تاراز قالاسى پوليتسيا باسقارماسىنىڭ جەدەل باسقارۋ ورتالىعىنا مۇگەدەك بالالاردى وڭالتۋمەن اينالىساتىن «اسار» قوعامدىق بىرلەستىگىنىڭ اۋماعىنا تۇنگى ساعات ەكى شاماسىندا قاراقشىلىق شابۋىل جاسالعانى تۋرالى حابارلاما كەلىپ ءتۇستى.
بەتپەردە كيگەن ەكى بەلگىسىز تۇلعا تارازداعى وڭالتۋ ورتالىعىنان ەكى باس جىلقىنى ۇرلاپ كەتكەن. جىلقىلاردى دامۋ مۇمكىندىكتەرى شەكتەۋلى بالالارعا ارنالعان يپپوتەراپيا ەمدەۋ كۋرستارىن وتكىزۋ كەزىندە قوعامدىق بىرلەستىك ماماندارى پايدالانعان.
جامبىلدىق پوليتسەيلەردىڭ الدىندا قىلمىسكەرلەردىڭ زاتتاي دالەلدەمەلەردى جويىپ, ياعني جىلقىلاردى ەتكە سويۋىنا نەمەسە باسقا وڭىرلەرگە ساتۋىنا جول بەرمەۋ ءۇشىن جانۋارلاردى تەز تابۋ مىندەتى تۇردى.
– پوليتسيا قىزمەتكەرلەرىنىڭ كاسىبي جەدەل-ىزدەستىرۋ شارالارىنىڭ ناتيجەسىندە ءبىر تاۋلىك ىشىندە اۋىر قىلمىس جاساعان كۇدىكتىلەر انىقتالىپ, ۇستالدى, جىلقىلار وڭالتۋ ورتالىعىنا قايتارىلدى, – دەدى جامبىل وبلىسى پوليتسيا دەپارتامەنتى باستىعىنىڭ ورىنباسارى, پوليتسيا پولكوۆنيگى نۇرجان قالمەتوۆ.
تاراز قالاسىنىڭ 22 جانە 23 جاستاعى ەكى تۇرعىنى كىنالارىن مويىنداپ, ۋاقىتشا ۇستاۋ يزولياتورىنا قاماۋعا الىندى. اتالعان دەرەك بويىنشا قىلمىستىق كودەكستىڭ 192-بابىنىڭ 2-بولىگى بويىنشا سوتقا دەيىنگى تەرگەۋ امالدارى باستالدى (الدىن الا ءسوز بايلاسۋ ارقىلى جاساعان قاراقشىلىق).
«اسار» قوعامدىق بىرلەستىگى توراعاسىنىڭ ورىنباسارى ايگەرىم داۋلەتباەۆا قىلمىستى جەدەل, قىسقا مەرزىمدە اشقانى ءۇشىن پوليتسيا باسشىلىعى مەن قىزمەتكەرلەرىنە ءوز العىسىن ءبىلدىردى. ەڭ باستىسى, بالالار سونشالىقتى ۇيرەنگەن جىلقىلار قايتارىلىپ, ال يپپوتەراپيا ساباقتارى جالعاساتىن بولادى.