مەملەكەتتىڭ تۇراقتى دامۋىنىڭ نەگىزى – باسەكەگە قابىلەتتى جاستار بۋىنى. بۇل تىكەلەي جاس قازاقستاندىقتاردىڭ ءبىلىم مەن بىلىك ساپاسىنا, ولاردىڭ ۇمتىلىسى مەن ىنتاسىنا بايلانىستى. سوندىقتان مەملەكەتتىك ساياساتتىڭ نەگىزگى باعىتىنىڭ ءبىرى – جاستار سەكتورى.
جاڭا زامان جاستارى بىلىممەن قاتار ادالدىق, پاراساتتىلىق, ادىلدىك پەن سەنىم سياقتى ادامي قۇندىلىقتاردى بويىنا ءسىڭىرۋى قاجەت. وسى ورايدا سىبايلاس جەمقورلىققا قارسى ءىس-قيمىل اگەنتتىگى تۇڭعىش پرەزيدەنت كۇنىنە جانە جاستار جىلىنا وراي «Sanaly urpaq» جوباسى اياسىندا «Adal urpaq» ەڭ ۇزدىك كلۋبتارىنىڭ رەسپۋبليكالىق فورۋمىن وتكىزدى.
ەلىمىزدىڭ تۇكپىر-تۇكپىرىنەن جيىلعان جاستار ورتاق وي, پايىمدى پىكىر, پايدالى كەڭەستەرىمەن ءبولىسىپ, ءوزارا تاجىريبە الماستى.
«اتالعان ءىس-شارا «Adal urpaq» جوباسىن جانداندىرىپ, وڭىرلەردەگى پاراساتتى, ءادىل جاس ەلشىلەردىڭ وتانعا, ءوز ىسىنە, اتقارعان جۇمىسىنا دەگەن قىزىعۋشىلىقتارىن ارتتىرىپ, وزىندىك كوزقاراسى بار ازاماتتاردىڭ, باسەكەگە قابىلەتتى سانالى ۇرپاقتىڭ قالىپتاسۋىنا سەبەپ بولادى. جيىننىڭ باستى ماقساتتارىنىڭ ءبىرى – 2050 جىلى 30 دامىعان ەلدىڭ قاتارىنا قوسىلعان, ەكونوميكاسى دامىعان مەملەكەتتىڭ باسەكەگە قابىلەتتى, پاراساتتى, سانالى تۇلعاسىن قالىپتاستىرۋ», دەيدى ۇيىمداستىرۋشىلار.
فورۋم قورىتىندىسى بويىنشا ايماقتاردىڭ ەڭ ۇزدىك كلۋبتارىنا اگەنتتىك اتىنان العىس حاتتار تاپسىرىلىپ, بەلسەندى تۇلعالاردىڭ ەڭبەگى ەلەندى, جاڭا جىلعا جاڭا ۇسىنىستار مەن باعىتتار ايقىندالدى.
ء«وز زاڭىن قۇرمەتتەپ-قاستەرلەيتىن, ەلىنە شىن بەرىلگەن ادال ۇرپاق – ماڭگىلىك ەلدىڭ كەپىلى. ەلوردا تورىندە وتكەن «ادال ۇرپاق» رەسپۋبليكالىق جاستار فورۋمىنا ەلىمىزگە بەلگىلى ولجاس اباي, ساندي سۇلتان, سەرىك ساپيەۆ سىندى ءوز سالاسىنىڭ ۇزدىكتەرى قاتىسىپ, ومىردە جەتكەن جەتىستىكتەرىمەن, ومىرلىك تاجىربيەلەرىمەن ءبولىستى. ءبىز بۇدان رۋحاني كۇش-قۋات الدىق. وسكەلەڭ ۇرپاقتى وتانسۇيگىشتىككە, ادامداردى, ءداستۇردى قۇرمەتتەۋگە, ءبىلىم مەن ەڭبەككە ۇمتىلۋعا, كورەگەندىلىك پەن ادالدىققا تاربيەلەۋ جايىندا اۋقىمدى اڭگىمە ءوربىدى. ءىس-شاراعا ەلىمىزدەگى «Adal urpaq» ەرىكتى مەكتەپ كلۋبتارىنىڭ بەلسەندى, دارىندى, ءبىلىمدى جاستارى قاتىستى. ەل استاناسىنىڭ ەڭ كورىكتى جەرلەرىنە ساياحات جاسادىق. جاستاردىڭ دامۋىنا, بويلارىنداعى دارىندارىن كورسەتۋگە مۇمكىندىك بەرەتىن وسىنداي اۋقىمدى ءىس-شارالار جالعاسىن تاپسا, ءار جاستى بەلسەندى ءومىر سۇرۋگە باعىتتايتىنى بەلگىلى», دەيدى تۇركىستان وبلىسىنان كەلگەن «Adal urpaq» كلۋبىنىڭ مۇشەسى ايگۇل ەرجىگىتوۆا.
جيىن سوڭىندا «Adal urpaq» كلۋبتارىنىڭ مۇشەلەرى ماراپاتتالدى.