پرەمەر-مينيستر اسقار مامين فرانتسيا-قازاقستان ىسكەرلىك كەڭەسىنىڭ تەڭ توراعاسى يۆ-لۋي دارريكارەر باستاعان «فرانتسيا-قازاقستان» ساۋدا-ونەركاسىپ پالاتاسىنىڭ مۇشەلەرىن جانە فرانتسيا كاسىپورىندارى قوزعالىسىنىڭ (MEDEF) وكىلدەرىن قابىلدادى. بۇل تۋرالى primeminister.kz حابارلادى.
«قازاقستان مەن فرانتسيا ‒ ستراتەگيالىق سەرىكتەستەر. ءبىز سەنىمدى ىنتىماقتاستىقتىڭ بەرىك ىرگەتاسىن قالاي الدىق. بۇل ەكى تاراپ ءۇشىن دە ايتارلىقتاي ەكونوميكالىق, ساياسي جانە مادەني ديۆيدەندتەر اكەلەدى», — دەدى ا. مامين.
بيىل 9 ايدا قازاقستان مەن فرانتسيا اراسىنداعى تاۋار اينالىمى ەۋروپالىق وداقتىڭ باسقا ەلدەرىندەگى كورسەتكىشتەردەن ارتا وتىرىپ, 6%-دان استام ءوستى جانە $3,4 ملرد قۇرادى. وسى جىلدىڭ ءبىرىنشى جارتىجىلدىعىنداعى قر ەكونوميكاسىنا تىكەلەي فرانتسۋز ينۆەستيتسيالارىنىڭ اعىمى 24%-دان استامعا, $537 ملن دەيىن ۇلعايدى.
ۇكىمەت باسشىسى كوپتەگەن ينۆەستيتسيالىق جوبانىڭ بەلسەندى ىسكە اسىرىلۋ ساتىسىندا تۇرعانىن اتاپ ءوتتى. قازاقستاندا فرانتسۋز كاپيتالىنىڭ قاتىسۋىمەن ءتۇرلى سالالاردا 230-عا جۋىق كاسىپورىن جۇمىس ىستەيدى, ولاردىڭ ىشىندە Total, Orano, Alstom جانە باسقا دا ءىرى ترانسۇلتتىق كورپوراتسيالار بار. تاۋەلسىزدىك جىلدارى فرانتسيا كومپانيالارى قازاقستانعا $16,4 ملرد استام ينۆەستيتسيا سالدى.
ۇكىمەت باسشىسى مەن فرانتسۋز كومپانيالارىنىڭ وكىلدەرى ەكى ەلدىڭ بيزنەس قۇرىلىمدارى اراسىنداعى ءوزارا ءتيىمدى ىنتىماقتاستىقتى نىعايتۋ, سونداي-اق, ەنەرگەتيكا, سۋ شارۋاشىلىعى جانە تۇرعىن ءۇي-كوممۋنالدىق ينفراقۇرىلىمىن جاڭعىرتۋ, تسيفرلىق دەنساۋلىق ساقتاۋ, بيومەتريالىق جۇيەلەر, اۆتوموبيل قۇراستىرۋ, ترانسفورماتور ءوندىرىسى, عارىشتىق جەرسەرىكتەردى قۇراستىرۋ جانە ت.ب. سالالارداعى بىرلەسكەن جوبالاردى ىسكە اسىرۋ ماسەلەلەرىن تالقىلادى.
كەزدەسۋگە پرەمەر-ءمينيستردىڭ ءبىرىنشى ورىنباسارى ‒ قارجى ءمينيسترى ءا. سمايىلوۆ, يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ, ۇلتتىق ەكونوميكا ءمينيسترى ر. دالەنوۆ, ەكولوگيا, گەولوگيا جانە تابيعي رەسۋرستار ءمينيسترى م. مىرزاعاليەۆ, دەنساۋلىق ساقتاۋ ءمينيسترى ە. ءبىرتانوۆ, سىرتقى ىستەر, ەنەرگەتيكا, تسيفرلىق دامۋ, يننوۆاتسيالار جانە اەروعارىش ونەركاسىبى, ساۋدا جانە ينتەگراتسيا ۆيتسە-مينيسترلەرى, ۇلتتىق كومپانيالاردىڭ باسشىلىعى جانە ت. ب. قاتىستى.
فرانتسۋز دەلەگاتسياسى قۇرامىندا Total, Orano, Alstom, Airbus, Vicat, Air Liquide, Idemia, Renault CIS & LADA Export, Veolia, Bouygues Travaux Publics, Catering International Services, DV Conseil, Lazard, Sanofi, TechnipFMC, TECOFI S.A.S. كومپانيالارى بولدى.
فرانتسيا كاسىپورىندارىنىڭ قوزعالىسى (MEDEF) ‒ ءتۇرلى قىزمەت سالاسىنداعى 800 مىڭ كومپانيانى بىرىكتىرەتىن ەلدىڭ بيزنەس قاۋىمداستىقتارىنىڭ ءىرى ۇيىمى.