بۇل اقپاراتتى الماتى قالاسى اكىمدىگىنىڭ ءباسپاسوز قىزمەتى تاراتتى.
30 مىڭ وتا جاساپ, 5 مىڭ ادامنىڭ ءومىرىن اجالدان اراشالاپ قالعان نۇرتاس كاكىمجان ۇلى وسىدان جەتى جىل بۇرىن, 2012 جىلى دۇنيەدەن ءوتتى.
سان مىڭ ادامنىڭ ولىمىنە اراشا بولىپ, تالاي ناۋقاستى اياققا تۇرعىزعان اردا ازامات 53 جاسىندا بۇل ومىرمەن قوشتاسىپ كەتتى. كەۋدەنىڭ قۋىسىنا جاسىرىنعان جۇدىرىقتاي جۇرەك ءوز جۇمىسىن وسى مەزەتتە توقتاتتى. نايزاعايداي جارق ەتىپ, اسپاندا جۇلدىز اقتى. بۇل 2012 جىلدىڭ 5 تامىزى ەدى. اراعا جەتى جىل سالىپ بارىپ قولعا الىنعان ءىس-شاراعا تۋىستارى, دوستارى جانە ونى تانىپ-بىلگەن ازاماتتار قاتىستى.
ەسكەرتكىش تولەباەۆ كوشەسىندە ءوزى تۇرعان ۇيگە قويىلدى.
سالتاناتتى اشىلۋ ءراسىمىن نۇرتاس قازىباەۆتىڭ جاقىن دوسى, عالىم الماز شارمان وتكىزدى.
ء«بىزدىڭ نۇرتاس ءوز زامانىنىڭ ۇزدىك حيرۋرگتارىنىڭ ءبىرى بولعان. ونى «حالىق اكادەميگى» دەپ اتاعان. ونىڭ ءومىرى وتە قىسقا بولسا دا, نۇرتاس ارتىنان تاماشا ءىز قالدىردى. ارىپتەستەرىمىزدىڭ اراسىندا ءبىز ونى دارىندى حيرۋرگ دەپ اتايتىنبىز, ەمدەلۋشىلەر اراسىندا – «قولى التىن ادام», ال دوستاردىڭ اراسىندا – «جاقسىلىق جارشىسى», - دەيدى الماز شارمان.
مەديتسينا عىلىمىنىڭ كانديداتى, دوتسەنت, جوعارى دارەجەلى دارىگەر-حيرۋرگ نۇرتاس اقش پەن شۆەيتساريادا تاجيىربەدەن وتكەن حيرۋرگ, ءومىرىنىڭ سوڭىنا دەيىن دارىگەرلىك انتىنا ادال بولدى.
قازىباەۆتىڭ ارىپتەسى سەرگەي شيللەردىڭ ايتۋىنشا, نۇرتاس كاكىمجان ۇلى تۋرالى ەستەلىكتىڭ شەگى جوق. ول مەديتسينا سالاسىنىڭ ۇزدىگى ەدى.
«ونىڭ باستاعان كەز كەلگەن ءىسى تەك جاقسىلىقپەن اياقتالاتىن» دەيدى ول.
نۇرتاس كاكىمجان ۇلىنىڭ جاقىن دوسى ۆەنەرا نىعماتۋللينا نۇرتاستىڭ ءومىرى وزگەگە جان جىلۋىن سىيلاۋمەن وتكەنىن, ءتىپتى وتباسىلىق وتىرىستاردا تەلەفونىن تاستامايتىن, وشىرمەيتىنىن ەسكە ءتۇسىردى.
«ويتكەنى ۇنەمى ناۋقاستارمەن بايلانىستا بولىپ, كەڭەسىن ايتىپ وتىراتىن. كاسىبيلىگى ءبىر توبە مۇنداي دارىگەرگە ءوزىمىنىڭ جانە جاقىندارىمنىڭ دەنساۋلىعىن ۇلكەن سەنىممەن تاپسىرا الاتىنمىن» دەيدى ۆەنەرا نىعماتۋللينا.
نۇرتاس كاكىمجان ۇلى كوپشىلىك «سوۆمينكا» دەپ اتاپ كەتكەن, قازىرگى ورتالىق كلينيكالىق اۋرۋحانادا 30 جىل جۇمىس ىستەگەن. يننوۆاتسيالىق ادىستەردى قولدانۋدىڭ ارقاسىندا بىرنەشە جوعارى ءپروفيلدى بولىمشەنى دە اشىپ ۇلگەرىپتى.
نۇرتاس قازىباەۆ 1958 جىلى 27 قىركۇيەكتە الماتى قالاسىندا دۇنيەگە كەلگەن. ءناسىلى قازاققا قازىباەۆ تەگى جاقسى تانىس. نۇرتاس – بەلگىلى مەملەكەت قايراتكەرى, جۋرناليست, جازۋشى كاكىمجان قازىباەۆتىڭ ۇلى. اناسى – ەلىمىزدىڭ ەڭبەك سىڭىرگەن قايراتكەرى, ۇلاعاتتى ۇستاز ورىنشا قارابالينا-قازىباەۆا.
نۇرتاستىڭ ەسىمى اتاقتى نۇرتاس وڭداسىنوۆتىڭ قۇرمەتىنە قويىلعانىن ەكىنىڭ ءبىرى بىلە بەرمەيدى. اناسى ول جايلى ەستەلىكتەرىندە بىلاي دەيدى: ورىنشا اپامىزدىڭ نۇرتاس دۇنيەگە كەلگەن كەزدى ەسكە الىپ, قاعازعا تۇسىرگەنى بار: ء«الى ەسىمدە, 1958 جىل, قىركۇيەكتىڭ 26-سى. كاكەڭ قوستانايدان ءىسساپاردان كەلدى. ول جىلى ەگىن بىتىك شىعىپ, رەسپۋبليكا ديقانشىلارى الاس ۇرىپ جاتقان كەز... تاڭعى استان كەيىن كاكەڭ قىزمەتىنە كەتتى. ول كەتىسىمەن مەندە تولعاق باستالدى. قايىن ءسىڭلىم رايا ايالداماداعى تەلەفوننان «جەدەل جاردەم» شاقىردى. نۇرتاسىمنىڭ تولعاعى دا, تۋى دا وتە جەڭىل بولدى. كۇندىزگى ساعات 12-دە پەرزەنتحانادا بالام ومىرگە كەلدى. اكەسى كەلگەندە دارىگەرلەر ءسۇيىنشى سۇراپ قۋانتىپتى. سول كۇنى مارقۇم جولداستارىمەن تەرەزە الدىنا كەلىپ, «دۇنيەگە ۇل كەلدى» دەپ ءبارى قۋانىشتارىن ىشكە جاسىرا الماي, ماقتانا ايقايلاپ ەدى... سونىمەن, پەرزەنتحانادا ون كۇن جاتىپ, ۇيگە كەلدىك. ۇيگە باۋىرجان مومىش ۇلىنىڭ بايبىشەسى كاكەڭنىڭ جاكەڭى, جامال اپاي كەلىپ, ءۇي شارۋاشىلىعىن باسقارىپ كەتتى. «قازىر باۋكەڭ كەلەدى, بارىڭە شاي قامىن جاساپ جاتىرمىن» دەپ انامداي قارسى الىپ, بالاسىنىڭ بەتىپ اشىپ كورىپ: «اللا قالاسا, ۇلكەن ازامات بولادى, باۋكەڭ كورىمدىگىن بەرەدى», - دەدى. سويتكەنشە باۋكەڭ دە كەلدى. «كورىمدىگى» دەپ 50 سوم بەردى. اپاي: «بالا مەنىكى», - دەگەندىكتەن 25 سومىن اپايعا بەردىم. قالعان 25 سوم ول كەزدە ۇلكەن اقشا ەدى, بايىپ قالدىق. كەشكە جولداستار كەلدى. ۇيىمىزگە 50 ادام سىيدى. بالامىزعا قويىلعان اتتى قالپاققا سالىپ ارالاستىرىپ, مەن تاڭدادىم. كەيىن «سوتسياليستىك قازاقستان» گازەتىنىڭ باس رەداكتورى بولعان, ومىردەن ەرتە وزعان ۇزاق باعاەۆتىڭ قاعازعا جازعان اتى «نۇرتاس» ەكەن. ءسويتىپ, ۇلىمىزدىڭ اتى نۇرتاس بولدى. ء«بىر كەزدە مينيسترلەر كەڭەسىنىڭ توراعاسى بولعان, ەل ازاماتى نۇرتاس وڭداسىنوۆتاي اتاقتى بولسىن» دەپ تىلەك تىلەندى. سول تىلەك ورىندالدى».
«التىن قولدى حيرۋرگ» اتانىپ كەتكەن دارىگەردىڭ مەموريالدى تاقتاسى جازۋشى-پۋبليتسيست, قوعام قايراتكەرى, جۋرناليست, اكەسى قازىباەۆ كاكىمجاننىڭ قاسىنا ورناتىلىپتى.
الماتى