ماكارون ونىمدەرىن اۋدانداعى دۇكەندەر, شارۋا قوجالىقتارى مەن مەكتەپتەر ساتىپ الادى.
وسكەمەننىڭ ىرگەسىندەگى گلۋبوكوە ەجەلدەن ەگىن شارۋاشىلىعى دامىعان اۋداننىڭ بىرىنەن سانالادى. القاپتارداعى استىقتى يگەرۋ, وڭدەۋ ماسەلەلەرى دە اۋداندا جاقسى جولعا قويىلعان. بۇل اۋدانداعى استىقتى وڭدەۋمەن شۇعىلداناتىن كاسىپورىننىڭ ءبىرى - 20 جىلدان بەرى ۇزدىكسىز جۇمىس ىستەپ كەلە جاتقان «كراسنىي يار» جشس.
سەرىكتەستىك باسشىسى نيكولاي پرىگوۆتىڭ ايتۋىنشا, كاسىپورىن ءبىرىنشى جانە جوعارى سورتتى ۇن شىعارادى.
«گلۋبوكوە اۋدانىن ۇنمەن تولىق قامتاماسىز ەتىپ وتىرمىز. كورشى شەمونايحا اۋدانىنىڭ كەيبىر اۋىلدارى بىزدەن ۇن الىپ تۇرادى. ۇننىڭ بەلگىلى ءبىر بولىگىن وسكەمەندەگى نان زاۋىتىنا جىبەرەمىز. كۇنىنە 5 توننا ۇندى وڭدەيمىز. ونىڭ 3 تونناسى - 1 سورت, قالعانى - جوعارى سورتتى. ءبىزدىڭ كاسىپورىن اۋدانداعى الەۋمەتتىك باعدارلامالارعا بەلسەندى قاتىسادى. اۋدان اكىمدىگىنىڭ باستاماسىمەن تۇراقتاندىرۋ قورى قۇرىلعان. اۋداننىڭ شارۋا قوجالىقتارى بىزگە بيداي اكەلەدى. تۇراقتاندىرۋ قورىنىڭ ونىمدەرى ءبىزدىڭ قويمالاردا ساقتالادى. بىزدەگى ۇننىڭ باعاسى قالادان 2 تەڭگەگە تومەن. كوپ بالالى, جالعىز باستى انالار, مۇگەدەك, زەينەتكەر, جاعدايى تومەن ادامدارعا قولدان كەلگەنشە كومەكتەسۋگە تىرىسامىز» دەيدى ن.پرىگوۆ.
اۋداندىق اۋىل شارۋاشىلىعى ءبولىمىنىڭ باسشىسى مىندەتىن اتقارۋشى ە.قاپاتاەۆتىڭ سوزىنە سەنسەك, تۇراقتاندىرۋ قورى 1 سورتتى ۇن باعاسىن وسىرمەۋ, قالىپتى ۇستاۋ ماقساتىندا قۇرىلىپتى.
«باعدارلامانىڭ وپەراتورى «كراسنىي يار» جشس-ىنە بيداي وتكىزەتىن 42 شارۋاشىلىق انىقتالعان. ءبىرىنشى سورتتى ۇن دايىنداۋعا ارنالعان بيداي كولەمى – 1100 توننا. وسى ۇن نەگىزىندە 1 سورتتى نان ازىرلەنەدى. قازىرگى ۋاقىتتا باعدارلاما وپەراتورىنا 9 شارۋا قوجالىعى 350 توننا كولەمىندە 3,4 كلاستى بيدايدى وتكىزدى» دەيدى ول.
كاسىپورىندا تۇرعىندارعا ارنالعان كىشكەنە موشەكتەگى 5 جانە 10 كەلىلىك ۇننان بولەك ماكارون دا شىعارىلادى ەكەن.
«ماكارون ونىمدەرىن اۋدانداعى دۇكەندەر, شارۋا قوجالىقتارى مەن مەكتەپتەر ساتىپ الادى. وسكەمەندەگى «ارزان» سەكىلدى ءىرى ساۋدا دۇكەندەرىندە دە ساتىلادى. حالىق اراسىندا سۇرانىس جوعارى. جارمەڭكەگە دە شىعارامىز. تۇرعىندار وسى جەرگە وزدەرى كەلىپ ساتىپ الادى. ماكاروننىڭ 2 كەلىلىگى دە, 5 كەلىلىگى دە بار. باعاسى قولجەتىمدى» دەگەن نيكولاي پرىگوۆ الداعى ۋاقىتتا كاسىپورىننىڭ جانە اۋدانداعى اۋىل شارۋاشىلىعى وندىرۋشىلەرىنىڭ ونىمدەرىن ساتىلىمعا شىعارۋ ءۇشىن دۇكەن اشۋدى جوسپارلاپ وتىرعاندارىن جەتكىزدى.
شىعىس قازاقستان وبلىسى
گلۋبوكوە اۋدانى
پرەدگورنوە اۋىلى