كەشە پارلامەنت ءماجىلىسىنىڭ توراعاسى نۇرلان نىعماتۋلين ءۇندىستان رەسپۋبليكاسىنىڭ مەملەكەتتىك سىرتقى ىستەر ءمينيسترى, پارلامەنت ىستەرى جونىندەگى مەملەكەتتىك ءمينيسترى ۆەللامۆەللي مۋراليدحارانمەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
تاراپتار ەكىجاقتى, سونىڭ ىشىندە پارلامەنتارالىق قاتىناستى دامىتۋدىڭ وزەكتى ماسەلەلەرىن تالقىلادى.
ءماجىلىس توراعاسى قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ تاۋەلسىزدىك العان ءبىرىنشى كۇننەن باستاپ ۇندىستانمەن ءوزارا قارىم-قاتىناستى نىعايتۋعا ەرەكشە كوڭىل ءبولىپ كەلە جاتقانىن, ال مەملەكەت باسشىسى قاسىم-جومارت توقاەۆ قازاقستاننىڭ سىرتقى ساياساتتاعى ساباقتاستىعىن قامتاماسىز ەتەتىنىن اتاپ ءوتتى.
ن. نىعماتۋلين ەكى ەل اراسىنداعى قارقىندى ساياسي ديالوگ الداعى ۋاقىتتا ورتاق مۇددەلەر جولىندا بەلسەندى دامي بەرەتىنىنە سەنىم ءبىلدىردى.
وسى جولدا پارلامەنتارالىق ىنتىماقتاستىق ۇلكەن ءرول اتقارادى. ءماجىلىس توراعاسىنىڭ پىكىرىنشە, بەيىندى كوميتەتتەر مەن دوستىق توپتار ارقىلى تىعىز ىسكەرلىك بايلانىس ورناتىپ, زاڭ شىعارماشىلىق قىزمەتىندە تاجىريبە الماسۋدىڭ ماڭىزدىلىعى زور.
ءوز كەزەگىندە مارتەبەلى مەيمان قازاقستان مەن ءۇندىستاننىڭ عاسىرلاردان جالعاسقان رۋحاني ۇندەستىگى بارىن العا تارتتى. ۆەللامۆەللي مۋراليدحاران سونداي-اق, ۇندىستانعا بىرنەشە رەت كەلىپ, ەكى ەل اراسىنداعى مادەني تامىرلاستىقتى ودان ءارى تەرەڭدەتۋمەن قاتار ارىپتەستىك قاتىناستى كۇشەيتۋگە سەرپىن بەرگەنى ءۇشىن قازاقستاننىڭ تۇڭعىش پرەزيدەنتى نۇرسۇلتان نازارباەۆقا ءۇندىستان حالقىنىڭ قۇرمەتى ەرەكشە ەكەنىن اتاپ ءوتتى.
كەزدەسۋ يەلەرى ەۋرازيالىق ەكونوميكالىق وداق اياسىندا ىقپالداستىق ءبىزدىڭ ەلدەرىمىز ءۇشىن ۇلكەن مۇمكىندىكتەرگە جول اشقانىن ايتىپ, باسىم باعىتتار قاتارىندا ەنەرگەتيكا, لوگيستيكا, اقپاراتتىق تەحنولوگيا, تۋريزم سالالارىنا توقتالدى.
نۇرلان نىعماتۋلين اتاپ وتكەندەي, ۇندىستاندىق ارىپتەستەرمەن بىرلەسكەن جۇمىس پارلامەنتتەر اراسىنداعى بايلانىستى نىعايتىپ قانا قويماي, ەلدەرىمىزدىڭ ستراتەگيالىق ىقپالداستىعىن جان-جاقتى دامىتۋعا مۇمكىندىك بەرەدى.