پرەمەر-مينيستر اسقار ءماميننىڭ توراعالىعىمەن جانە پارلامەنت ءماجىلىسىنىڭ توراعاسى ن. نىعماتۋليننىڭ قاتىسۋىمەن وتكەن جاڭعىرتۋ جونىندەگى ۇلتتىق كوميسسيانىڭ وتىرىسىندا پرەزيدەنتتىڭ 2019 جىلعى 2 قىركۇيەكتەگى جولداۋىن ىسكە اسىرۋ بويىنشا جالپىۇلتتىق ءىس-شارالار جوسپارىن ورىنداۋ ماسەلەلەرى قارالدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
«جاڭعىرتۋ جونىندەگى ۇلتتىق كوميسسيا جۇمىسى ەلباسى نۇرسۇلتان نازارباەۆتىڭ ەرەكشە باقىلاۋىندا. پرەزيدەنت قاسىم-جومارت توقاەۆ ءوز جولداۋىندا كوميسسيا جۇمىسىن جاڭعىرتۋدى تاپسىردى. وتكەن وتىرىستا ءبىز كوميسسيانىڭ 2019-2020 جىلدارعا ارنالعان جۇمىس جوسپارىن جاسادىق, قازىر ول پرەزيدەنتپەن كەلىسىلدى», — دەدى ا. مامين.
ازاماتتاردىڭ جۇگىنۋلەرىنە قاتىستى جۇمىستاردىڭ تيىمدىلىگىن ارتتىرۋ بويىنشا اتقارىلىپ جاتقان جۇمىستار تۋرالى باس پروكۋروردىڭ ورىنباسارى م. احمەتجانوۆ باياندادى.
باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتى «ە-وتىنىشتەر» ات-جۇيەسىن قۇرۋ بويىنشا جۇمىستاردى جۇرگىزىپ جاتىر, بۇل جۇيەنى 2020 جىلدان باستاپ پيلوتتىق رەجيمدە ىسكە قوسۋ كوزدەلگەن. جوبا ءوتىنىم بەرۋشىلەردىڭ بىرىڭعاي دەرەكتەر بازاسىن قۇرۋدى قاراستىرادى (جسن جانە بجن ارقىلى), وندا ولاردىڭ سۋبەكتىلەرگە وتىنىشتەرىنىڭ بارلىق جازبالارى ساقتالاتىن بولادى. ءبىر مەزەتتە وتىنىشتەر ساپاسىن باعالاۋ سەرۆيسى ەنگىزىلەدى.
تەمىر جول تاسىمالى سالاسىندا تاريف ءتۇزۋدىڭ اشىقتىعىن ارتتىرۋ جانە جەتىلدىرۋ, تۇتىنۋشىلاردىڭ قۇقىقتارىن قورعاۋ ماسەلەسى بويىنشا يندۋستريا جانە ينفراقۇرىلىمدىق دامۋ ۆيتسە-ءمينيسترى ا. ەرجانوۆ ءتيىستى زاڭ جوباسى ازىرلەنىپ جاتقانىن جەتكىزدى. اتاپ ايتقاندا, جولاۋشىلار تاسىمالىن سۋبسيديالاۋدىڭ اشىق جۇيەسىن قۇرۋ, سونداي-اق جاسىرىن ترانزيت سحەمالارىن پايدالانۋدى بولدىرماۋ, كىرمە جول باعىتتارى جولدارىنىڭ قىزمەتتەرىن تۇتىنۋشىلاردىڭ قۇقىقتارىن قورعاۋ قاراستىرىلادى.
Cونىمەن قاتار كوميسسيا ازاماتتاردىڭ قارجى ۇيىمدارىنا شەكتەن تىس بەرەشەك بولۋىنىڭ الدىن الۋ شارالارىن, مەملەكەتتىك اتاۋلى الەۋمەتتىك كومەك كورسەتۋ تەتىكتەرىن جەتىلدىرۋدى, زەينەتاقى جۇيەسىن جەتىلدىرۋ بويىنشا اتقارىلىپ جاتقان جۇمىستاردى جانە باسقا دا ماسەلەلەردى قاراستىردى.
«مەملەكەت باسشىسى ءوز جولداۋىندا ءتيىمدى قوعامدىق ديالوگ پەن ادامداردىڭ قاجەتتىلىكتەرىنە شۇعىل ءۇن قاتۋ مەملەكەتتىك ورگانداردىڭ جۇمىسىنداعى باستى باسىمدىق ەكەنىن باسا ايتقان بولاتىن. بۇگىنگى تالقىلاۋلاردى ەسكەرە وتىرىپ, ءبىزدىڭ الدىمىزعا قويىلعان مىندەتتەردى ساپالى ورىنداۋ بويىنشا ناقتى شارالار قابىلداۋ قاجەت», — دەدى ا. مامين.