تالدىقورعان قالاسىنىڭ 27 مەكتەبىندە فۋتبول ويىنىنا باۋليتىن تەگىن ۇيىرمەلەر اشىلدى, ولارعا الەۋمەتتىك جاعىنان از قامتىلعان وتباسىلاردىڭ بالالارى تارتىلادى.
تالدىقورعاندا بالالار اراسىندا بۇقارالىق سپورتتى دامىتۋدىڭ بىرەگەي الەۋمەتتىك جوباسى قولعا الىندى. فۋتبول مەكتەبى جوباسى Olimp Kazakhstan بۋكمەكەرلىك كەڭسەسىنىڭ تىكەلەي قولداۋىمەن جۇزەگە اسىرىلۋدا. كاسىبي ماماندار ازىرلەگەن ارنايى باعدارلاما بويىنشا كوپ بالالى جانە تۇرمىسى تومەن وتباسىلاردان شىققان 700 بالا ورتا مەكتەپتەردەن اشىلعان فۋتبول ۇيىرمەلەرىنە اقىسىز نەگىزدە قاتىسادى. ولارعا قاجەتتى قۇرال-جابدىقتار مەن سپورتتىق كەرەك-جاراقتار ساتىپ الىندى. قازىرگى تاڭدا دەنە شىنىقتىرۋ پاندەرى مۇعالىمدەرىنىڭ دايىندىعى ءجۇرىپ جاتىر. ەگەر پيلوتتىق جوبا ءساتتى جۇزەگە اساتىن بولسا, بۋكمەكەرلىك كەڭسە ونى ەلىمىزدىڭ باسقا ايماقتارىنا دا ەنگىزۋدى جوسپارلاپ وتىر.
جوبانىڭ باستى ماقساتى – از قامتاماسىز ەتىلگەن وتباسىلاردىڭ بالالارىنا وزدەرىنىڭ ارماندارىن جۇزەگە اسىرۋعا كومەكتەسۋ جانە فۋتبول ويناۋعا بارلىق جاعدايدى جاساۋ. «رۋحاني جانگىرۋ» باعدارلاماسىن جۇزەگە اسىرۋ اياسىندا ازىرلەنگەن جوبانىڭ العاشقى ناتيجەلەرى كوڭىل قۋانتادى.
ايتا كەتەرلىگى, سپورتسۇيەر بالالار ۇيىرمەلەردە توپ-توپقا ءبولىنىپ جاتتىعادى جانە ارقايسىسىندا 12 ادامنان تۇراتىن ءوز فۋتبول كومانداسى بولادى. ماماندار توپتاعى بالالار سانىنىڭ ازدىعى جاتتىقتىرۋشىعا ويىنشىلاردىڭ جەكە قاسيەتتەرىنە كوپ كوڭىل بولۋگە, كوماندالىق رۋحتى وياتۋعا مۇمكىندىك بەرەتىنىن ايتادى.
«فۋتبول – بارلىق الەۋمەتتىك سالالارعا قول جەتىمدى سپورت تۇرلەرىنىڭ ءبىرى. سوندىقتان دا كوبىنە تۇرمىسى تومەن وتباسىلاردان شىققان جەتكىنشەكتەر فۋتبولدا ۇلكەن جەتىستىكتەرگە جەتىپ جاتادى. بۇعان الەمدەگى ەڭ مىقتى فۋتبول جۇلدىزدارىن مىسالعا كەلتىرە الامىن. ماسەلەن, رونالدۋ, ريۆالدو, سۋارەس, زيدان, سالاح جانە ت.ب. مىسىرلىق فۋتبولشىنىڭ ءومىر تاريحىنان ءبىر ءىرى برەند ۇيىمداستىرعان الەۋمەتتىك جوبالاردىڭ بىرىندە جارقىراي كورىنگەنى تۋرالى دەرەكتى ءبارىڭىز بىلەسىزدەر. مۇحاممەد سالاح 14 جاسىندا ەگيپەت ايماعىنداعى جارىستاردىڭ بىرىندە كەرەمەت ناتيجە كورسەتكەن, سودان بەرى ول بارلىق فۋتبول رەكوردىن جاڭارتۋدا. ءبىز تالدىقورعاندىق بالالار اراسىندا دا الەمدىك دەڭگەيدەگى فۋتبولشىلارمەن دەڭگەيلەس «زيداندار» مەن «سالاحتار» بار ەكەنىنە سەنىمدىمىز», - دەيدى «وليمپ» بۋكمەكەرلىك كەڭسەسىنىڭ اسەل ءالىمجانوۆا.
بيىلعى ءبىرىنشى جارتىجىلدىقتا كومپانيا قايىرىمدىلىق جانە الەۋمەتتىك باستامالارعا 37 ميلليون تەڭگەدەن استام قاراجات بولگەنىن ايتا كەتۋ كەرەك. «وليمپ» بك وسى ۋاقىتقا دەيىن بالالاردىڭ شىعارماشىلىعىن, قابىلەتىن دامىتۋعا باعىتتالعان الەۋمەتتىك جوبالارعا بارىنشا قولداۋ كورسەتىپ, ۇلەس قوستى.
«دەنە شىنىقتىرۋ ءپانىنىڭ مۇعالىمدەرى «جەتىسۋ» فۋتبول ورتالىعىنىڭ كونسۋلتاتيۆتىك قولداۋىمەن سەمينار ساباقتارىنا قاتىسادى. ءبىز ولارعا ارنايى باعدارلاما ۇسىنامىز, ولار وقۋىن جالعاستىرۋدا. ياعني, جاتتىقتىرۋشىلار اپتالىق جوسپار-كونسپەكت الىپ, سول بويىنشا اپتا بويى جۇمىس ىستەيدى. بۇگىن ءبىز مەكتەپتەرگە بارلىق سپورتتىق قۇرال-جابدىقتار مەن 700 فۋتبول ويىنىنىڭ فورمالارىن تاراتتىق. جوبا تەك سپورتتىق قۇرال-جابدىقتار تاراتۋمەن جانە جاتتىعۋلاردى ۇيىمداستىرۋمەن شەكتەلمەيدى. فۋتبولدان تۋرنيرلەر وتكىزىلىپ, بالالاردىڭ ءتۇرلى ەكسكۋرسيالارعا, سونىڭ ىشىندە حالىقارالىق جارىستارعا قاتىسۋى جوسپارلانعان. ەڭ دارىندى جاسوسپىرىمدەردى ەۋروپانىڭ جەتەكشى فۋتبول كلۋبتارى – «چەلسي», «بارسەلونا», «ليسسابون سپورتينگ» كورۋگە جىبەرۋدى دە ۇيىمداستىراتىن بولامىز», - دەپ تولىقتىردى جوبا كۋراتورى ءبىرجان بايعاليەۆ.
تالدىقورعان قالاسى اكىمىنىڭ ورىنباسارى ساۋلە ارزانبەكوۆانىڭ پىكىرىنشە, بۇگىنگى بالالار وتە ءالجۋاز, ۇيدەن شىقپاۋعا ابدەن ۇيرەنگەن, گادجەتتەرگە الاڭداپ, ۆيرتۋالدى الەمدە ءومىر ءسۇرىپ جاتىر, ولاردى ەكرانداردان الاستاپ, كوشەگە شىعارۋ قيىن. «قازىرگى جەتكىنشەكتەردە ءبىر-بىرىنە دەگەن جاناشىرلىق كەم, ءتىپتى ءبىر-بىرىمەن تانىسپايدى دا. سوندىقتان ءبىز وبلىستا سپورتتى بەلسەندى دامىتۋ باعىتىندا جۇمىس ىستەپ جاتىرمىز. بۇل باستاما سپورتپەن بەلسەندى اينالىساتىن 700 بالانى قامتىدى. ءبىز «وليمپ» بك مەن ۆولەيبول, باسكەتبول جانە باسقا دا سپورت تۇرلەرى بويىنشا ودان ءارى ىنتىماقتاستىق ورناتامىز دەپ ۇمىتتەنەمىز», - دەيدى ول.