ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىندە «سالاۋاتتى ءومىر ءۇشىن» اتتى كوپشىلىك ساۋىقتىرۋ شاراسى ءوتتى.
بۇل باستامانىڭ ماقساتى – ەلىمىزدىڭ تۇرعىندارى اراسىندا دەنە شىنىقتىرۋ مەن سالاۋاتتى ءومىر سالتىن ناسيحاتتاۋ. بىلتىر ەلباسى نۇرسۇلتان نازارباەۆ سپورت شاراسىن قولداۋعا بايلانىستى بەينەۇندەۋ جولداعان ەدى. اكتسيا وتاندىق تانىمال سپورتشىلاردىڭ, ەلىمىزدىڭ مادەنيەت جانە ماسس-مەديا وكىلدەرىنىڭ قاتىسۋىمەن اشىق جاتتىعۋلار وتكىزۋ ارقىلى قازاقستاندىقتاردى دەنە شىنىقتىرۋمەن جانە سپورتپەن شۇعىلدانۋعا ىنتالاندىرۋ ماقساتىنان تۋىنداعان, - دەيدى ۋنيۆەرسيتەت قىزمەتكەرى, دوتسەنت ريتا سۇلتانعاليەۆا.
كوپشىلىك شاراسىنا ۋنيۆەرسيتەت رەكتورى نۇرلان حابيبوللا ۇلى, «Nur Otan» پارتياسى بقو فيليالى توراعاسىنىڭ ءبىرىنشى ورىنباسارى مۇرات راحمەت ۇلى, «Jas Otan» وكىلدەرى مەن ۋنيۆەرسيتەت ستۋدەنتتەرى بەلسەنە قاتىستى. كۇزگى جاۋىنعا قاراماستان ءبىر ىرعاقپەن جاتتىعۋ جاساعان كوپشىلىك سالاۋاتتى ءومىر سالتىن ناسيحاتتاپ, ءتانى ساۋدىڭ جانى ساۋ ەكەندىگىن كورسەتتى.
ايتا كەتەيىك, ماحامبەت ۋنيۆەرسيتەتىندە دەنە شىنىقتىرۋعا بارلىق جاعداي جاسالعان. جاڭا وقۋ جىلىندا وقۋ ورنىنىڭ باس عيماراتى اۋماعىنان ستۋدەنتتەرگە ارنالعان اۋماعى 920 شارشى مەترلىك جاڭا سپورتتىق الاڭ پايدالانۋعا بەرىلگەن بولاتىن. بۇل ستۋدەنتتەردىڭ بوس ۋاقىتىندا سپورتپەن اينالىسۋىنا, ءتۇرلى سپورتتىق شارالار ۇيىمداستىرۋعا وتە قولايلى بولدى.