الماتىدا قولدان قۇراستىرىلعان كولىكتەردىڭ جارىسى ءوتتى

«الماتىدا ەرەكشە كولىكتەردىڭ كوماندالىق سايىستا باعىن سىناۋشىلار بايگەگە تۇسەتىن تەمىر تۇلپاردى ءوز قولدارىمەن قۇراستىرعان. جالپى سپورتتىق دودادا 60 توپ باق سىنادى. الەم بويىنشا بىرەگەي, جىلدام جارىس الماتى قالاسى اكىمدىگىنىڭ قولداۋىمەن ۇيىمداستىرىلعان» دەپ حابارلايدى الماتى قالاسى اكىمدىگىنىڭ ءباسپاسوز قىزمەتى.  

سپورتتىق دودادا جالپى 60 كوماندا باعىن سىنادى. وعان قاتىسۋعا 200 ازاماتتان ءوتىنىش كەلىپ تۇسكەن. كولىكتى قۇراستىرۋعا 2 اي ۋاقىت بەرىلگەن. قۇرىلعىنىڭ باسقىشى دا, قوزعالتقىشى دا جوق. جارىسقا اۋەسقوي كوماندالاردىڭ دا قاتىسۋىنا مۇمكىندىك بەرىلگەن. سايىسكەرلەردىڭ اراسىندا كەڭسە قىزمەتكەرلەرى, مۋزىكانت, ساۋلەتشى, ديزاينەر جانە ستۋدەنتتەر بار.

ەڭ باستى شارت - كولىك قولدان جاسالىپ, ادامداردىڭ كومەگىمەن عانا جىلدامدىق الۋى ءتيىس, ياعني كوماندا مۇشەلەرى ونى ىلديدان يتەرىپ جىبەرەدى. ارنايى كەدەرگىلەرى قويىلعان 350 مەتر قاشىقتىقتى ەڭسەرۋى كەرەك. قازىلار القاسى قولدان قۇراستىرعان كولىكتىڭ ديزاينى مەن سورە سىزىعى الدىنداعى 30 سەكۋندتىق باعدارلامانى باعالادى.

باس جۇلدەنى ZIG ZAG توبى قانجىعالادى. اتاپ وتەرلىگى, بۇل توپ 2017 جىلى دا ءبىرىنشى ورىندى يەلەنگەن بولاتىن. ولار سوچيدە وتەتىن فورمۋلا-1 جارىسىنا جولداما الدى. 5 ساعاتقا سوزىلعان كولىك بايگەسىن تاماشالۋعا 35 مىڭ كورەرمەن جينالعان.

الماتى