نۇر-سۇلتان قالاسىندا جارىقتىڭ ءسونىپ قالۋ وقيعاسىنا بايلانىستى بريفينگ ءوتتى.
«10 قاراشا كۇنى ساعات 03:50 مينۋتتا 101 قىزمەتىنە حابارلاما كەلىپ ءتۇستى. الدىن الا مالىمەت بويىنشا, سىعاناق كوشەسى, 12-ۇيدەگى 5 مەتر ەلەكتر كابەلى جانىپ جاتقانى انىقتالدى. وقيعاعا بايلانىستى ارنايى شتاب قۇرىلىپ, اۆاريانى جويۋ جۇمىستارى بەلسەندى جۇرگىزىلدى», دەدى نۇر-سۇلتان قالاسى توتەنشە جاعداي دەپارتامەنتىنىڭ وكىلى رايىمبەك الىمعازى ۇلى.
سونىمەن قاتار نۇر-سۇلتان قالاسىنىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى باسشىسى ءبازىل دۇيسەنبەك ۇلى ءدال قازىرگى ۋاقىتتا قالاداعى بارلىق نىساندارعا جارىق بەرىلگەنىن جەتكىزدى.
«ارنايى توپ ەكى كۇن جۇمىس ىستەپ, اۆاريانىڭ سالدارىن تولىق جويدى. عيماراتتار مەن كوپ قاباتتى كەشەندەردىڭ بارلىعىنا ەلەكتر قۋاتى بەرىلدى. تەك «بايتەرەك» مونۋمەنتى مەن موسكۆا بيزنەس ورتالىعى جارتى ساعاتتان كەيىن ەلەكتر قۋاتىنا قوسىلادى», دەدى ءبازىل دۇيسەنبەك ۇلى.
ايتا كەتەيىك, كابەلدىك جەلىلەردى قالپىنا كەلتىرۋ ءۇشىن 15 ادامنان تۇراتىن اۆاريالىق-قالپىنا كەلتىرۋ بريگاداسى مەن 8 ارنايى تەحنيكا جۇمىلدىرىلعان.