ەلوردا اكىمى التاي كولگىنوۆ جۇمىس كۇنى باستالعانعا دەيىن «باسپانا كوكتال» تك-گە تاعى قايتارا باردى. بۇل ءۇي ءتورت جىل بۇرىن پروبلەمالى بولىپ تانىلعان,ونداعى ۇلەسكەرلەر سانى 500-دەن اسادى. تۇرعىن ءۇي كەشەنىن «نۇرلى جەر» باعدارلاماسى اياسىندا «ەلوردا قۇرىلىس كومپانياسى» سالىپ بىتىرەتىن بولادى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
مۇندا سوڭعى كەلگەن ۋاقىتتان بەرى جوباعا تۇزەتۋلەر ەنگىزىلگەن: ۇيگە تەحنيكالىق تەكسەرۋ جۇمىستارى جۇرگىزىلىپ, ينجەنەرلىك جەلىلەرى بويىنشا جوبا مەملەكەتتىك سارپاتامادا قارالۋدا. قۇرىلىس سالۋشىنىڭ ايتۋىنشا, ليفتىلەردى ورناتۋ بويىنشا قالقا-قورشاۋلارىن بولشەكتەۋ جۇمىستارى جۇرگىزىلىپ جاتىر.
«اۋەل باستا جوبا بويىنشا 5 قاباتتى ءۇي سالۋ جوسپارلانعاندىقتان مۇندا ءليفتى قاراستىرىلماعان, ءليفتىنى ءوزىمىزدىڭ قازاقستاندىق كومپانيادان ساتىپ الامىز, سونىمەن قوسا تەرەزەلەرىن اۋىستىرامىز. ال كوكتەمدە ءۇيدىڭ ىشكى ارلەۋ جۇمىستارىنا كىرىسەمىز» , - دەدى قۇرىلىس سالۋشى.
قالا اكىمى التاي كولگىنوۆ قىس تۇسكەنگە دەيىن بارلىق ەسىكتەرى مەن تەرەزەلەرىن جاۋىپ, ءۇي توبەسىنىڭ جابىنىن بەكىتۋ كەرەكتىگىن ايتتى. تاپسىرۋ مەرزىمى - 2020 جىل. قالادا بارلىعى قۇرىلىسى اياقتالماعان 51 وبەكتى (76 ءۇي) بار. وسى جىلدىڭ سوڭىنا دەيىن تاپسىرىلاتىن ۇيلەردىڭ سانى 10-عا جەتەدى.