ادەتتە رەسپۋبليكامىزدا جەڭىل ونەركاسىپ سالاسىنىڭ, سونىڭ ىشىندە تىگىن ءوندىرىسىنىڭ باۋىرىن جازا الماي جۇرگەنى جونىندە اڭگىمەلەر ايتىلىپ قالادى. مۇنى جوققا شىعارۋعا دا بولماس. دەگەنمەن ەل وڭىرلەرىندە بۇل تۇرعىدا باسەكەلەستىككە توتەپ بەرە الاتىن, ءارى شىعارعان ونىمدەرىنىڭ ءسانى مەن ساپاسى ءبىر-بىرىنە سايكەس كەلەتىن ءتاپ-ءتاۋىر تىگىن كاسىپورىندارى بار ەكەنىن دە ايتقانىمىز ءجون.
سونىڭ ءبىرى اقتوبە قالاسىنداعى «گلوبال ارنايى كيىم وندىرىستىك بىرلەستىگى» جشس دەسەك, قاتەلەسە قويماسپىز. ءتىپتى ونى تۇتاستاي ەلىمىزدەگى باتىس وڭىرىندەگى جەڭىل ونەركاسىپ سالاسىنداعى كوش باستاۋشى كاسىپورىن دەسەك تە, ارتىق ايتقاندىق ەمەس. كومپانيانىڭ باستى باعىتىن ءوندىرىس پەن تۇرمىستىق قىزمەتتىڭ بارلىق سالاسى قىزمەتكەرلەرىنە ارنالعان ارناۋلى كيىمدەر ءوندىرىسى قۇرايدى. سونىمەن بىرگە مۇندا ازاماتتارعا ارنالعان سىرتقى كيىمدەر مەن كۇرتەشەلەر جانە جىلى ورامالدار مەن توسەك-ورىن بۇيىمدارى دا شىعارىلادى. ساپالى ءونىم ءوندىرۋدىڭ باستى ءبىر تەتىگى زاماناۋي تەحنولوگيالارعا بايلانىستى دەسەك, بۇل جونىنەن دە «گلوبالدىڭ» ءباسى بيىك تۇر. وسى ارقىلى جىلىنا 250 مىڭنان استام ساپالى جانە ەكولوگيالىق تۇرعىدان تازا ارنايى جانە ازاماتتىق سيپاتتاعى كيىمدەر ساۋدا ورىندارىنا جونەلتىلەدى. سوڭعى ۇلگىدەگى جابدىقتارعا قوسا جەڭىل ونەركاسىپ جاڭاشىلدارىنىڭ ساپاسى جوعارى, ءتوزىمدى ماتالار مەن اكسەسسۋارلاردى جانە يزولياتسيالىق ونىمدەردى قولدانۋى دا تۇتىنۋشىلاردىڭ تالعامىنان شىعۋدا.
«گلوبال» كومپانيالار توبىنىڭ جەتەكشىسى نادەجدا شاباەۆانىڭ ايتۋىنشا بىرلەستىكتىڭ بارلىق ونىمدەرى «ساپا مەنەدجەمەنتى جۇيەسى» سەرتيفيكاتتارىنىڭ ستاندارتتارىنا سايكەس كەلەدى. جەڭىل ونەكاسىپ كاسىپورنى دۇكەنىنىڭ سورەسىنە كوز سالعان تۇتىنۋشىلار مۇنداعى وتاندىق ونىمدەردىڭ باعاسى قىمبات ەمەس, كەز-كەلگەن وتباسى ءۇشىن قولجەتىمدى ەكەنىن كورەر ەدى. مىسالى ەر ازاماتتارعا ارنالعان 54 ولشەمدەگى جىلى كۇرتەشەنىڭ باعاسى نەبارى 18 500 تەنگە تۇراتىنى الدىڭعى پىكىرىمىزدىڭ ايعاعى.
تاعى ءبىر سۇيسىنەرلىك ءجايت قازىرگى كۇنى بىرلەستىكتە ءوندىرىس ولشەمىن ءوسىرۋ ءۇشىن جاڭا وندىرىستىك تىگىن كەشەنى قۇرىلىسىنىڭ جۇرگىزىلىپ جاتقانى. وعان 1 ميلليارد 200 ميلليون تەنگە جەكە ينۆەستيتسيالىق قاراجات تارتىلعان. قوسىمشا كەشەن ىسكە قوسىلعان كەزدە جاڭادان 500 جۇمىس ورنى قۇرىلماق. ونىڭ قۋاتى جىلىنا 900 مىڭ تىگىن بۇيىمدارىن شىعارۋعا لايىقتالعان. سول كەزدە كاسىپورىن جىلىنا 250 ميلليون تەنگە سالىق تۇسىمدەرىن تۇسىرۋگە مۇمكىندىك الادى ەكەن.
بۇگىنگى كۇنى كاسىپورىندا 200 دەن استام ادام جۇمىسپەن قامتىلعان. ونىڭ 30 پايىزىن مۇمكىندىگى شەكتەۋلى جاندار مەن تۇرمىسى تومەن وتباسىلاردى تاربيەلەنگەن قىز-كەلىنشەكتەر قۇرايدى. بىرلەستىكتە جوعارىدا ايتىلعانداي جاڭا جۇمىس ورىندارىن قۇرۋ مەن قاتار كاسىبي ماماندىقتا الدىن-الا ازىرلەۋ باعدارلامالارى دا قاراستىرىلعان.
ايتالىق بىرلەستىك بازاسىندا وتكەن 2018 جىلدىڭ ناۋرىز ايىندا «اتامەكەن» ۇلتتىق كاسىپكەرلىك تپالاتاسىنىڭ قولداۋ كورسەتۋىمەن وقۋ-وندىرىستىك كەشەن قۇرىلعان. بۇل قادام تۇرعىنداردى ناتيجەلى جۇمىسپەن قامتۋ جانە جاپپاي كاسىپكەرلىكتى دامتىۋ جونىندەگى «ەڭبەك» مەملەكەتتىك باعدارلاماسىن جۇزەگە اسىرۋ ءۇشىن جاسالعان ەكەن. ءسويتىپ, وسى ارقىلى 7 توپتا 194 تىگىنشى-ماماندار ازىرلەنىپتى. اتالعان تۇلەكتەردىڭ 80 پايىزى «گلوبال ارنايى كيىم ءوندىرىس بىرلەستىگىنە» ورنالاستىرىلعان. ولاردىڭ قاتارىندا جۇمىسسىز جۇرگەن كوپ بالالى انالار مەن مۇمكىندىگى شەكتەۋلى جاندار دا جەتكىلىكتى. ولار كاسىپورىن جانىنداعى وقۋ-وندىرىستىك كەشەنگە اۋداندىق جانە قالالىق جۇمىسپەن قامتۋ ورتالىقتارىنىڭ جولداماسىمەن كەلگەن ەدى, -دەيدى كومپانيالار توبىنىڭ جەتەكشىسى ن.شاباەۆا.
ءسوز سوڭىندا ەلىمىزدە «گلوبال» سەكىلدى ارنايى جانە سىرتقى ازاماتتىق كيىمدەر تىگۋگە ماماندانعان كاسىپورىندار كوبەيگەن سايىن, جەڭىل ونەركاسىپتىڭ جۇگى دە سوعۇرلىم سالماقتى بولا تۇسەر ەدى دەمەكپىز
اقتوبە