تۇركىستان قالاسىنداعى ق.ا.ياساۋي اتىنداعى حقتۋ-دا «Turkistan open media forum». جاڭا جانە ءداستۇرلى مەديا: ىنتىماقتاستىقتىڭ زاماناۋي مودەلدەرى» اتتى فورۋم ءوتتى.
قازاقستان جۋرناليستەر وداعى تۇركىستان وبلىستىق فيليالىنىڭ ۇيىمداستىرۋىمەن, وبلىستىق قوعامدىق دامۋ باسقارماسىنىڭ قولداۋىمەن وتكەن فورۋم ەلىمىزدىڭ باس باسىلىمى «Egemen Qazaqstan» گازەتىنىڭ 100 جىلدىق مەرەيتويىنا ارنالدى.
كەزىندە ەل گازەتىندە ەڭبەك ەتكەن ارداگەرلەرگە قۇرمەت كورسەتىلىپ, باسىلىمنىڭ بۇگىنگى جاڭاشىل قادامدارى ۇلگى ەتىلدى. تۇركىستان, جامبىل, قىزىلوردا وبلىستارىنان, الماتى, شىمكەنت قالالارىنان كەلگەن بەلگىلى جۋرناليستەر رەسپۋبليكامىزدىڭ باس گازەتىنىڭ تورقالى تويىنا قۇتتى بولسىن ايتتى.
ال فورۋم جۇمىسىن جۇرگىزىپ وتىرعان قازاقستان جۋرناليستەر وداعى تۇركىستان وبلىستىق فيليالىنىڭ توراعاسى عالىمجان ەلشىباي «ەگەمەن قازاقستان» رەسپۋبليكالىق گازەتى» اق باسقارما توراعاسى دارحان قىدىرالىنىڭ قۇتتىقتاۋ حاتىن وقىدى.
«بۇگىنگى اقپارات ايدىنى وتە شاپشاڭ دامۋدا. وسىنداي سىندارلى كەزەڭ زامانا كوشىنە ىلەسىپ قانا قويماي, كەز-كەلگەن قيىندىقتاردان جاڭاشىلدىقپەن جول تاۋىپ, تىڭ پىكىرلەرمەن زاماناۋي تىلمەن ايتقاندا كرەاتيۆتى يدەيالارعا ارقا سۇيەۋدى قاجەت ەتەدى. مۇنداي جاعدايدا مەدياكەڭىستىكتە تەر توگىپ, اقپارات سالاسىنىڭ قازانىندا قايناپ جۇرگەن قىزمەتكەرلەردىڭ باسىن قوسۋ, تاجىريبە ءبولىسۋدىڭ ماڭىزى وتە زور. تەك تۇركىستان عانا ەمەس, رەسپۋبليكانىڭ بىرنەشە وڭىرىندەگى بۇقارالىق اقپارات قۇرالدارىنىڭ, بلوگەرلەرىنىڭ باسىن قوسقان بۇگىنگى مەديافورۋمنىڭ العا قويعان ماقساتى – وسى سالادا جۇرگەن مامانداردىڭ تاجىريبەسىن ۇشتاۋ, قۇندى پىكىرلەردى العا قاراي ىلگەرىلەتۋ دەپ ەسەپتەيمىن», - دەلىنگەن باسقارما توراعاسىنىڭ قۇتتىقتاۋ حاتىندا.
القالى جيىندا قازاقستان جۋرناليستەر وداعى باسقارماسىنىڭ توراعاسى سەيىتقازى ماتاەۆ فورۋم جۇمىسىنا ساتتىلىك تىلەدى. كوپ جىلدار ەل گازەتىندە ەسەلى ەڭبەك ەتكەن بەلگىلى قالامگەر, «الاش» ادەبي سىيلىعىنىڭ يەگەرى, جازۋشى مارحابات بايعۇت «ەگەمەننىڭ» ەل تاريحىنداعى ەرەكشە ورنى مەن بۇگىنگى وزگەشە باعىتى تۋرالى اڭگىمەلەدى. جاس جۋرناليستەردى جاڭاشىلدىققا, ءوز مىندەتىن اتقارۋدا جاۋاپكەرشىلىككە ۇندەدى.
ال «Egemen Qazaqstan» گازەتىنىڭ جامبىل وبلىسى بويىنشا مەنشىكتى ءتىلشىسى حاميت ەسامان باسىلىمنىڭ بۇگىنگى باعىتىنا, جاڭا ايدارلارعا كەڭىنەن توقتالدى. سونداي-اق جيىندا تۇركىستان وبلىسى قوعامدىق دامۋ باسقارماسىنىڭ باسشىسى دامير ءجۇنىسوۆ وڭىردە اتقارىلىپ جاتقان جۇمىستار جونىندە باياندادى. «Egemen Qazaqstan» گازەتىنىڭ 100 جىلدىق مەرەيتويىنا وراي ارداگەر جۋرناليستەرگە شاپان جابىلىپ, قۇرمەت كورسەتىلدى.
فورۋمدا «زاڭ مەديا» جشس-ءى باس ديرەكتورى دوسىمبەك قونىسبەك, «وتىرار» مەدياحولدينگىنىڭ ديرەكتورى ايگەرىم جۇماعۇلوۆا, «وڭتۇستىك رابات» گازەتىنىڭ رەداكتورى جانىبەك نۇرىش, جامبىل وبلىستىق «اراي» گازەتىنىڭ باس رەداكتورى داۋلەت تولەندى «جاڭا جانە ءداستۇرلى مەديا: ىنتىماقتاستىقتىڭ زاماناۋي مودەلدەرى» تاقىرىبىندا وي تولعادى. جامبىل وبلىستىق «اق جول» گازەتىنىڭ باس رەداكتورى كوسەمالى ءساتتىباي ۇلى مەملەكەتتىك ساتىپ الۋ, گازەتكە جازىلۋ جانە باسقا دا ماسەلەلەر بويىنشا ءوز كوزقاراسىن اشىق ايتتى. سونداي-اق «فەيك جاڭالىقتار يندۋسترياسى: زاردابىمەن كۇرەسۋ جولدارى» تاقىرىبى دا قىزۋ تالقىلانىپ, ۇسىنىس-پىكىرلەر ورتاعا سالىندى.
فورۋم اياسىندا قازاقستان جۋرناليستەر وداعىنىڭ جامبىل, قىزىلوردا, تۇركىستان وبلىستىق, شىمكەنت قالالىق فيليالدارى جانە «مەدياكراتيا» قوعامدىق بىرلەستىگى اراسىندا بىرلەسكەن مەموراندۋمعا قول قويىلدى.
ەركىن دوسىمباي,
تۇركىستان وبلىسى