اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە «Open space» فورماتىندا رەكتور تاكير بالىقباەۆ جۇرتشىلىقپەن كەزدەسۋ وتكىزدى. كەزدەسۋگە پرورەكتورلار مەن دەپارتامەنت ديرەكتورلارى, ستۋدەنتتىك رەكتورات مۇشەلەرى قاتىستى. وسى كەزدەسۋ بارىسىندا جەتپىستەن استام ءوتىنىش قارالدى.
ۋنيۆەرسيتەتتىڭ ءباسپاسوز قىزمەتىنەن حابارلاعانىنداي, كەزدەسۋ بارىسىندا وقۋ اقىسى, ءبىر ماماندىقتان ەكىنشى ماماندىققا اۋىسۋ, جاتاقحانا جاعدايىن جاقسارتۋ جانە وقۋ ۇدەرىسىندەگى ۇيىمداستىرۋ جۇمىستارى, باسقا دا الەۋمەتتىك ماڭىزى بار ماسەلەلەر تۋرالى سۇراقتار قويىلدى. ءار ءوتىنىش بەرۋشى رەكتورمەن جانە ۋنيۆەرسيتەتتىڭ باسقا دا باسشىلارىمەن بەتپە-بەت سويلەسىپ, ۇسىنىستارىن اشىق ايتۋعا مۇمكىندىك الدى. بۇل كەزدەسۋدە ستۋدەنتتەر مەن ولاردىڭ اتا-انالارى كوكەيكەستى ماسەلەلەرىن ەمىن-ەركىن ورتاعا سالدى.
ۋنيۆەرسيتەت باسشىلارى وزدەرىنىڭ قۇزىرەتتەرىنە قاتىستى سۇراقتارعا دايەكتى جاۋاپ بەردى. بارلىق ءوتىنىش بەرۋشىلەرمەن تىكەلەي بايلانىس ورناتقان ۋنيۆەرسيتەت رەكتورى «Open space» قاتىسۋشىلارىنىڭ ماسەلەلەرىن ءوز باسشىلىعىنا الدى.
رەكتورمەن كەزدەسۋگە كەلگەن ستۋدەنتتەر مەن اتا-انالار كوپتەگەن ماسەلەلەردى جەدەل شەشۋگە مۇمكىندىك الدى. كەيبىر ماسەلەلەردىڭ ورىندالۋ مەرزىمىن كورسەتىلىپ, ءتيىستى قۇرىلىمدىق بولىمشەلەرگە تاپسىرما بەرىلدى.