مادەنيەت جانە سپورت مينيسترلىگى ءتىل ساياساتى كوميتەتىنىڭ تاپسىرماسىمەن ش.شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعى «تەرميندەردى ىرىكتەۋدىڭ كريتەريلەرى مەن پرينتسيپتەرى» اتتى رەسپۋبليكالىق ادىستەمەلىك سەمينار وتكىزدى. بۇل تۋرالى ورتالىقتىڭ ءباسپاسوز قىزمەتى حابارلادى.
تەرميندەردى ىرىكتەۋ مەن رەسمي بەكىتۋگە قويىلاتىن نەگىزگى تالاپتاردى ايقىنداۋ سەمينارداعى باياندامالاردىڭ باستى تاقىرىبى بولدى. قر ۇعا كوررەسپوندەنت مۇشەسى, فيلولوگيا عىلىمدارىنىڭ دوكتورى ش.قۇرمانباي ۇلى ءوز بايانداماسىندا تەرميندەردى ىرىكتەۋدىڭ كريتەريلەرىن جانە پرينتسيپتەرىن بەلگىلەۋ ماسەلەسىن كوتەرىپ, ناقتى ۇسىنىستارىن جەتكىزدى.
سەميناردى مادەنيەت جانە سپورت ۆيتسە-ءمينيسترى ن.داۋەشوۆ اشتى.
شارادا تەرميندەردىڭ جازىلۋ ۇلگىسى مەن تەرمينولوگيانىڭ تىلدىك نورماتيۆتىك شارتتارى ماسەلەلەرى كوتەرىلدى. سونداي-اق تەرمينتانۋ عىلىمىنىڭ بۇگىنگى احۋالى مەن تەرمينجاسامنىڭ باستى قاعيدالارى بويىنشا كوپشىلىككە اقپارات بەرۋگە ارنالعان ەلەكتروندىق الاڭدى تانىستىردى.
ىسشاراعا پرەزيدەنت اكىمشىلىگىنىڭ جاۋاپتى قىزمەتكەرلەرى, جەتەكشى عالىمدار, قازاقستان رەسپۋبليكاسى ۇكىمەتىنىڭ جانىنداعى رەسپۋبليكالىق تەرمينولوگيا كوميسسياسىنىڭ مۇشەلەرى, قازاق ءتىلى ءالىپبيىن لاتىن گرافيكاسىنا كوشىرۋ جونىندەگى ۇلتتىق كوميسسيا جانىنداعى تەرمينولوگيالىق جۇمىس توبىنىڭ مۇشەلەرى, ورتالىق جانە جەرگىلىكتى اتقارۋشى ورگانداردىڭ جاۋاپتى قىزمەتكەرلەرى, ءتىل سالاسى بويىنشا وڭىرلىك باسقارما باسشىلارى مەن قىزمەتكەرلەرى قاتىستى.
رەسپۋبليكالىق ادىستەمەلىك سەميناردىڭ قورىتىندىسى بويىنشا تەرميندەردى ىرىكتەۋ كريتەريلەرىن بەلگىلەۋگە, پرينتسيپتەرىن ايقىنداۋعا باعىتتالعان قارار قابىلداندى.