قۇرلىقتىق حوككەي ليگاسىنداعى (قحل) كەزەكتى تۋر ويىنىن نۇر-سۇلتاندا وتكىزگەن جەرگىلىكتى «بارىس» ۆلاديۆوستوكتىڭ «ادميرالىنا» وۆەرتايمدا ەسە جىبەردى.
بۇل كەزدەسۋگە قوس كوماندا دا كوتەرىڭكى كوڭىل-كۇيمەن كەلدى. ويتكەنى, وسىعان دەيىن «بارىس» پەن «ادميرالدىڭ» ەكەۋى دە قاتارىنان ءتورت باسەكەدە باسىمدىق تانىتىپ, جارىس كەستەسىندەگى جاعدايلارىن ەداۋىر جاقسارتتى.
نۇر-سۇلتانداعى ماتچ تا اسا شيەلەنىستى ءوتتى. قوس تاراپ بارىن سالىپ ايقاستى. اسىرەسە, ايدىن يەلەرىنىڭ قارقىنى كۇشتى بولدى. بيىلعى ماۋسىمدا ايتۋلى كوماندالار ءوزارا ەكى مارتە كەزدەسىپ, ەكى رەتىندە دە قيىر شىعىستان كەلگەن حوككەيشىلەر جەڭىسكە جەتكەن ەدى. بۇل جولى ءبىزدىڭ جىگىتتتەر ەسە قايتارۋعا بار كۇشىن سالدى. «بارىستىڭ» ويىنشىلارى قارسىلاستارىنا قاراعاندا ءجيى شابۋىلداپ, سوققىنى دا ءجيى باعىتتادى. بىراق ولاردىڭ ەشبىرى ناتيجەلى بولمادى. وسىلايشا, 60 مينۋت ارالىعىندا ەسەپ اشىلماعاننان كەيىن ويىن وۆەرتايمعا ۇلاستى. ال قوسىمشا ۋاقىتتىڭ ەكىنشى مينۋتىندا ماركۋس يۋنگتىڭ سوققان شايباسىنىڭ ارقاسىندا «ادميرال» جەڭىسكە جەتتى.
قازىرگى كەزدە «بارىس» چەرنىشەۆ ديۆيزيونىندا كوش باستاپ, شىعىس كونفەرەنتسياسىندا ەكىنشى ورىندا كەلەدى. تۇراقتى بىرىنشىلىكتىڭ جارىس كەستەسىندە بەسىنشى ساتىعا جايعاستىق. وسى كۇنگە دەيىن 16 كەزدەسۋ وتكىزگەن جەرلەستەرىمىزدىڭ قورجىنىندا ازىرگە 23 ۇپاي بار.