تاياۋدا وزبەكستانداعى قازاقستان جىلى اياسىندا وزبەكستان رەسپۋبليكاسىنىڭ حورەزم وبلىسىندا ماڭعىستاۋ وبلىسىنىڭ مادەني كۇندەرى ءوتتى. بۇل تۋرالى ماڭعىستاۋ وبلىستىق فيلارمونياسىنىڭ ءباسپاسوز قىزمەتى حابارلادى.
شارانىڭ ماقساتى - عاسىرلار بويى ۇزىلمەي كەلە جاتقان بايلانىستى ودان ءارى نىعايتۋ جانە باۋىرلاس ەكى ەل اراسىنداعى دوستىق قارىم-قاتىناستى, باۋىرلاس حالىقتارىمىزدىڭ جاقىنداستىعىن ودان ءارى تەرەڭدەتۋ.
ماڭعىستاۋلىق ونەرپازدار الدىمەن حيۋا قالاسىنداعى بەكەت اتا مىرزاعۇل ۇلى وقىعان مەدرەسەنى, بىرنەشە تاريحي ورىندى ارالادى. ساپار بارىسى ودان ءارى مۇرات وسكىنباەۆ اتىنداعى ماڭعىستاۋ وبلىستىق فيلارمونياسى ءبىر توپ ءارتىسىنىڭ ۇرگەنىش قالاسىنداعى كوللەدج جانە مەكتەپ وقۋشىلارىنا ۆوكال, دومبىرا-تەنور, حورەوگرافيا ونەرىنەن ماستەر كلاستار وتكىزۋىمەن جالعاستى. مادەني شارالار اياسىندا ءا.كەكىلباي ۇلى اتىنداعى ماڭعىستاۋ وبلىستىق تاريحي-ولكەتانۋ مۋزەيى « ۇلى دالا مۇرالارى» فوتوكورمەسىن ۇسىندى. كورمەدە قازاقستاننىڭ تاڭعاجايىپ تابيعاتى جانە كورنەكى جەرلەرى بەينەلەنگەن. كورمە سوڭى ء«بىز شىرقايمىز دوستىق ءانىن!» اتتى مۇرات وسكىنباەۆ اتىنداعى ماڭعىستاۋ وبلىستىق فيلارمونياسىنىڭ «اقجارما» فولكلورلىق ءانسامبلى مەن بي توبىنىڭ كونتسەرتىنە ۇلاستى.
كونتسەرت تۇركەشتىڭ «كوڭىل اشار» كۇيىمەن باستالدى. ودان ءارى «اقجارما» فولكلورلىق ءانسامبلىنىڭ سۇيەمەلدەۋىندە مادەنيەت سالاسىنىڭ ۇزدىكتەرى اسقار, ءاسانالى كوشەروۆتەر, رەسپۋبليكالىق ءداستۇرلى انشىلەر بايقاۋىنىڭ لاۋرەاتى ايگەرىم قۇلجاراسوۆا, «جەتى قايقى» رەسپۋبليكالىق ءداستۇرلى انشىلەر بايقاۋىنىڭ باس جۇلدەگەرى سابيت شەكتىباەۆ, سونىمەن قاتار مارات سافاروۆ جانە كامشات ىزتىلەۋوۆا ءان شىرقادى. «ارنا» توبى مەن «جاس قانات – 2013» بايقاۋىنىڭ باس جۇلدەگەرى ايدا بايگەلوۆا جەكە ورىنداۋدا ونەر كورسەتتى. حالىقتىڭ ىستىق ىقىلاسىنا بولەنگەن كونتسەرت ەسكەندىر حاسانعاليەۆتىڭ «اتامەكەن» انىمەن اياقتالدى.
ماڭعىستاۋ وبلىسى