بۇل تۋرالى قازاق ۇلتتىق حورەوگرافيا اكادەمياسىنىڭ رەكتورى التىناي اسىلمۇراتوۆانىڭ اكادەميانىڭ 2018-2019 وقۋ جىلىنىڭ قورىتىندىسى تۋرالى ەلگە ەسەپ بەرگەن كەزىندە قۋانا مالىمدەدى.
التىناي ابدۋاحيمقىزى اسىلمۇراتوۆا جۇمىس ناتيجەسى, اكادەميانىڭ ءارتۇرلى دامۋ اسپەكتىلەرى, جەتىستىكتەرى جانە شىعارماشىلىق ءبىلىم بەرۋ پروتسەسىندە تۋىنداعان ماسەلەلەر جونىندە بايانداپ بەردى, سونىمەن قاتار ەلىمىزدىڭ جەتەكشى حورەوگرافيالىق جوعارى وقۋ ورنى الدىندا بولاشاقتا تۇرعان مىندەتتەر تۋرالى اتادى.
ءۇش جىلدىق جۇمىس بارىسىندا اكادەميا شاكىرتتەرى ەلوردانىڭ ەڭ ۇزدىك ساحنالارىندا ويداعىداي ونەر كورسەتىپ ءجۇر. تەك 2018-2019 وقۋ جىلىنىڭ ىشىندە عانا ولار 30 سپەكتاكل مەن 32 كونتسەرتكە قاتىسىپ, «Tanzolymp» حالىقارالىق بي فەستيۆالى (گەرمانيا), حالىقارالىق حورەوگرافيا كونكۋرسى (يتاليا), «ريگا كوكتەمى - 2019» XV حالىقارالىق حورەوگرافيا كونكۋرسى (لاتۆيا), لاتىنامەريكاندىق بيلەر بويىنشا ADSF چەمپيوناتى (گونكونگ, قىتاي), «Baltic Grand Prix-2018» حالىقارالىق ءتۋرنيرى (لاتۆيا), ر.ۆ.زاحاروۆ اتىنداعى «ماريا» حالىقارالىق جاس حورەوگرافتار كونكۋرسى (رەسەي), حالىقارالىق بي ونەرى كونكۋرسى (قىتاي) سياقتى جانە باسقا بايقاۋلاردا 16 جوعارى جۇلدەگە يە بولدى.
ەسەپتى جىلداعى ماڭىزدى وقيعانىڭ ءبىرى مادەنيەت جانە سپورت مينيسترلىگىنىڭ قولداۋىمەن وتكەن شارا جيەنقۇلوۆا اتىنداعى V رەسپۋبليكالىق كونكۋرس بولدى (ناۋرىز, 2019 ج.). بۇل ۇلتتىق بي مەرەكەسى رەسپۋبليكاداعى 11 ۇجىم مەن 17 جەكە ورىنداۋشىلاردىڭ باسىن قوستى. كونكۋرسقا قاتىسۋشىلاردىڭ جالپى سانى 300 ادامنان استى.
ءوز بايانداماسىنىڭ سوڭىندا رەكتور ەۋروپالىق وداقتىڭ جوبالارىنا قاتىسۋ جونىندەگى اكادەميانىڭ تاعى ءبىر جەتىستىگىمەن ءبولىستى. اكادەميا العاش رەت ەۋروپالىق وداقتىڭ گرانتتار كونكۋرسىنا قاتىسىپ, ەرازمۋس+ قورى جەلىسى بويىنشا يتاليا جانە ەستونيا ەلدەرىنىڭ 2 گرانتىنا يە بولدى. گرانت نەگىزىندە اكادەميا ستۋدەنتتەرى مەن پروفەسسورلىق-وقىتۋشىلار قۇرامى ريم قالاسىنىڭ (يتاليا) ۇلتتىق بي اكادەمياسىندا جانە تارتۋ (ەستونيا) تاللين ۇلتتىق ۋنيۆەرسيتەتىندە وقىتۋدان وتەدى. باعدارلاما 3 جىلعا ارنالعان. جوبا 2019 جىلدىڭ قىركۇيەك ايىنان باستاپ ىسكە اسىرىلادى.