مۇنداي پىكىردى ۆۋدرو ۆيلسون اتىنداعى حالىقارالىق عىلىمي ورتالىقتاعى كەننان ينستيتۋتىنىڭ ديرەكتورى مەتتيۋ روجانسكي نۇر-سۇلتانداعى "استانا كلۋبىنىڭ" V وتىرىسىندا ايتتى.
"يادرولىق قارۋدى تاراتپاۋ جۇيەسىن كەڭەيتۋ الەمدىك يادرولىق دەرجاۆالارمەن جۇمىس ىستەۋدىڭ جاڭا جاعدايلارىنا الىپ كەلەدى. ناتيجەسىندە يادرولىق قارۋدى تاراتپاۋ تۋرالى جاڭا شارتتاردى قامتاماسىز ەتۋ قاجەت", - دەدى ول.
كوپتەگەن ەلدەر قارۋسىزدانۋ ماسەلەسى شەڭبەرىندە قولدانىستاعى ەرەجەلەر مەن نورمالارعا سەنبەيدى. سپيكەردىڭ ايتۋىنشا, يادرولىق قارۋسىزدانۋ جونىندەگى جاڭا ستراتەگيالاردى ازىرلەۋ قاجەت.
11-12 قاراشا كۇندەرى "نازارباەۆ ورتالىعىندا" ساياسي فورۋم فورماتىندا بەدەلدى حالىقارالىق پىكىرتالاس الاڭى - "استانا كلۋبىنىڭ" بەسىنشى وتىرىسى وتۋدە. ءىس-شاراعا الەمنىڭ 50-دەن استام توپ ساياساتكەرلەرى, ەۋرازيا زياتكەرلەرى مەن حالىقارالىق قاتىناستار سالاسىنداعى ۇزدىك ماماندار قاتىسۋدا.
نەگىزگى سپيكەرلەر قاتارىندا اۋعانستان پرەزيدەنتى حاميد كارزاي, سلوۆەنيا پرەزيدەنتى دانيلو تيۋرك, نوبەل سىيلىعىنىڭ لاۋرەاتى (2005), ماگاتە باس ديرەكتورى (2013-2014) موحاممەد ەل-بارادەي, JP Morgan Chase باسقارما توراعاسى, International توراعاسى دجەيكوب فرەنكەل, رەسەي ستراتەگيالىق زەرتتەۋلەر ينستيتۋتىنىڭ ديرەكتورى, رف ۇكىمەتىنىڭ توراعاسى (2004-2007), رف سىرتقى بارلاۋ قىزمەتىنىڭ ديرەكتورى (2007-2016) ميحايل فرادكوۆ جانە ت.ب. بار.
وتىرىستىڭ كۇن تارتىبىندە – قاۋىپسىزدىكتىڭ وزەكتى جانە ۇلكەن ەۋرازيانىڭ ستراتەگيالىق بولاشاعى ماسەلەلەرى. بەس سەسسيا شەڭبەرىندە كلۋب قاتىسۋشىلارى ەۋرازيا ەلدەرى مەن حالىقتارىنىڭ دامۋىنداعى اسا وتكىر پروبلەمالىق ترەندتەردى, وڭىرلىك ىنتىماقتاستىق ءۇشىن جاڭا مۇمكىندىكتەردى, سونداي-اق بولاشاق كونتۋرى مەن ستسەناريلەرىن تالقىلايدى.
تۇجىرىمدامالىق تۇرعىدا بارلىق پىكىرتالاستار باستى ماسەلە – ۇلكەن ەۋرازيادا ىنتىماقتاستىقتىڭ جاڭا ارحيتەكتۋراسىن قۇرۋ توڭىرەگىنە شوعىرلانعان.
ءىس-شارا اياسىندا "2020 جىلى ەۋرازيا ءۇشىن توپ - 10 تاۋەكەل" رەيتينگىنىڭ كەزەكتى شىعارىلىمى – الەمدىك ەكونوميكا جانە ساياسات ينستيتۋتى استانا كلۋبىنىڭ قامقورلىعىمەن شىعارىلاتىن الەمنىڭ جەتەكشى ساراپشىلارىنىڭ ستراتەگيالىق فورسايتى تانىستىرىلدى.
كلۋبتىڭ ۇيىمداستىرۋشىلارى – قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى جانە قور جانىنداعى الەمدىك ەكونوميكا جانە ساياسات ينستيتۋتى.