ا. ءماميننىڭ توراعالىعىمەن وتكەن ۇكىمەت وتىرىسىندا پرەمەر-ءمينيستردىڭ ورىنباسارى ر. سكليار «اۋىل – ەل بەسىگى» جوباسىنىڭ ىسكە اسىرىلۋى تۋرالى باياندادى. بۇل تۋرالى primeminister.kz حابارلادى.
ر. سكلياردىڭ حابارلاۋىنشا, قازىرگى ۋاقىتتا 6 443 اۋىلدا 7,7 ملن ادام تۇرادى (ەل حالقىنىڭ 42%).
«بۇگىنگى كۇنى اۋىلدىق جەرلەردە بىرقاتار شەشىلمەگەن ماسەلەلەر بار. اۋىلدىڭ جارتىسىنان استامىندا كوشەلەردى جوندەۋ قاجەت. ينجەنەرلىك جەلىلەر توزعان. كوپتەگەن اۋىلداردا, ءبىلىم بەرۋ جانە دەنساۋلىق ساقتاۋ وبەكتىلەرى جوندەۋدى قاجەت ەتەدى. وسىعان بايلانىستى اۋىلدى دامىتۋ ءۇشىن كەشەندى ءتاسىل قولدانۋدى ۇسىنامىز», - دەدى ر. سكليار.
وسى ماقساتتا ءبىرىنشى كەزەكتە قولدانىستاعى مەملەكەتتىك باعدارلامالار مەن «اۋىل – ەل بەسىگى» جوباسى ەسەبىنەن اۋىل ينفراقۇرىلىمىن جاڭعىرتۋ جۇرگىزىلەتىن بولادى, سونىمەن بىرگە اگروونەركاسىپتىك كەشەندى دامىتۋ, «بيزنەستىڭ جول كارتاسى-2020», «ەڭبەك» جانە باسقا دا قولدانىستاعى باعدارلاما شەڭبەرىندە كاسىپكەرلىكتى قولداۋ جۇزەگە اسىرىلادى.
قازىرگى ۋاقىتتا دامۋ الەۋەتى بار 3 477 اۋىل ىرىكتەپ الىندى, ونىڭ ىشىندە – 1 150 تىرەكتى جانە 200 شەكارا ماڭىنداعى اۋىلدار ەنگىزىلگەن 2 327 سپۋتنيكتىك اۋىلدار. اتالعان اۋىلداردا 6,6 ملن ادام نەمەسە اۋىل حالقىنىڭ 85%-ى تۇرادى, ولاردى دامىتۋ باسىمدى تۇردە بولادى.
حالىق سانى ءوسۋىنىڭ, مال شارۋاشىلىعى مەن وسىمدىك شارۋاشىلىعىنىڭ جالپى قوسىلعان قۇننىڭ, حالىقتىڭ جۇمىسپەن قامتىلۋىنىڭ جىل سايىنعى ءوسۋ ديناميكاسى بار وسىنداي اۋىلدار ءىرى ەلدى مەكەندەرگە جاقىن ورنالاسقان.
«بۇل اۋىلدارداعى ماسەلەلەردى كەشەندى شەشۋ ءۇشىن ايتارلىقتاي قاراجات قاجەت. الدىن الا ەسەپتەۋلەر بويىنشا 900 ملرد تەڭگە قاجەت, بۇل رەتتە رەسپۋبليكالىق بيۋدجەتتەن 70% نەمەسە 630 ملرد تەڭگە, ال قالعان 30% نەمەسە 270 ملرد تەڭگە – جەرگىلىكتى بيۋدجەتتەن ءبولۋ ۇسىنىلادى. اتالعان قاراجاتتاردى 2027 جىلعا دەيىن ءبولۋ ۇسىنىلادى», - دەدى ر. سكليار.
2019 جىلى شامامەن 700 مىڭ ادام تۇراتىن 53 اۋىلدا 30 ملرد تەڭگە سوماعا 452 ينفراقۇرىلىمدىق جوبا ىسكە اسىرىلۋدا.
بۇلار الەۋمەتتىك (مەكتەپتەر, اۋرۋحانالار, مادەنيەت جانە سپورت نىساندارى) جانە ينجەنەرلىك ينفراقۇرىلىمداردى (جولدار, سۋ, ەلەكتر, جىلۋمەن قامتاماسىز ەتۋ جانە ت.ب.) جوندەۋ جانە قايتا جاڭارتۋ جونىندەگى جوبالار بولىپ تابىلادى. قاراجاتتار جوسپارلى تۇردە يگەرىلۋدە.
«سونداي-اق تۇڭعىش پرەزيدەنت - ەلباسىنىڭ «رۋحاني جاڭعىرۋ» باعدارلاماسى اياسىندا تۋعان اۋىلداردى اباتتاندىرۋ بويىنشا ءىرى كاسىپكەرلەردىڭ «كىشى وتانىنا» قامقورلىقپەن قاراۋ مەن مەتسەناتتىق جاساۋدىڭ جارقىن كورىنىسىنىڭ مىسالدارى بار», - دەدى ر. سكليار.
ينفراقۇرىلىمدى جاڭعىرتۋ بويىنشا ۇستىمىزدەگى جىلى وڭ ناتيجەلەرگە قول جەتكىزىلدى.
«بۇل جۇمىستىڭ باستاماسى عانا. باستالعان جۇمىستاردى ءبىز 2020 جىلى جالعاستىرامىز. ەلىمىزدىڭ بارلىق وڭىرلەرىندە اۋىل ينفراقۇرىلىمىن كەڭ اۋقىمدى جاڭعىرتۋ باستالادى. كوزدەلگەن 30 ملرد تەڭگەگە 2020 جىلى قوسىمشا 50 ملرد تەڭگە بولىنەتىن بولادى», - دەدى پرەمەر-ءمينيستردىڭ ورىنباسارى.
جالپى بولىنەتىن قاراجاتقا 250 اۋىلدا 1641 جوبانى ىسكە اسىرۋ جوسپارلانۋدا. اۋىل حالقىن جۇمىسپەن قامتۋدى قامتاماسىز ەتۋ جانە ىسكە اسىرىلىپ جاتقان جوبالارعا جاڭا داعدى الۋ ماقساتىندا, اۋىل جاستارى تارتىلاتىن بولادى. جۇرگىزىلىپ جاتقان ينفراقۇرىلىمدى جاڭعىرتۋ اۋىل ەكونوميكاسىن دامىتۋعا جاڭا سەرپىن بەرەدى.
ۇسىنىلعان شارالاردى ءتيىمدى ىسكە اسىرۋ ءۇشىن رەسپۋبليكالىق جول كارتاسىنىڭ جوباسى ازىرلەندى. تىرەك جانە سپۋتنيكتىك اۋىلداردى جىلدار بويىنشا, 2027 جىلعا دەيىن دامىتۋ كەستەسىن جاساۋ جوسپارلانعان. «اۋىل – ەل بەسىگى» جانە باسقا دا مەملەكەتتىك باعدارلامالار شەڭبەرىندە ءاربىر اۋىلدى قارجىلاندىرۋ كولەمى مەن كوزدەرىن انىقتاۋ قاجەت. اۋىل ەكونوميكاسىن دامىتۋ كارتاسىن ازىرلەپ, ءتيىستى جوبالىق قۇجاتتامانى دايىنداۋ كەرەك.
«2027 جىلعا قاراي بارلىعى اوك دامىتۋ, «بجك-2020», «ەڭبەك», جەرگىلىكتى ماڭىزى بار اۆتوجولداردى سالۋ جانە جوندەۋ باعدارلامالارىمەن بىرگە قارجىلاندىرۋ 2 ترلن تەڭگەدەن اساتانى بولادى», - دەدى ر. سكليار.
«اۋىل – ەل بەسىگى» جوباسىن ىسكە اسىرۋ 7 جىل ىشىندە 7 ملن اۋىل تۇرعىندارىنىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى. 7 مىڭ كم استام كەنتىشىلىك كوشەلەر سالىنىپ, جوندەۋدەن وتكىزىلەدى. بارلىق اۋىل حالقى ساپالى اۋىز سۋمەن قامتىلاتىن بولادى. الەۋمەتتىك نىسانداردى جاڭعىرتۋ بويىنشا كەڭ اۋقىمدى جۇمىستار جۇرگىزىلەدى.
جالپى, بارلىق شارالار كەشەنى اۋىلداردى ودان ءارى سەرپىندى دامىتۋدى قامتاماسىز ەتەدى, بۇل ءوز كەزەگىندە ەل ەكونوميكاسىنا وڭ اسەرىن تيگىزەدى.