بۇگىن الماتى وبلىسىنىڭ اكىمى اماندىق باتالوۆ باسىلىمنىڭ عاسىرلىق مەرەيتويلىق شارالارى اياسىندا تالدىقورعان قالاسىنا كەلگەن «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالىنى قابىلدادى. بۇل تۋرالى الماتى وبلىسى اكىمدىگىنىڭ ءباسپاسوز قىزمەتى حابارلادى.
باس باسىلىم جەتەكشىسىن قارسى العان وبلىس اكىمى اماندىق باتالوۆ الدىمەن ءوڭىردىڭ الەۋمەتتىك-ەكونوميكالىق دامۋى جونىندە قىسقاشا بايانداپ بەردى. ايماقتاعى اۋىل شارۋاشىلىعى, سونىڭ ىشىندە قانت ءوندىرىسى, جۇگەرى ءوسىرۋ, مال بورداقىلاۋ جايىنا, الەۋمەتتىك قورعاۋ شارالارىنا, ءتۋريزمدى وركەندەتۋ ىسىنە توقتالىپ ءوتتى. وسىنداي اتقارىلعان ىستەردى حالىققا جەتكىزۋدەگى «ەگەمەن قازاقستان» گازەتىنىڭ ءرولى ەرەكشە ەكەنىن دە اتاپ ءوتتى.
- بۇگىنگى كۇنى ينتەرنەت-جۋرناليستيكا دامىدى, بلوگەرلەر بەلسەندى دەپ جاتامىز, بىراق ءسوزى سالماقتى, ماسەلەلەردى بايىپتى, وبەكتيۆتى بەرە الاتىن گازەتتەردىڭ ورنى قاشاندا بولەك. وسىنداي باسىلىمدار - ءاردايىم ءبىزدىڭ باستى مىنبەرىمىز. كەيدە ايماقتارداعى كەمشىلىكتەردى باق ارقىلى ءبىلىپ وتىرامىز. بۇل جاعىنان بىزگە سىن ماتەريالدار دا كومەكتەسەدى. سەبەبى ءبىزدىڭ بارلىق جەرگە بارۋعا مۇمكىندىگىمىز بولا بەرمەيدى. سوندىقتان سىزدەردىڭ ەڭبەكتەرىڭىزدى باعالايمىز. بيىل «ەگەمەن قازاقستان» باسىلىمىنا 100 جىل تولىپ وتىر. بۇل – ۇلكەن بەلەس. مەرەيتويلىق شارالارعا الماتى وبلىسى دا بەلسەنە اتسالىسادى. ءبىز ءوز تاراپىمىزدان قاشاندا قولداۋ كورسەتۋگە دايىنبىز, - دەدى ا. باتالوۆ.
ءوز كەزەگىندە دارحان قىدىرالى الماتى وبلىسىنىڭ, سونىڭ ىشىندە تالدىقورعان قالاسىنىڭ ۇزدىكسىز تۇرلەنىپ كەلە جاتقانىنا تاڭدانىسىن جاسىرمادى.
- ەلىمىزدە ەرەكشە وركەندەپ كەلە جاتقان ءۇش قالانى اتار ەدىم. ونىڭ ءبىرىنشىسى ەلوردامىز نۇر-سۇلتان قالاسى – ەلباسىنىڭ ءتول تۋىندىسى, ەكىنشىسى – تۇركىستان, ەلباسىنىڭ باستاماسىمەن ورتالىق مارتەبەسىنە يە بولىپ, دامۋدىڭ جاڭا ساتىسىنا كوتەرىلۋدە. ءۇشىنشىسى – تالدىقورعان, ەلباسىنىڭ تۋعان جەرى. ءار كەلگەن سايىن تالدىقورعاننىڭ تانىماستاي وزگەرەتىنىنە ءتانتىمىن. وبلىس ورتالىعى عانا ەمەس, جالپى الماتى وبلىسىنىڭ دامۋ قادامدارىن «ەگەمەن قازاقستان» گازەتى ۇنەمى جازىپ, كورسەتىپ كەلەدى. ەلدىڭ يگىلىگىنە قىزمەت ەتۋ – ءبىزدىڭ ورتاق مىندەتىمىز, - دەدى د. قىدىرالى.
باسىلىم باسشىسى عاسىرلىق مەرەيتويدى ۇلى تۇلعالارمەن بايلانىستىرا وتىرىپ, تاعزىم, تاعىلىم سيپاتىندا وتكىزۋدى ءجون كورگەندەرىن ايتتى. ماسەلەن, باس باسىلىمدى باسقارعان 18 قايراتكەردىڭ 15-ءى رەپرەسسيا كەزىندە اتىلىپ, وزگەسى قۋعىن-سۇرگىنگە ۇشىراعان. سوندىقتان گازەتتىڭ 100 جىلدىق جىلناماسى قازاق تاريحىنان تىس ەمەس. گازەت بۇل باعىتتاعى العاشقى ساپارىن اباي ەلىنەن باستاپ, جيدەباي جەرىنە تاعزىم ەتىپ قايتقان ەكەن. ال بيىل 125 جىلدىق مەرەيتويى اتالىپ وتكەن جىر قۇلاگەرى ءىلياس جانسۇگىروۆتىڭ ەسىمى دە ەرتەرەكتەگى «ەڭبەكشى قازاق» گازەتىمەن بايلانىستى. سوندىقتان جەتىسۋ جەرىندەگى ساپار ءىلياس مۇرالارىمەن ساباقتاستىرىلاتىن بولادى.
كەزدەسۋ سوڭىندا باسىلىمدى 100 جىلدىعىمەن قۇتتىقتاعان وبلىس اكىمى ا.باتالوۆ گازەتتىڭ ءوسىپ-وركەندەپ, جاقسى جاڭالىقتاردىڭ جارشىسى بولا بەرۋىنە تىلەكتەستىگىن ءبىلدىردى.
جالپى, وسى ساپار اياسىندا د. قىدىرالى ءى. جانسۇگىروۆتىڭ ادەبي-مەموريالدىق مۋزەيىندە, ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە, سالتانات سارايىندا جەتىسۋلىق وقىرماندارمەن, ستۋدەنتتەرمەن, وبلىس جۇرتشىلىعىمەن جۇزدەسىپ, پىكىر الماسادى دەپ جوسپارلانعان.