«كەشە سانكت-پەتەربۋرگ ۇكىمەتىنىڭ مۇشەسى – ۇلتارالىق قاتىناستار جانە كوشى-قون ساياساتىن ىسكە اسىرۋ كوميتەتىنىڭ توراعاسى ولەگ كاپيتانوۆ باستاعان رەسەيلىك دەلەگاتسيا مادەني-ىسكەرلىك ميسسيامەن الماتىعا كەلدى. دەلەگاتسيانى الماتى اكىمى باقىتجان ساعىنتاەۆ قابىلدادى» دەپ حابارلادى الماتى قالاسى اكىمدىگىنىڭ ءباسپاسوز قىزمەتى.
ول ولەگ كاپيتانوۆپەن ەكى قالا اراسىنداعى قارىم-قاتىناستى دامىتۋ پەرسپەكتيۆالارىن تالقىلادى. تاراپتار دەنساۋلىق ساقتاۋ, ءبىلىم, تۋريزم, مادەنيەت جانە شوب سالالارىندا ىنتىماقتاستىقتىڭ «جول كارتاسىن» ازىرلەۋگە كەلىستى.
سونىمەن قاتار دەلەگاتسيا «الماتى-سانكت پەتەربۋرگ: جاڭا مۇمكىندىكتەر اۋماعى» كونفەرەنتسياسىنا قاتىستى.
الماتى قالاسى اكىمىنىڭ ورىنباسارى ەرجان باباقۇماروۆ قۇتتىقتاۋ ءسوزىن سويلەدى. ول مادەني شارانىڭ الماتى مەن سانكت-پەتەربۋرگ اراسىنداعى مادەني قارىم-قاتىناستى دامىتۋعا وڭ ىقپال ەتەتىنىن اتاپ ءوتتى.
«قازاقستان مەن رەسەي اراسىن ماڭگىلىك دوستىق پەن باۋىرمالدىقتىڭ كەلىسىمشارتى بويىنشا ەجەلگى تاريحي ايرىقشا بايلانىس بىرىكتىرەدى. مەن ءبىزدىڭ ءوزارا قارىم-قاتىناسىمىزدى حالىقارالىق قاتىناستاردىڭ ۇزدىك ۇلگىسى رەتىندە باعالاۋعا بولادى دەپ ويلايمىن. الماتى مەن سانكت-پەتەربۋرگ كورشىلىك قارىم-قاتىناستى نىعايتۋدا ۇلكەن ءرول اتقارادى. قوس قالا تاريحي تۇرعىدا بىرىنە-ءبىرى ۇقساس جانە شىن مانىندە ءوز ەلدەرىنىڭ مادەني جانە ىسكەرلىك ورتالىقتارى بولىپ سانالادى. ايتار بولساق, الماتى مەن سانكت-پەتەربۋرگ اراسىنداعى باۋىرمالدىق قاتىناسقا 20 جىلدان استام ۋاقىت ءوتتى. ءبىز بۇگىن ىنتىماقتاستىقتى ودان ءارى جالعاستىرۋعا جاڭا سەرپىن بەرەتىن بولامىز», – دەدى كونفەرەنتسياعا قاتىسۋشىلارعا ارناعان قۇتتىقتاۋ سوزىندە الماتى قالاسى اكىمىنىڭ ورىنباسارى ەرجان باباقۇماروۆ.
الماتىداعى رەسەي فەدەراتسياسىنىڭ باس كونسۋلى ەۆگەني بوبروۆ ە.باباقۇماروۆتىڭ سوزدەرىمەن تولىقتاي كەلىستى جانە قازاقستان مەن رەسەي بىرلەسكەن جۇمىستى ودان ءارى جانداندىرۋلارى ءتيىس دەپ تولىقتىردى.
«مەن جاڭا عانا ايتىلعان ءسوزدى تولىق قۇپتايمىن, ءبىزدىڭ ەكى مەملەكەتىمىز تەك ستراتەگيالىق وداقتاستار عانا ەمەس, سونىمەن قاتار تەڭ تۇرعىداعى سەرىكتەستەر. راسىندا دا ءبىزدىڭ ورتاق ءارى وتە باي تاريحىمىز بار. ءبىزدىڭ باستى مىندەتىمىز – اتا-بابالارىمىزدان قالعان بارلىق قۇندىلىقتاردى ساقتاپ قانا قويماي, ولاردى بايىتۋ جانە ءوزارا بايلانىسىمىزدى جاقسارتۋ», – دەدى الماتىداعى رەسەي فەدەراتسياسىنىڭ باس كونسۋلى ەۆگەني بوبروۆ.
ول ءوزىنىڭ سوزىندە الماتى مەن سانكت-پەتەربۋرگ اراسىندا ۇقساستىقتىڭ كوپ ەكەنىن, ال رەسەي مەن الماتى اراسىنداعى ىنتىماقتاستىقتىڭ وتە تىعىزدىعىن اتاپ ءوتتى.
2018 جىلى رەسەي مەن الماتى اراسىنداعى تاۋار اينالىمى 4,7 ملرد دوللاردى قۇراعان.