قازاقستان رەسپۋبليكاسىنىڭ قورعانىس ءمينيسترى قاپشاعاي گارنيزونىندا دەسانتتىق-شابۋىلداۋ اسكەرلەرىنىڭ اسكەري بولىمدەرىن جانە رادياتسيالىق, حيميالىق جانە بيولوگيالىق قورعانىس ءبولىمىن دابىل بويىنشا كوتەردى.
اسكەري بولىمدەردى دابىل بويىنشا كوتەرۋدەگى باستى ماقسات – بولىمشەلەردىڭ ارناۋلى تاپسىرمالاردى ورىنداۋداعى قابىلەتتەرىن تەكسەرۋ ەدى.
تولىقتاي جاۋىنگەرلىك دايىندىققا كەلتىرىلگەننەن كەيىن بولىمشە بەلگىلەنگەن اۋداندارعا مارش جاساپ, ول جەردە قويىلعان وقۋ-جاۋىنگەرلىك تاپسىرمالاردى ورىندادى. كومانديرلەر شەرۋ جاعدايىندا ءارتۇرلى شەشىمدەر قابىلدادى.
تەكسەرىس بارىسىندا جەكە قۇرامنىڭ شتاتتىق قارۋ-جاراقتارمەن ءىس-قيمىلدار جاساۋىنا, تاجىريبەلىك وق اتۋلاردى ورىنداۋىنا, جاۋىنگەرلىك دايارلىق پاندەرى بويىنشا نورماتيۆتەردى جۇرگىزۋگە جانە پىسىقتاۋعا ەرەكشە نازار اۋدارىلدى. تەكسەرۋ ناتيجەلەرى بويىنشا قورعانىس ءمينيسترى جاۋىنگەرلىك ازىرلىكتى قاجەتتى دەڭگەيدە ۇستاۋ جونىندە ناقتى تاپسىرمالار بەردى.