قازاقستان رەسپۋبليكاسىنىڭ سىرتقى ىستەر مينيسترلىگىندە «قازاقستان الەم بالالارىنىڭ كوزىمەن» ءى حالىقارالىق سۋرەت بايقاۋىنىڭ جەڭىمپازدارىن ماراپاتتاۋ ءراسىمى ءوتتى. ءىس-شاراعا قازاقستاندا اككرەديتتەلگەن ديپلوماتيالىق ميسسيالار باسشىلارى, قازاقستاننىڭ جانە شەتەل مادەنيەت جانە ونەر قايراتكەرلەرى, الىس-جاقىن شەتەلدەن كەلگەن جاس تالانتتار, باق وكىلدەرى قاتىستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
«قازاقستان الەم بالالارىنىڭ كوزىمەن» حالىقارالىق سۋرەت بايقاۋى ەلىمىزدە العاش رەت وتكىزىلىپ وتىر. جوبانىڭ ماقساتى – الەم بالالارىن قازاقستانمەن, ونىڭ تاريحىمەن, مادەنيەتىمەن, گەوگرافياسىمەن تانىستىرۋ, بالالاردىڭ جەكە جانە شىعارماشىلىق الەۋەتىن اشۋعا جاعداي جاساۋ.
بايقاۋعا 7-16 جاس ارالىعىنداعى ازەربايجاننىڭ, بەلارۋستىڭ, جاپونيانىڭ, يتاليانىڭ, قازاقستاننىڭ, رەسەيدىڭ, تۇركيانىڭ جانە باسقا دا ەلدەردىڭ بالعىن سۋرەتشىلەرى قاتىستى.
بايقاۋعا قاتىسۋ ءۇشىن بالالارعا «قازاقستان حالقىنىڭ ەرتەگىلەرى مەن اڭىزدارى», «قازاقستان تاريحى», «قازاقستان كورىنىستەرى», «قازاقستاننىڭ كيەلى جەرلەرى», «حالىق مەيرامدارى» جانە «قازاقستان حالقىنىڭ سالت-داستۇرلەرى» سياقتى تاقىرىپتار بويىنشا سۋرەت جولداۋ ۇسىنىلدى.
بايقاۋ قورىتىندىسى بويىنشا جاس سۋرەتشىلەردىڭ 70 سۋرەتىنەن تۇراتىن سۋرەت كورمەسى ۇيىمداستىرىلدى.
راسىمگە قاتىسۋشىلارعا ارناپ №2 بالالار مۋزىكا مەكتەبىنىڭ جاس دومبىراشىلارى مەن سكريپكاشىلارى «كوڭىل اشار» جانە «Rolf Lovland - Elan» كومپوزيتسيالارىن ورىندادى. بايقاۋ جەڭىمپازدارى سىيلىقتارمەن جانە العىس حاتتارمەن ماراپاتتالدى.
ماراپاتتاۋ راسىمىندە ءسوز سويلەگەن سىرتقى ىستەر ءمينيسترىنىڭ ورىنباسارى رومان ۆاسيلەنكو «قازاقستان الەم بالالارىنىڭ كوزىمەن» بايقاۋىنىڭ ەلىمىزدى تانىمال ەتۋ ىسىندە جاسالعان تاعى ءبىر قادام ەكەندىگىن اتاپ ءوتتى. بايقاۋعا بالالاردىڭ ءتۇرلى ەلدەردەن قاتىسۋى جاس تالانتتاردىڭ قازاقستانعا دەگەن زور قىزىعۋشىلىعىنىڭ بەلگىسى. ول بايقاۋدى جىل سايىن وتكىزۋ داستۇرگە اينالاتىنىن جانە وعان قاتىسۋشىلاردىڭ اياسى كەڭەيە تۇسەتىنىنە ۇمىتتەنەتىنىن جەتكىزدى. ر.ۆاسيلەنكو سىرتقى ىستەر مينيسترلىگىنىڭ اتىنان راسىمگە قاتىسقان بالالاردى جەڭىستەرىمەن قۇتتىقتاپ, ولارعا جاڭا شىعارماشىلىق ساتتىلىكتەر مەن جەتىستىكتەر تىلەدى.
راسىمدە سونداي-اق بايقاۋ قازىلار القاسىنىڭ توراعاسى, ەڭبەك سىڭىرگەن مادەنيەت قايراتكەرى, قازاقستان رەسپۋبليكاسىنىڭ سۋرەتشىلەر وداعىنىڭ مۇشەسى تىلەۋجان باتانوۆ تا قۇتتىقتاۋ ءسوز سويلەدى.
بايقاۋدىڭ ۇيىمداستىرۋشىلارى – نۇر-سۇلتان قالاسىنىڭ بالالار كوركەمسۋرەت مەكتەبى-يۋنەسكو كلۋبى, نۇر-سۇلتان قالاسى ءبىلىم باسقارماسى, «قۇلانشى» قازىرگى زامان ونەرى ورتالىعى, «بايتا» جاس تالانتتاردىڭ شىعارماشىلىق باستامالارىن قولداۋ قايىرىمدىلىق قورى جانە قازاقستان رەسپۋبليكاسىنداعى پەداگوگ-سۋرەتشىلەردىڭ حالىقارالىق وداعىنىڭ وكىلدىگى.