اتىراۋدا وسىنداي تاقىرىپتا وتكەن رەسپۋبليكالىق پلەنەرگە ەلىمىزدىڭ تۇكپىر-تۇكپىرىنەن 20 سۋرەتشى جينالدى. جىلىوي اۋدانىنداعى اقمەشىت قورىمى, يمانقارا ۇڭگىرى, اقكەگەرشىن بور تاۋى, ۇشقان اتا قورىمى, قۇلشان اتا مەشىتى, جەم وزەنىنىڭ تابيعاتى بەس كۇن بويى قىلقالام شەبەرلەرىنىڭ شابىتىنا ارقاۋ بولدى.
ۇلى جىبەك جولىنىڭ بويىنداعى بۇل تاريحي-مادەني نىساندار قازىر مەملەكەت قاراۋىندا.
– ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرىلعان شارا اتىراۋ ايماعىنداعى كيەلى جەرلەردى دارىپتەۋگە, سۋرەتشىلەردىڭ ءوزارا ىنتىماقتاستىعىن نىعايتىپ, تاجىريبە الماسۋلارىنا جاعداي جاساۋعا باعىتتالعان. قىلقالام شەبەرلەرىن دە پلەنەردىڭ تاقىرىبى قىزىقتىردى, ولاردىڭ اراسىندا جىلىوي جەرىنىڭ كەڭ جازيرا دالاسىن, «كيەلى جەرلەر گەوگرافياسىنا» ەنگەن نىسانداردى سالعاندار, سونداي-اق جەم وزەنىنىڭ قازىرگى قيىن احۋالىن سۋرەت ارقىلى كورسەتكەندەر دە بولدى, – دەيدى ش.ساريەۆ اتىنداعى كوركەمسۋرەت جانە قولدانبالى-ساندىك ونەر مۋزەيىنىڭ باسشىسى تولەگەن ورىنباسار ۇلى.
پلەنەر جۇمىسىنا قاتىسۋشىلاردىڭ ءبىرى – قازاقستاننىڭ جانە قىرعىزستاننىڭ ەڭبەك سىڭىرگەن قايراتكەرى يليا جاقانوۆ. كومپوزيتور, ونەر زەرتتەۋشىسىنىڭ تاعى ءبىر قىرى – ول تاماشا سۋرەتشى. ءتىپتى جاسى 70-تەن اسقاندا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە بەينەلەۋ ونەرى جانە ديزاين ماماندىعى بويىنشا ءبىلىم الدى. ايماقتا وتەتىن سۋرەتشىلەرگە بايلانىستى شارالاردىڭ بارىنە بەلسەندى قاتىساتىن يليا جاقانوۆ: «جىبەك جولى وتكەن قاسيەتتى جەردىڭ توپىراعىن باسىپ, جەم وزەنىنىڭ جاعاسىندا شىعارماشىلىقپەن اينالىسۋ, وسى كيەلى نىسانداردى قاعاز بەتىنە ءتۇسىرۋ ەرەكشە اسەر سىيلادى», دەيدى.
سۋرەتشىلەردىڭ شىعارماشىلىق جۇمىستارىنان ارنايى كورمە ۇيىمداستىرىلدى. ال پلەنەردە سالىنعان سۋرەتتەر وبلىستىق مۋزەيدىڭ ءسانىن كەلتىرىپ تۇراتىن بولادى.
اتىراۋ