الەۋمەتتىك جالعا بەرىلەتىن تۇرعىن ءۇي تابىسى جوق كوپ بالالى وتباسىلار ءۇشىن بەرىلەتىن بولادى. كوپ بالالى وتباسىلاردىڭ تۇرعىن ءۇي ماسەلەلەرىن شەشۋ ءۇشىن جىل سايىن 50 ملرد تەڭگەدەن بولىنەدى. بۇل جىلىنا 6 مىڭ وتباسىن الەۋمەتتىك قولداۋمەن قامتۋعا مۇمكىندىك بەرمەك. پرەزيدەنت ق.توقاەۆتىڭ جولداۋىندا كورسەتىلگەن تاپسىرمالاردى ورىنداۋ جولدارى يندۋستريا جانە ينفراقۇرىلىمدىق دامۋ مينيسترلىگىنىڭ وتىرىسىندا پىسىقتالدى.
يندۋستريا جانە ينفراقۇرىلىمدىق دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ ايتقانداي, پرەزيدەنتتىڭ تاپسىرماسىنا سايكەس الداعى 3 جىلدا قارجىلاندىرۋدى ارتتىرۋ جانە قولداۋ ارقىلى قوسىمشا 4 مىڭ وتباسىن باسپانامەن قامتۋ جوسپارلانعان. 2030 جىلعا قاراي جاڭا تۇرعىن ۇيلەردى پايدالانۋعا بەرۋ كولەمى جىل سايىن 8-10%-عا وسەدى دەپ كۇتىلۋدە. بۇدان باسقا «تۇرعىنۇي-قۇرىلىسجيناقبانكىنىڭ» «باقىتتى وتباسى» جەڭىلدەتىلگەن كرەديت بەرۋ جونىندەگى «2-10-25» باعدارلاماسى ماقساتتى اۋديتورياعا, ياعني مۇگەدەك بالالارى بار, كوپ بالالى, تولىق ەمەس وتباسىلار ساناتىنداعى الەۋمەتتىك وسال توپتاردى قامتيدى ەكەن.
– وسى بازانىڭ شەڭبەرىندە تۇگەندەۋ جۇرگىزىلەدى. كەزەكتە تۇرعانداردىڭ مارتەبەسى, ولاردىڭ تابىستارى انىقتالادى. سونداي-اق مەنشىگىندە تۇرعىن ءۇيدىڭ بولۋى قاداعالانادى جانە وزگە وڭىردە جالعا بەرىلەتىن جانە نەسيەلىك تۇرعىن ۇيگە دەگەن مۇقتاجدىعى تالدانادى. 2018 جىلى جۇرگىزىلگەن تىزىمدەۋدىڭ ناتيجەسىندە 30 مىڭ ازامات ەسەپتەن شىعارىلدى. الەۋمەتتىك جالعا بەرىلەتىن تۇرعىن ءۇي تابىسى جوق جانە ەڭ الدىمەن كوپ بالالى وتباسىلار ءۇشىن بەرىلەتىن بولادى. قازىرگى تاڭدا تۇرعىن ۇيگە مۇقتاج 38 مىڭ وتباسى بار. كوپ بالالى وتباسىلار ءۇش وڭىردە, اتاپ ايتساق تۇركىستان وبلىسىندا, الماتى مەن نۇر-سۇلتان قالالارىندا كوپ, – دەدى م.جايىمبەتوۆ.باسقا دا الەۋمەتتىك وسال ساناتتاعىلار ءۇشىن جالعا بەرىلەتىن تۇرعىن ءۇي سالۋ ءىسى جالعاسادى. نۇر-سۇلتان, الماتى جانە شىمكەنت قالالارىندا 3 مىڭ جۇمىس ىستەيتىن جاستاردى جالدامالى تۇرعىن ۇيمەن قامتاماسىز ەتۋ كوزدەلىپ وتىر. 3 جىلدا 9 مىڭ جاس وسىنداي پاتەرمەن قامتىلادى, دەدى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى.
«قازاقستان تەمىر جولى» ۇك» اق كورپوراتيۆتىك جانە HR ماسەلەلەرى باسقارماسى توراعاسىنىڭ ورىنباسارى سەرىك ابدەنوۆ جاساندى بيلەت تاپشىلىعى ماسەلەسىن شەشۋگە باعىتتالعان جۇمىستار جونىندە باياندادى. ول جولاۋشىلاردى بيلەتسىز تاسىمالداۋ, راسىمدەلمەگەن جۇكتى باقىلاۋ جانە الدىن الۋعا ارنالعان تەكسەرۋ قىزمەتىنىڭ جۇمىسى قايتا ۇيىمداستىرىلعانىن, سونداي-اق تەمىر جولداردىڭ ءىت جۇيەسى جەتىلدىرىلگەنىن جەتكىزدى.
– بيلەتتى قايتا ساتىپ الۋ ءۇشىن «موبيۋس» جۇيەسىمەن ورىنداردى «ۇستاپ» بۇعاتتاۋ فۋنكتسيالارى جانە كۇتۋ پاراعى قاراستىرىلعان. كۇتۋ پاراعىنىڭ فۋنكتسياسى بيلەت ساتۋ جۇيەسىندە ورىن بولماعان جاعدايدا ەلەكتروندى كەزەككە تۇرۋعا مۇمكىندىك بەرەدى. بوس ورىن پايدا بولعان سوڭ, ورىندى ساتىپ الۋ تۋرالى اقپارات كليەنتتىڭ جەكە كابينەتىنە جانە ونىڭ ەلەكتروندى پوشتاسىنا تۇسەدى. كليەنتتىڭ تولەمدى جۇزەگە اسىرۋعا 2 ساعاتى بولادى. كورسەتىلگەن ۋاقىت ىشىندە تولەم بولماعان جاعدايدا, ءوتىنىم اۆتوماتتى تۇردە جويىلىپ, ورىن كەلەسى كليەنتكە بەرىلەدى. بۇل جاڭالىق حالىققا بيلەتتى كاسسا مەن دەلدالدارعا جۇگىنبەي-اق الۋعا مۇمكىندىك بەرەدى. بۇگىن bilet.railways.kz سايتىنىڭ اكىمشىلىگى جول ءجۇرۋ قۇجاتتارىنىڭ رۇقسات ەتىلمەگەن 60-تان استام ەسەپتىك جازباسىن بۇعاتتادى. وسى جىلدىڭ قىركۇيەك ايىنىڭ ورتاسىنا قاراي توپتىق تاسىمالعا ءوتىنىم بەرۋ جانە راسىمدەۋ ۇدەرىسى اۆتوماتتاندىرىلادى. ويدان شىعارىلعان تەگى بويىنشا بيلەتتەردى راسىمدەۋ مۇمكىندىگىن شەكتەۋ جانە پويىزعا وزگە بىرەۋدىڭ بيلەتىمەن وتىرعىزۋدى انىقتاۋ جۇمىستارى ورىندالىپ جاتىر. وزگەرىستەردى پايدالانۋشىلار bilet.railways.kz. سايتى جاڭا نۇسقاسىندا كورە الادى. وندا پويىز جۇرەتىن تولىق باعىتتى دا, جولاۋشى جولىنىڭ ناقتى بولىگىن دە باقىلاۋعا بولادى. اتالعان فۋنكتسيا العاش رەت سايتتىڭ ءموبيلدى نۇسقاسىندا دا پايدا بولدى, – دەدى س.ابدەنوۆ.
سپيكەر قىسقا قاشىقتىققا ساپارلايتىن جولاۋشىلار ءۇشىن توسەك-ورىننان باس تارتۋعا مۇمكىندىك بەرەتىن جاڭا وپتسيا ەنگىزىلگەنىن ايتتى. بۇل جاعدايدا ونىڭ باعاسى بيلەت قۇنىنان شەگەرىلەدى.