بۇگىندە ەلىمىزدە كاسىپكەرلىكپەن اينالىسۋعا ىنتالى جاستار از ەمەس. اسىرەسە, يننوۆاتسيالىق جوبالاردى ىسكە اسىرۋعا زور قىزىعۋشىلىق تانىتاتىن ورەندەردىڭ دە قاتارى ءوسىپ كەلە جاتقانىن اڭعارۋعا بولادى. كاسىپپەن اينالىسۋعا دەن قويعان جاستارعا مەملەكەت تاراپىنان دا قولداۋ بىلدىرىلەدى.
قوستانايلىق ونەرتاپقىش ستۋدەنتتەر – ءىلياس ءازىلحانوۆ پەن زارينا مىرزاتاەۆا لاتىن قارپىمەن باسىلعان انيماتسيالىق قازاق ءالىپبيىن ويلاپ تاپتى. 3D ءموبيلدى قوسىمشاعا نەگىزدەلگەن يننوۆاتسيالىق جوبا بالالاردىڭ قازاق جازباسىن تەز مەڭگەرىپ كەتۋىنە باعىتتالعان.
– جازدىڭ سوڭىندا ءبىز, ءىلياس ەكەۋمىز اقمولا وبلىسى بۋراباي جەرىندە ۇيىمداستىرىلعان جاس كاسىپكەرلەردىڭ Zeren-2019 سلەتىنە قاتىستىق. ەكەۋمىز ورماندى ارالاي ءجۇرىپ قانداي يدەيانى جۇزەگە اسىرساق ەكەن دەپ اقىلداسا كەلە, ەرەكشە ءالىپبي جاساپ شىقساق دەگەن ورتاق شەشىمگە كەلدىك, – دەيدى زارينا. – كوللەدجدە وقىپ جۇرگەنىمدە مەن 3D مودەلىن قۇراستىرۋدى ۇيرەندىم. سونىمەن قاتار سۋرەت مەكتەبىنە دە باراتىنمىن. ال ۋنيۆەرسيتەتتە جۋرناليستيكا ماماندىعى بويىنشا وقي ءجۇرىپ لاتىن قارپى تۋرالى ءبىرشاما ىزدەندىم. بۇل ۋاقىتتا ءىلياس كوللەدجدى ءبىتىرىپ, ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە باعدارلاماشى ماماندىعى بويىنشا وقىپ جاتىر ەدى. بۇل دا بولسا ءبىزدىڭ يدەيامىزدىڭ جۇزەگە اسۋىنا كوپ كومەگىن تيگىزدى.
– ءالىپبيدى ازىرلەۋ كەزىندە ءبىزدىڭ جوباعا ۇقساس ەكى جوبا تۋرالى بىلدىك, – دەيدى ءىلياس. – بىراق بىزگە ولاردىڭ ءتۇرى مەن باعاسى ۇنامادى. بارلىق ارتىقشىلىقتارى مەن كەمشىلىكتەرىن ولشەپ, ءبىز تۇتىنۋشى ءۇشىن جارقىن, قىزىقتى ءارى قولجەتىمدى بولاتىن بالاماسىن جاساپ شىقتىق. ال لاتىن ءالىپبيىن ءبىلىم بەرۋ ۇدەرىسىنە ەنگىزگەننەن كەيىن 2020 جىلدان باستاپ ءونىمنىڭ سۇرانىسى جوعارى بولماق. بۇعان دەيىن بىزدە ستارتاپ-جوبالاردا جۇمىس ىستەۋ تاجىريبەسى بولدى, ءار جولى ءبىز جەڭىمپازداردىڭ قاتارىنان كورىنىپ جۇردىك, بۇل جولى دا سولاي بولدى. الدىمەن تولىققاندى ءونىم جاساپ, ونى دۇكەن سورەلەرىنە شىعارعىمىز كەلەدى جانە بولاشاقتا تەك بىزگە عانا ەمەس, جالپى حالىققا دا پايدا اكەلەتىن جاڭا ءونىم جاساعىمىز كەلەدى.
ءيا, جاس ونەرتاپقىشتار يننوۆاتسيالىق يدەيانىڭ يگىلىگى مول ەكەنىن ايتادى. ونەرتاپقىش ستۋدەنتتەردىڭ جوباسىندا لاتىن گرافيكاسىن ۇيرەتۋدىڭ وزىق ءادىس-تاسىلدەرى قولدانىلعان. ءالىپبيدىڭ جاڭا لاتىنشا گرافيكاسىن العاش وقىپ-ۇيرەنەتىندەر بالاباقشا مەن وقۋ ورىندارى بولماق. سوندىقتان يننوۆاتسيالىق جوبانىڭ نارىقتا تيىمدىلىگى ايتپاسا دا تۇسىنىكتى. عىلىم جولىنا تۇسكەن قوس ستۋدەنت ويلاپ تاپقان جاڭالىعىن جارىققا شىعارۋدى ءجون ساناعان.
ءىلياس ءازىلحانوۆتىڭ ايتۋىنشا, ول «جاس كاسىپكەر» جوباسىنا قاتىسىپ, بيزنەس جوسپار قۇرىپ, ىسكەرلىك نەگىزدەرىن ۇيرەنگەن.
يننوۆاتسيالىق جوبانى ىسكە اسىرۋعا قاراجات كەرەك ەكەنى انىق. سول سەبەپتى ونەرتاپقىشتار گرانت ۇتىپ الۋعا ۇمىتتەنىپ وتىر. سونداي-اق جاڭا جوبالارىنىڭ جۇزەگە اساتىنىنا دا سەنەدى.