۋىنا قاتىستى اشىق لەكتسيالار ۇيىمداستىرىلعان.  2018 جىلى جوبا Open Mind پودكاستى بولىپ جالعاسىن تاپتى. ال بيىل قالىڭ وقىرمانعا «جيۆايا پاميات» كىتابى بولىپ جول تارتىپ وتىر. «ەستەن كەتپەس ەستەلىكتەر. قازاقستانداعى ستالينشىلدىك: وتكەن شاق, تاريحي جاد, ارىلۋ» جۇلدىزبەك ابىلحوجين, ميحايل اكۋلوۆ, الەكساندرا تسايدىڭ بىرلەسە شىعارعان كىتابىنا ارقاۋ بولىپ وتىر. «تاريح», «تاريحي جاد», «ونەر» دەگەن ءۇش بولىمنەن تۇراتىن جيناقتا اۆتورلار 1930-1940 جىلدارداعى ستاليندىك رەپرەسسيانىڭ تاريحي سالدارىن ەكشەپ, جاڭاشا كوزقاراسپەن قوعام نازارىنا ۇسىنادى. وكسفورد ۋنيۆەرسيتەتىنىڭ پروفەسسورى, ورىس مادەنيەتى تاريحىنىڭ جىلىگىن شاعىپ, مايىن ىشكەن مامان كاتريونا كەللي «شىمشىق سويسا دا, قاساپشى سويسىن» دەسە, ء تۇرلى ەتنيكالىق توپتاردى زەرتتەپ جۇرگەن, زەردەلەپ جۇرگەن حاس عالىمداردىڭ ديالوگى بۇل كىتاپتىڭ قۇندىلىعىن ارتتىرا تۇسكەندەي. سوڭعى بولىمدە قازاق, وزبەك حالقى سياقتى «نەگىزگى حالىقتاردىڭ» جانە پولشادان دەپورتاتسيالانعان از ساندى ەتنوستاردىڭ, وزبەكستانداعى ورىس سۋرەتشىلەرىنىڭ تاعدىرى ءسوز بولادى. جيناققا تاريح عىلىمدارىنىڭ دوكتورى جۇلدىزبەك ابىلحوجين, ميحايل اكۋلوۆ - PhD, تاريح عىلىمدارىنىڭ دوكتورى زاۋرەش ساقتاعانوۆا, زەرتتەۋشى,  جۋرناليست ەكاتەرينا كۋزنەتسوۆا, جازۋشى يۋري سەرەبريانسكي,  مادەنيەتتانۋشى الەكساندرا تساي, مادەنيەتتانۋشى, ساۆيتسكي اتىنداعى مۇراجايدىڭ 1984-2015جج. ديرەكتورى مارينيكا بابانازاروۆا, مادەنيەتتانۋشى گۇلدانا سافاروۆا جانە سۋرەتشى, زەرتتەۋشى اسەل قادىرحانوۆانىڭ  ەڭبەگى كىرگەن.

سوروس-قازاقستان قورىنىڭ باسقارما ءتورايىمى ا.ايدارقۇلوۆا «اشىقتىق پەن ادىلدىككە نەگىزدەلگەن ادام قۇقىقتارى سالاسىندا ۇزاق جىلدار بويى ەڭبەك ەتىپ كەلە جاتقان سوڭ, سول زامانداعى قورقىنىش, ۇرەي مەن ادىلەتسىزدىكتى تەرەڭىرەك تۇسىنەسىڭ. ونداعان مىڭ ادامنىڭ ءولىمى, جۇزدەگەن مىڭ جازىقسىز جاننىڭ ءىستى بولىپ, جەر اۋدارىلۋى, تالكەككە ۇشىراعان سان مىڭ تاعدىر, شاڭىراعى ورتاسىنا تۇسكەن وتباسىلار, جوعالعان ۇرپاق – بۇنىڭ ءبارى اۆتوريتارلىق سولاقاي ساياساتتىڭ «جەمىسى», سول كەزدەگى زاڭنىڭ السىزدىگى مەن ادام بالاسىنىڭ ادام قۇرلى ساناتقا كىرمەي, قۇقىقتارىنىڭ اياققا تاپتالعانى» دەپ اتاپ ءوتتى. سۋرەت ءسوز جەتكىزە الماعان سىر مەن سەزىمدى بەرە الاتىن قۇدىرەتكە يە. كورمە سۋرەتشىلەرى جەكەلەگەن ەستەلىكتەر, حالىقتىڭ باستان كەشكەن تاعدىرى, سانامىزدا ساقتالعان, مۇراعاتتاردا قاتتالعان تاريحقا باسقاشا قاراپ, جاڭاشا ءۇن قاتادى.

كورمەدە س. اتابەكوۆ, ب.ءبۇبىحانوۆا, ر.زاحاروۆ, و. كارپوۆ, ءا.قادىرحانوۆا, ر. نۇرەكەەۆ, ا. ۋگاي, ز.فالكوۆا سىندى سۋرەتشىلەردىڭ جۇمىستارى قويىلعان.

جوبا اۆتورى ءارى كورمە جەتەكشىسى ا.تساي بۇل جەردەگى سىني كوزقاراس, ۇجىمدىق ەستەلىك تالاي جىلدار بويى قالىپتاسقان سەڭدى  بۇزىپ, وزىنشە سارالاپ, باعاسىن بەرەتىندىگىن ايتادى. ەستەلىكتەرگە نازار اۋدارعاندا مۇنداي جايتتىڭ ەندى قايتالانبايتىنىنا سەنىممەن قاراۋ كەرەك, دەيدى.

كورمە 22 جەلتوقسانعا دەيىن جالعاسادى.