كوپبالالى انالاردى قولداۋدىڭ جارقىن ۇلگىسى الماتى وبلىسىنىڭ كوكسۋ اۋدانىندا دا ءجۇرىپ جاتىر. جىل باسىنان بەرى ايماقتا تۇراتىن 19 اۋلەتكە باسپانا بەرىلگەن.
قونىس تويىن ءوز شاڭىراعىندا اتاپ وتكەن انا مەن بالا بۇل قۋانىشقا مەملەكەتتىك باعدارلامالار مەن مەتسەناتتاردىڭ كومەگىن ارقىلى قول جەتكىزدى. بۇگىنگە دەيىن اۋدان ورتالىعى بالپىق بي اۋىلىنان 10 وتباسى, مۇقانشى اۋىلدىق وكرۋگىنەن 3 اۋلەت, جارلىوزەك جانە ەڭبەكشى اۋىلدارىنان ەكى-ەكى وتباسىدان باسپانالى بولسا, مۇسابەك, العاباس اۋىلدىق وكرۋگتەرىنەن دە ءبىر-ءبىر اۋلەت ءۇي العان.
-جاقىن كۇندەرى بالپىق بي اۋىلىندا «نۇرلى جەر» باعدارلاماسىمەن سالىنىپ جاتقان 50 پاتەرلىك ءۇي پايدالانۋعا بەرىلەدى. بۇل - كوپقاباتتى جالگەرلىك ءۇيدىڭ قۇنى 456,9 ملن تەڭگە. وسى ۇيدەن كەزەكتە تۇرعان كوپ بالالى وتباسىلارعا دا پاتەر بەرەمىز. قازىر اۋدان بويىنشا 141 كوپبالالى وتباسى تۇرعىن ۇيگە مۇقتاج. بولاشاقتا ماسەلە شەشىمىن تابادى, دەيدى كوكسۋ اۋدانىنىڭ اكىمى الماس ءادىل.