الماتىدا بيبىگۇل تولەگەنوۆانىڭ ح حالىقارالىق ۆوكاليستەر بايقاۋى ءوتىپ جاتىر. 14-24 قىركۇيەك ارالىعىندا وتەتىن بايقاۋ جاس تالانتتاردىڭ ەسىمىن انىقتاپ, قازاق كلاسسيكالىق ونەرىنىڭ بەدەلىن ارتتىرىپ, قازاقستان كومپوزيتورلارىنىڭ شىعارمالارىن ناسيحاتتاۋعا سەپتىگىن تيگىزەدى. بايقاۋ جاس ۇرپاقتىڭ بويىنا ىزگىلىك قاسيەتتەرىن ءسىڭىرىپ, ەستەتيكالىق تاربيە بەرۋ ماقساتىن كوزدەيدى.
جاس ورىنداۋشىلاردىڭ حالىقارالىق بايقاۋى تىڭدارماننىڭ نازارىن كلاسسيكالىق جانە حالىقتىق مۋزىكانىڭ باستاۋ-بۇلاعىنا اۋدارۋعا باعىتتالعان. قازاق مۋزىكاسىنىڭ ەڭ ۇزدىك ۇلگىلەرىنىڭ ءبىرىن ورىنداۋ بايقاۋدىڭ نەگىزگى تالاپتارىنىڭ ءبىرى بولىپ وتىر. بايقاۋعا قاتىساتىن انشىلەر قازاقستاننىڭ تۇكپىر-تۇكپىرىنەن, سونداي-اق رەسەي, قىتاي, بولگاريا, تاجىكستان, ءازىربايجان, مونعوليا سىندى الىس جانە جاقىن شەتەلدەردەن كەلدى. قازىلار القاسىنىڭ قۇرامىندا ونەر الەمىنىڭ بەلگىلى قايراتكەرلەرى پەتر شەرەمەتەۆ, ميحايل مۋنتيان, تامارا نوۆيچەنكو, دامير باسىروۆ بار. قازىلار القاسىنىڭ توراعاسى – كسرو حالىق ءارتىسى, سوتسياليستىك ەڭبەك ەرى, كسرو جانە قازاقستان مەملەكەتتىك سىيلىقتارىنىڭ لاۋرەاتى, اكادەميك بيبىگۇل تولەگەنوۆا.
ىرىكتەۋ تۋرى, بايقاۋدىڭ اشىلۋ جانە جابىلۋ سالتاناتى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا بولادى. ونەر كورسەتۋ ءتارتىبى جەرەبە بويىنشا انىقتالىپ, بايقاۋدىڭ سوڭىنا دەيىن ساقتالادى. اقتىق مارەگە تەك 14 قاتىسۋشى جىبەرىلەدى. ءاربىر قاتىسۋشىعا ونەر كورسەتكەننەن كەيىن شىعارماشىلىق ساراپتاما, كاسىبي مامانداردىڭ ۇسىنىمدارى بەرىلەدى. ونەر مەرەكەسى ايگىلى الەم ساحنالارىن باعىندىراتىن جاڭا ەسىمدەردى اشۋعا مۇمكىندىك بەرەدى. بايقاۋدى «ميراس» ۇلتتىق قوعامدىق قورى مادەنيەت جانە سپورت مينيسترلىگىمەن بىرلەسە ۇيىمداستىرىپ وتىر. سونداي-اق العاشقى بايقاۋدان بەرى الماتى قالاسىنىڭ اكىمدىگى دە قامقورلىق تانىتىپ كەلەدى.
اباي اتىنداعى وپەرا جانە بالەت تەاترىندا وتكەن ءباسپاسوز ءماسليحاتىندا بيبىگۇل تولەگەنوۆانىڭ ءوزى حالىقارالىق ءان مەرەكەسىنىڭ جاڭالىعى مەن تالاپتارى تۋرالى ەگجەي-تەگجەيلى اڭگىمەلەپ بەردى. «بايقاۋ ونىنشى رەت وتكىزىلىپ وتىرعاندىقتان, ونىڭ مەرەيتويلىق ماڭىزى بار ەكەنىن دە ەسكەرۋىمىز كەرەك. ءبىزدىڭ بۇل حالىقارالىق بايقاۋىمىز جاس تالانتتاردى تابۋدا, كلاسسيكالىق مۋزىكانى ورىنداۋشىلار مەن باعالاۋشىلاردى تاربيەلەۋدە ۇلكەن ءرول اتقارىپ, وسى ارقىلى قازاقستاننىڭ ونەر سالاسىنداعى بەدەلىن ارتتىرادى. بايقاۋدى وتكىزۋ باستاماسى بۇگىن ورتامىزدا بولماسا دا, مەنىڭ قىزىم, قازاقستاننىڭ ەڭبەك سىڭىرگەن قايراتكەرى ماريامگۇل تولەگەنوۆاعا تيەسىلى. جاس ورىنداۋشىلار ءبىزدىڭ بايقاۋىمىزدان شابىت الىپ, قاناتتارىن جايادى. جۇمىسىمىزدى قازاقستاننىڭ تۇڭعىش پرەزيدەنتى – ەلباسى ن.نازارباەۆتىڭ قولداۋىمەن باستاعانىمىزدى اتاپ وتكىم كەلەدى. سول سەبەپتى ءبىز شارانى جوعارى دارەجەدە وتكىزۋگە تىرىسامىز» دەدى, بيبىگۇل احمەتقىزى.
بيبىگۇل تولەگەنوۆانىڭ ح حالىقارالىق ۆوكاليستەر بايقاۋى قاتىسۋشىلارىن, قازىلار القاسى مۇشەلەرىن, قوناقتاردى مادەنيەت جانە سپورت ۆيتسە-ءمينيسترى نۇرعيسا داۋەشوۆ قۇتتىقتادى. ول مادەنيەت جانە سپورت ءمينيسترى اقتوتى رايىمقۇلوۆانىڭ حالىقارالىق بايقاۋدىڭ ورىنداۋشىلارىنا جولداعان حاتىن وقىپ بەردى. ءمينيستردىڭ قۇتتىقتاۋ حاتىندا: «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆ ايتقانداي, قازاق ۇلتىنىڭ اسىل قازىناسى مەن مادەني مۇراسىن دارىپتەۋگە بار سانالى عۇمىرىن ارناعان بيبىگۇل احمەتقىزى تاۋەلسىز مەملەكەتىمىزدىڭ رۋحاني اياسىنىڭ كەڭەيۋىنە ىقپال ەتكەنى ءسوزسىز. ونەرىمىزدىڭ كلاسسيكالىق الەۋەتىن دامىتىپ, ونى ناسيحاتتاۋ, جاس انشىلەردىڭ شىعارماشىلىعىن شىڭداۋ ماقساتىندا وتكىزىلىپ وتىرعان بايقاۋ تالعات مۇساباەۆ, ناتاليا Music, ازامات جىلتىركوزوۆ, سۇندەت بايعوجين سياقتى قازاقستاننىڭ دارىندى جاستارىنىڭ ونەرىن ۇشتادى. بۇل كۇندە ولار بۇكىل الەمنىڭ ساحنالارىندا قازاقستاننىڭ ۆوكالدىق ونەرىن حالىقارالىق دەڭگەيدە ناسيحاتتاپ ءجۇر» دەپ, جاس ورىنداۋشىلار ونەرىنىڭ ورىستەي بەرۋىنە تىلەكتەستىك بىلدىرگەن.
الماتى