پرەمەر-ءمينيستردىڭ ورىنباسارى بەردىبەك ساپارباەۆ باستاعان ۇكىمەتتىڭ جۇمىس توبى مەملەكەت باسشىسىنىڭ تاپسىرماسى اياسىندا اقتوبە وبلىسىنا ات باسىن تىرەدى.
قۇرامىندا ءبىلىم جانە عىلىم ءمينيسترى اسحات ايماعامبەتوۆ, ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆ, دەنساۋلىق ساقتاۋ مينيسترلىگىنىڭ جاۋاپتى حاتشىسى بوتاگوز جاقسىلىقوۆا, مادەنيەت جانە سپورت ءمينيسترىنىڭ ورىنباسارى ەلدوس رامازانوۆ, اقپارات جانە قوعامدىق دامۋ ءمينيسترىنىڭ ورىنباسارى دانيار ەسين ەنگەن جۇمىس توبى ءوڭىر تۇرعىندارىمەن كەزدەسۋدە ءبىلىم سالاسىنا ەرەكشە توقتالىپ, «ەل ءۇمىتى» جوباسى تۋرالى ءتۇسىندىردى.
ب.ساپارباەۆتىڭ ايتۋىنشا, مەملەكەت باسشىسىنىڭ تاپسىرماسىنا سايكەس قالا مەن اۋىل مەكتەپتەرىنىڭ ءبىلىم ساپاسىن تەڭەستىرۋ ماقساتىندا الدا اۋقىمدى جۇمىس اتقارىلماق. بۇل ءۇشىن اۋىلداعى مەكتەپتەردىڭ ماتەريالدىق بازاسىن نىعايتۋ قاجەت. جالپى, قازىر ەل اۋماعىندا 32 اپاتتىق جاعدايداعى, 111 ءۇش اۋىسىمدى مەكتەپ بار. الداعى ءۇش جىلدا بۇل ءبىلىم وشاقتارى تولىعىمەن جويىلۋى ءتيىس. سونىمەن قاتار اۋىل مەكتەپتەرىندەگى مۇعالىمدەردىڭ دە ساپاسىن ارتتىرعان ءجون. ۇستازداردىڭ جاۋاپكەرشىلىگىن ارتتىرۋ قاجەت. پرەمەر-ءمينيستردىڭ ورىنباسارى بەردىبەك ساپارباەۆ ديرەكتورلارعا مەكتەپ مۇعالىمدەرىنە وسى تالاپتى جەتكىزۋدى تاپسىردى.
«مەملەكەتتىڭ جاساپ جاتقان كومەگىنە, قولداۋىنا قايتارىم بولۋى ءتيىس. ءبىلىم ساپاسىن ارتتىرامىز. بالالاردىڭ ءبىلىمى زامان تالابىنا ساي بولۋى كەرەك. حالىقارالىق دەڭگەيگە جەتىپ, مەكتەپ بىتىرگەن وقۋشى الەمنىڭ مىقتى ۋنيۆەرسيتەتتەرىندە ءبىلىم الۋى ءتيىس. «بولاشاق» باعدارلاماسىمەن دە ءبىلىم الىپ جاتىر. ۇستاز وقۋ باعدارلاماسىمەن عانا شەكتەلسە, ودان تاربيە العان بالا الىسقا بارمايدى. قازىرگى بالالاردىڭ دەڭگەيى, ءورىسى باسقا. كەشىرىم سۇرايمىن, كەيبىر بالالار مۇعالىمنەن ارتىق بىلەدى. بالا تەلەفوننان, ۇيىندەگى ينتەرنەتتەن مول مالىمەت الادى», دەدى ۇكىمەت باسشىسىنىڭ ورىنباسارى اقتوبەدەگى پەداگوگيكالىق قاۋىممەن كەزدەسۋىندە.
وبلىس, قالا مەن اۋدانداعى ءبىلىم باسقارماسى مەن بولىمدەرىنىڭ باسشىلارى, مەكتەپ ديرەكتورلارى ءبىلىم سالاسىنداعى وزگەرىستەردى دۇرىس تۇسىندىرمەگەن سوڭ ەلىمىزدە پەتيتسيا دا جازىلىپ جاتىر دەگەن ۇكىمەت باسشىسىنىڭ ورىنباسارى وسى ماسەلەگە ەرەكشە توقتالدى. «كەيىنگى كەزدە جامان ادەت شىقتى. بىردەن پرەزيدەنتكە حات جازادى, كوشەگە شىعادى. بۇل بولمايدى. مەملەكەتىمىزدىڭ ەڭ ساۋاتتى ازاماتى – سىزدەر. سىزدەرگە ءبارى بايلانىستى. جالپى, قوعام الدىندا جاۋاپكەرشىلىك, جاناشىرلىق بولۋى ءتيىس», دەدى ب.ساپارباەۆ.
سونداي-اق «ەل ءۇمىتى» جوباسىنا توقتالعان ۆيتسە-پرەمەر: «دارىندى بالالاردى قولداۋ مەكتەپتەرى بار. تۇڭعىش پرەزيدەنت قورىمەن بىرگە «ەل ءۇمىتى» جوباسى دايىندالىپ جاتىر. كەم دەگەندە 1 مىڭ دارىندى بالانى تاڭداپ الىپ, جاعداي جاسايمىز. ياعني, مەملەكەتتىك گرانتپەن وقىپ, جۇمىسقا ورنالاسۋىنا مۇمكىندىك تۋادى. بۇل جوبا رەسپۋبليكا بويىنشا ءبىرىنشى اقتوبەدە باستاۋ الادى», دەدى.
راسىندا, دارىندى جاستاردى ۇلىقتايتىن اقتوبەدەگى مارافونعا بەس وبلىستىڭ ۇزدىكتەرى جينالعان ەكەن. مارافونعا قاتىسۋشىلار رەتىندە بيزنەس, مادەنيەت, سپورت نەمەسە مەديتسينا سالاسىندا بەلگىلى ءبىر جەتىستىكتەرگە جەتكەن جاس بۋىن وكىلدەرى تارتىلادى. ولار وزدەرىنىڭ ماماندىق تاڭداۋى, ءومىر جولى, قالىپتاسۋى مەن دامۋى تۋرالى اڭگىمەلەدى.
ء«اربىر مەملەكەتتىڭ بولاشاعى, دامۋى ونىڭ ءبىلىمدى, ويشىل جاستارىنا بايلانىستى. قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى ء«بىز دامىعان 50 ەلدىڭ قاتارىنا كىردىك, ماقساتىمىز 30 ەلدىڭ قاتارىنا كىرۋ» دەپ ايتقان بولاتىن. ول ءۇشىن جاسامپاز, ويشىل جاستار بولۋى كەرەك. ويتكەنى وسى زاماندا باسەكەلەستىك تەك ەكونوميكادا ەمەس, ادامدار اراسىندا دا بولۋى ءتيىس. قاي مەملەكەتتە العىر جاستار بولسا سول ەل باسەكەلەستىككە توتەپ بەرەدى. قازاقستاندا جاستار ءۇشىن بارلىق جاعداي جاسالىپ جاتىر. ءار وڭىردە نازارباەۆ زياتكەرلىك مەكتەبى بار. نازارباەۆ ۋنيۆەرسيتەتى دە دارىندى بالالارعا ارنالعان. قازىرگى تاڭدا قازاقستاندا 30 مىڭعا جۋىق دارىندى بالا بار, 100-گە جۋىق دارىندى بالالارعا ارنالعان مەكتەپتەر جۇمىس ىستەيدى. بيىل قازاقستاننىڭ مىڭعا جۋىق جاسى كوپتەگەن حالىقارالىق وليمپيادادا, كونكۋرستاردا جەڭىمپاز اتاندى. ونىڭ ىشىندە 300-گە جۋىعى التىن مەدال الدى. ماتەماتيكا, حيميا, بيولوگيا, فيزيكا سالاسى باسىم», دەدى اتالعان شاراعا ارنايى قاتىسقان پرەمەر-ءمينيستردىڭ ورىنباسارى بەردىبەك ساپارباەۆ.
ەلىمىزدە العاش رەت وڭىرلىك دارىن ورتالىعىن اقتوبە قالاسىندا اشۋ جوسپارلانىپ وتىر. ورتالىق كەلەر جىلى ىسكە قوسىلادى.
«بۇگىنگى مارافون جاس يننوۆاتورلاردى, ماتەماتيك, فيزيك, حيميك جانە بيزنەس, سپورت, مادەنيەت سالاسىنداعى جاس مامانداردى قولداۋعا باعىتتالعان. الداعى ۋاقىتتا ەلىمىزدە جاڭا جوبالار قولعا الىنادى. اۋىل بالالارىنا, دارىندى وقۋشىلارعا, ستۋدەنتتەرگە جاعداي جاسالادى. ماسەلەن, اۋىل وقۋشىلارى ءۇشىن جىل سايىن ارنايى ينتەللەكتۋالدىق كونكۋرس وتكىزىپ, 1 مىڭ بالا ىرىكتەلەدى. بۇگىن ءبىرىنشى قادام. نەگىزگى جۇمىس ءالى الدا», دەدى «قازاقستان رەسپۋبليكاسىنىڭ تۇڭعىش پرەزيدەنتى – ەلباسى» قورىنىڭ اتقارۋشى ديرەكتورى اسەت يسەكەشوۆ.
ايتا كەتەلىك, «Eل ءۇمىتى» – دارىندى جاستار مەن جاس كوشباسشىلاردى قولداۋعا, سونداي-اق وسكەلەڭ ۇرپاقتىڭ ازاماتتىق بەلسەندىلىگىن ارتتىرۋعا باعىتتالعان رەسپۋبليكالىق مارافون. جوبانىڭ ماقساتى – جاس تالانتتاردى, نوۆاتورلاردى, بىلىكتى ماماندار مەن كاسىپكەرلەردى ناسيحاتتاۋ.
مارافونعا اقتوبە, اتىراۋ, ماڭعىستاۋ, باتىس قازاقستان جانە قىزىلوردا وبلىستارىنىڭ مۋزىكالىق-شىعارماشىلىق ۇجىمدارى, سونداي-اق «كتا» جانە «نازار اۋدار» ءازىل-سىقاق كوماندالار قاتىسۋدا.
اقتوبە وبلىسى