باعالاۋ جۇيەسىنىڭ تىزبەسىنە ەنگەن 13 ۋنيۆەرسيتەت تەكسەرىلدى. ولاردىڭ بەسەۋىندە بۇعان دەيىنگى ەسكەرتۋلەر جويىلماعاندىقتان, 5 ۋنيۆەرسيتەتتىڭ ليتسەنزياسى ءبىر ايعا توقتاتىلدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جازدى.
«12 جوعارى وقۋ ورنىنا ايىپپۇل سالىنىپ, 1 ۋنيۆەرسيتەت بويىنشا ءىس سوتقا جىبەرىلدى. جىل سوڭىنا دەيىن تاعى 12 جوو بويىنشا بۇرىن بەرىلگەن نۇسقامالاردىڭ ورىندالۋىن تەكسەرۋدى جوسپارلاپ وتىرمىز. بۇزۋشىلىقتار قايتا انىقتالعان جاعدايدا, ليتسەنزيادان ايىرۋ جانە جوو جابۋ ءۇشىن قۇجاتتار سوتقا جىبەرىلەدى. قازىرگى ۋاقىتتا بىزگە, ليتسەنزيا بەرەتىن ورگان رەتىندە, مىندەتتەرىنە جاۋاپسىز قارايتىن جوعارى وقۋ ورىندارىنىڭ ليتسەنزيالارىن ءوز تاراپىمىزدان كەرى قايتارىپ الۋعا قۇقىق بەرەتىن زاڭ نورمالارىن ەنگىزۋ جوسپارلانۋدا. بۇل باستاما مەملەكەت باسشىسى تاراپىنان قولداۋعا يە بولدى», دەپ جازدى اسحات ايماعامبەتوۆ.
سونداي-اق ول ليتسەنزيانى قايتارىپ الۋ ءۇشىن سوتقا جۇگىنۋ كەرەكتىگىن ەسكە سالدى.
«قازىرگى ۋاقىتتا ليتسەنزيانى قايتارىپ الۋ ءۇشىن سوتقا جۇگىنۋ نەمەسە قاجەت بولعان جاعدايدا بارلىق شاعىمدانۋ پروتسەدۋراسىنان ءوتۋ كەرەكتىگىن ەستەرىڭىزگە سالامىن», دەپ جازدى ول.