قارۋلى كۇشتەرىمىزدىڭ قۇرلىق اسكەرلەرىنىڭ ۆزۆود جانە توپ كومانديرلەرى وزدەرىنىڭ بىلىمدەرى مەن ماشىقتىلىقتارىن كومانديرلىك دايارلىق جيىندارى بارىسىندا جەتىلدىرۋدە, دەپ حابارلادى «باتىس» وڭىرلىك قولباسشىلىعى ءباسپاسوز قىزمەتىنەن.
جيىندار اسكەري بولىمدەردىڭ اۋماقتارىندا ون كۇن بويى ءوتتى. وعان قۇرلىق اسكەرلەرىنىڭ 1500-عا جۋىق وفيتسەرلەرى مەن سەرجانتتارى قاتىستى.
كومانديرلىك دايارلىق جيىندارىنىڭ بارىسىندا ولار كۇندەلىكتى اسكەري ومىردەگى ءىس-شارالاردى ساپالى ۇيىمداستىرۋ, اسكەري قىزمەتتىڭ قاۋىپسىزدىلىگىن قامتاماسىز ەتۋ, ادىستەمەلىك, اتىس جانە تاكتيكالىق دايارلىقتاردى جاقسارتۋ ماسەلەلەرىن قاراستىرىپ شىقتى.
ءىس-شارانىڭ باستى ماقستاتتارىنىڭ ءبىرى – ۆزۆود كومانديرلەرىنىڭ ورىن العان جاعدايدى تەز-ارادا ءوز بەتىمەن ساراپتاۋ, شەشىم قابىلداۋ, باعىنىشتى جەكە قۇرامعا جاۋىنگەرلىك بۇيرىق بەرۋ, جاۋىنگەرلىك جانە گرافيكالىق قۇجاتتارمەن جۇمىس جاساۋ, شەشىم قابىلداۋعا قاجەتتى ەسەپتەردى جۇرگىزۋ, جاۋىنگەرلىك قيمىلداردى جوسپارلاۋ قابىلەتتىكتەرىن جەتىلدىرۋ بولدى.
جيىنداردى ساپالى دارەجەدە ۇيىمداستىرۋ ماقساتىندا اسكەري ءبولىم باسقاراماسى, باتالون جانە ديۆيزيون كومانديرلەرى ساناتىنان تاجىريبەلى وفيتسەرلەر جۇمىلدىرىلدى.
-جيىن بارىسىندا بىزدەر وقۋ جىلىنىڭ بارىسىندا, كۇندەلىكتى ءومىر مەن جاۋىنگەرلىك دايارلىق ۇردىسىندەگى ورىن العان داۋلى ماسەلەلەردى, ناقتى شەشىمى جوق سۇراقتاردىڭ بارلىعىن جان-جاقتى قاراستىرىپ, قاجەت جاۋاپتاردىڭ بارلىعىن الا الدىق. بۇل جيىننىڭ جاس كومانديرلەردىڭ تاجىريبە الماسىپ, ۇجىمنىڭ كۇش جۇمىلدىرىپ قىزمەت جاساۋىنا مۇمكىندىك بەرگەن الاڭ رەتىندە كوپ سەپتىگى تيەدى دەگەن ويدامىن, دەيدى «باتىس» وڭىرلىك قولباسشىلىعى 41433 اسكەري ءبولىمىنىڭ ۆزۆود كومانديرى لەيتەنانت ازامات نۇرعازيەۆ.
ۆزۆود كومانديرلەرى تاكتيكالىق, دەنە, ارنايى, تىلدىق جانە اتىس دايىندىقتارى, سونىمەن قوسا جەدەل باسقارۋ ساباقتارىنان تەوريالارىق, ال بايلانىس پەن توپوگرافيا بويىنشا پراكتيكالىق سىناقتار تاپسىردى.
بۇگىنگى تاڭدا ەلىمىزدىڭ قارۋلى كۇشتەرىندە تاربيەشىلەرمەن قاتار جەكە قۇراممەن جۇمىس جاساۋدا كۇردەلى تاپسىرمالار جۇكتەلگەن كومانديرلەردىڭ ءرولى نىعايىپ كەلە جاتقانىن ايتا كەتكەن ءجون. اسكەرلەردە ۆزۆود كومانديرى ءوزىنىڭ شاعىن عانا اسكەري ۇجىمىندا وقۋ ۇدەرىسىن ۇيىمداستىرادى. بەيبىت جانە سوعىس ۋاقىتىندا ول ۆزۆودتىڭ جاۋىنگەرلىك ازىرلىگىنە جانە ولاردىڭ جاۋىنگەرلىك تاپسىرمالاردى ءساتتى ورىنداۋىنا, جاۋىنگەرلىك دايارلىققا, تاربيەگە, جەكە قۇرامنىڭ اسكەري ءتارتىبى مەن مورالدىق-پسيحولوگيالىق جاعدايىنا, سونداي-اق قارۋ-جاراقتىڭ, اسكەري تەحنيكانىڭ ساقتالۋى مەن جاي-كۇيىنە جاۋاپ بەرەدى. ۆزۆود كومانديرى باعىنىستىلاردى جەكە وقىتىپ-ۇيرەتەدى جانە ولاردى تاربيەلەيدى, ولاردىڭ تۇرمىس-تىرشىلىگىن ءارى قامىن ويلايدى.