ەۋرازيالىق كونتينەنتتىڭ ءوسىپ كەلە جاتقان كولىكتىك بايلانىستىلىعى ادامزات تاريحىندا تەڭدەسى جوق مۇمكىندىكتەر اشادى. بۇل تۋرالى ەلباسى نۇرسۇلتان نازارباەۆ «Astana Club» پلەنارلىق وتىرىسىندا ايتتى.
«ەۋرازياداعى گەوساياسي جاعدايعا جاعىمسىز اسەرىن تيگىزەتىن قاۋىپتەر جايلى كوزقاراسىمدى بىلدىرسەم دەپ ەدىم. ءبىزدى كەلە جاتقان داعدارىستان حابار بەرەتىن الەمدىك ەكونوميكاداعى احۋال الاڭداتادى. ساۋدا تەكەتىرەستەرى ءوسىپ كەلە جاتقاندىقتان, گەوساياسي تۇراقسىزدىق احۋالىنا الەمدىك ينستيتۋتتار تەرىس باعاسىن بەرىپ جاتىر. جاھاندىق ءوسىمنىڭ باسەڭدەۋى الەمدىك ساۋداعا تەرىس ىقپالىن تيگىزىپ كەلەدى. جاھاندىق مەملەكەتتىك قارىزدىڭ دەڭگەيى 2007 جىلعى داعدارىس الدىنداعى قارىز دەڭگەيىنەن ەكى ەسە ارتىپ, الەمدىك ءجىو-ءنىڭ 80 پايىزىنا جەتتى. بۇل فاكتورلاردىڭ بارلىعى الەمدىك تۇراقتىلىقتى تەڭسەلتىپ, ەۋرازيا ەلدەرىنە قاتتى ىقپال ەتىپ وتىر» دەدى نۇرسۇلتان نازارباەۆ وز سوزىندە.
«الەمدىك دەرجاۆالار اراسىنداعى باسەكەلەستىك جاڭا دەڭگەيگە شىقتى. ءوزارا سانكتسيالار, ساۋدا سوعىستارى – اقش پەن قحر-دىڭ قازىرگى قارىم-قاتىناسىنىڭ قالىپتى جاعدايىنا اينالىپ كەتكەن. اگرەسسيۆتى ريتوريكا, ەكونوميكالىق سانكتسيا – باتىس پەن رەسەي اراسىنداعى نەگىزگى قاتىناس ءتىلى بولىپ تۇر. تۇراقتى كوممۋنيكاتسيا ارنالارىنىڭ بولماۋى احۋالدى ودان سايىن قيىنداتىپ وتىر. جەتەكشى دەرجاۆالاردىڭ اراسىنداعى تەكەتىرەس اۆتوماتتى تۇردە ەۋرازيانىڭ ىستىق نۇكتەلەرىنە اۋىسىپ وتىرادى. ول جاعداي سيريا مەن ۋكرايناداعى ماسەلەنى بەيبىت تۇردە شەشۋ امالدارىن قيىنداتادى. ال برەكسيت – سوڭعى ۋاقىتتىڭ نەگىزگى انتينتەگراتسيالىق وقيعاسىنا اينالدى» دەپ تولىقتىردى ن. نازارباەۆ.
ايتا كەتەيىك, نازارباەۆ ورتالىعىندا الەمنىڭ جەتەكشى ديپلوماتتارى مەن ساياساتكەرلەرىنىڭ جانە ساراپشىلارىنىڭ باسىن بىرىكتىرگەن ساياسي فورۋم تۇرىندەگى حالىقارالىق بەدەلدى پىكىرتالاس الاڭى - «استانا كلۋبىنىڭ» بەسىنشى وتىرىسى وتۋدە.
شاراعا الەمنىڭ 23 مەملەكەتىنەن گەوساياسات, ەكونوميكامەن حالىقارالىق قاتىناستار سالاسىنىڭ ساراپشىلارى رەتىندە مويىندالعان 50-دەن استام حالىقارالىق سپيكەر قاتىسۋدا.
قۇرمەتتى مەيمانداردىڭ قاتارىندا 3 بۇرىنعى مەملەكەت باسشىسى, 5 ەكس-پرەمەر-مينيستر, 10 مينيستر جانە 1 نوبەل سىيلىعىنىڭ لاۋرەاتى بار. فورۋمعا قاتىسىپ جاتقان ساراپشىلاردىڭ گەوگرافياسى كەڭ. اتاپ ايتساق, اقش, يسپانيا, يتاليا, رەسەي, جاپونيا, سەربيا, اۆستريا, نورۆەگيا, قىتاي, ءۇندىستان, بەلگيا, اۋعانستان, شۆەتسيا, پورتۋگاليا, وڭتۇستىك كورەيا, ەگيپەت, بانگلادەش, سلوۆەنيا, قىرعىزستان, يران, ۇلىبريتانيا, پاكىستان ەلدەرى بار.
«استانا كلۋبى» وتىرىستارىنىڭ ءبىر بولىگى «Chatham house» ەرەجەلەرىنە ساي وتەدى. تالقىلاۋ جابىق سيپاتتا وتەدى. بۇگىنگى جيىن ەۋرازيا مەن الەمنىڭ ەڭ وزەكتى ماسەلەلەرىنىڭ وتكىر ءارى اشىق تالقىلانۋىنا مۇمكىندىك بەرەدى.