جەكپە-جەك دەسە دەلەبەسى قوزىپ, قانى قىز-قىز قاينايتىن قازاق جانكۇيەرلەرىنىڭ ايىزى قاناتىن كۇن جاقىن. اتاپ ايتساق, 29 قاراشادا الاتاۋدىڭ ەتەگىن جايلاعان اسەم شاھارداعى «الماتى ارەنا» دەپ اتالاتىن ءزاۋلىم سپورت كەشەنىندە اسا 102 ءتۋرنيرى وتەدى. شتاب-پاتەرى چەشەنستاننىڭ استاناسى گروزنىيدا ورنالاسقان ايتۋلى ۇيىم جانە قازاقستاندىق «الاش پرايد» كومپانياسىنىڭ مۇرىندىق بولۋىمەن وتەتىن ءدۇبىرلى دودادا الەمنىڭ بىرقاتار مەملەكەتىنەن كەلگەن بەلدى سپورتشىلار باق سىنايدى.
بەدەلى كۇن ساناپ ارتىپ, ميلليونداعان كورەرمەن تاعاتسىزدانا كۇتەتىن اسا (Absolute Championship Akhmat) ءتۋرنيرىنىڭ بۇعان دەيىن دە قازاقستاندا ءبىر مارتە جالاۋى جەلبىرەگەن. ەستەرىڭىزدە بولار, 2017 جىلدىڭ قىركۇيەك ايىندا ول الماتىدا دۇركىرەپ تۇرىپ ءوتتى. وكىنىشكە قاراي, سول كەشتىڭ باستى جەكپە-جەكتەرىنىڭ بىرىندە قازاقتىڭ قايسار ۇلى ارمان وسپانوۆ برازيليانىڭ بەتكەۇستارى تياگو لۋيس بونيفاسيو سيلۆاداعا ەسە جىبەردى. بىراق وسىدان ەكى جىل بۇرىن ۇيىمداستىرىلعان شارامەن سالىستىرعاندا, قازىرگى جارىستىڭ ءمانى دە, ماڭىزى دا زور. ويتكەنى الداعى تۋرنيردە اسا نۇسقاسى بويىنشا قوس بىردەي التىن بەلبەۋ ساراپقا سالىنادى.
جارتىلاي ورتا سالماقتىڭ (77,1 كيلو) التىن بەلبەۋى ءۇشىن كاباردينو-بالكاريانىڭ وكىلى البەرت تۇمەنوۆ (21-4-0) پەن چەشەنستاننىڭ ورەنى بەسلان ۋشۋكوۆ (17-3-0) ايقاسادى. ال ورتا سالماق دارەجەسىندەگى (83,9 كيلو) چەمپيوندىق ءتاج ءۇشىن تارتىس يچكەريانىڭ تاعى ءبىر ساڭلاعى سالامۋ ابدۋراحمانوۆ (12-1-0) پەن ماسكەۋدىڭ مىقتىسى ۆالەري مياسنيكوۆ (14-1-2) اراسىندا وتەدى.
– اسا-نىڭ قۇرىلعانىنا اسا كوپ ۋاقىت بولا قويعان جوق. دەسەك تە قىسقا عانا مەرزىم ارالىعىندا ولار زور بەدەل جيىپ ۇلگەردى. بۇگىنگى تاڭدا ايتۋلى ۇيىم تمد اۋماعىندا تەڭدەسسىز دەپ تانىلىپ, كۇللى الەم بويىنشا ۇزدىك بەستىكتىڭ ساناتىندا. سەبەبى اسا ءجيى-ءجيى جارىستار وتكىزەدى, ءار شارانى اسا جوعارى دەڭگەيدە ۇيىمداستىرادى, قاتارىنا كىل مىقتى سپورتشىلاردى جيعان, باپكەرلەرى بىلىكتى, تورەشىلەرى ساۋاتتى جانە دە بەرىلەتىن سىياقىلارى دا قوماقتى. قازىرگى كەزدە بۇل كومپونەنتتەر دە سپورتتىق سايىستاردىڭ بەدەلىن ارتتىرۋ ءۇشىن اسا ماڭىزدى. سول سەبەپتى بىزدەر اسا-مەن تىعىز قارىم-قاتىناس ورناتۋدى و باستان كوزدەدىك. ناتيجەسىن وزدەرىڭىز كورىپ وتىرسىزدار. ىرگەتاسى الماتىدا قالانعان «الاش پرايدتىڭ» ايتۋلى ۇيىممەن قويان-قولتىق ارالاسىپ, جۇيەلى تۇردە جۇمىس جۇرگىزىپ كەلە جاتقانىنا بەس جىلدان اسا ۋاقىت بولدى. بۇگىنگى تاڭدا اسا-نىڭ مۇرىندىق بولۋىمەن وتكەن جارىستارعا قازاقستاننىڭ سپورتشىلارى ۇزدىكسىز قاتىسىپ كەلەدى. سونىڭ ارقاسىندا كەيبىر ورەندەرىمىزدىڭ داڭقى ءبىراز جەرگە جايىلدى. ارا-تۇرا ءبىزدىڭ ەلدە دە ءدۇبىرلى دودالار ءوتىپ تۇرادى. الداعى ۋاقىتتا دا سول ىسكەرلىك بايلانىستى ۇزبەي, ودان ءارى دامىتۋعا ءتيىسپىز. ال ءبىزدىڭ كوزدەگەن نەگىزگى ماقساتىمىز – وسى سپورت ءتۇرىن سەرىك ەتكەن قازاق جاستارىن حالىقارالىق ارەناعا كوپتەپ شىعارىپ, ولاردىڭ ادەمدىك دەڭگەيدەگى دودالاردا تانىلۋىنا بارىنشا ۇلەس قوسۋ.
الماتىدا وتەتىن جارىستا جوعارىدا ايتىلعان تيتۋلدىق قوس باسەكەدەن بولەك, تاعى 14 جەكپە-جەك وتكىزۋ جوسپارلانىپ وتىر. ارالارىنداعى ەڭ ماڭىزدىلارىنا توقتالساق, تاجىريبەلى ەرمەك تلاۋوۆ (70,3 كيلو) ايگىلى ۆەنەر گاليەۆپەن كۇش سىناسادى. جاۋىنگەرلىك سامبودان الەمنىڭ ەكى دۇركىن چەمپيونى دەگەن دارداي اتاعى بار باشقۇرتستاننىڭ تۋماسى ەرەجەسىز جەكپە-جەك ونەرىندە دە تولاعاي تابىستارعا قول جەتكىزدى. گاليەۆتىڭ بارلىق جەتىستىكتەرىن تىزبەكتەمەي-اق, كەزىندە ونىڭ الەكساندر شلەمەنكو مەن مايربەك تايسۋموۆ سىندى اتاقتارىنان ات ۇركەتىن ساڭلاقتارعا سان سوقتىرعانىن ايتساق تا جەتكىلىكتى.
«مەتيس» دەگەن لاقاپ اتپەن تانىمال ەۆگەني ەگەمبەرديەۆ (93 كيلو) يسپانيانىڭ الىبى دانيەل تولەدومەن جۇدىرىقتاسسا, قازاق كۇرەسىنىڭ قىر-سىرىنا قانىققان نۇرسۇلتان قاسىمحانوۆ (66 كيلو) برازيليانىڭ دجۋ-دجيتسۋ شەبەرى اۋگۋستو مەندەسپەن ايقاسادى. سول سەكىلدى شاحمارال جەتپىسوۆ (+93 كيلو), گويتي دازاەۆ (77,1 كيلو), فانيل رافيكوۆ (66 كيلو) جانە تاعى باسقا جەرلەستەرىمىز شەت مەملەكەتتەردەن كەلگەن ساقا سپورتشىلارمەن سايىسقا تۇسەدى. نە كەرەك, الداعى 29 قاراشادا الماتى تورىندە تاعى ءبىر دۋلى دودا الەم نازارىن وزىنە جالت قاراتايىن دەپ تۇر.
الماتى