ماڭعىستاۋ اۋدانىندا قازاقتىڭ قوس قىزى – جاننا امانقۇلوۆا مەن بيبىگۇل جاكۋپوۆا باس-اياعى اي جارىمدا اۋقىمدى ءىستى اتقارىپ شىقتى. اۋىل-ايماقتاعى ءاربىر ءۇيدىڭ الەۋمەتتىك احۋالىن نازاردان تىس قالدىرماعان ولار اۋدان ورتالىعى شەتپە اۋىلى ماڭىنداعى قوسبۇلاق اۋىلىنان الەۋمەتتىك جاعدايى ءماز ەمەس ءتورت وتباسىعا اسارلاتا ءۇي سالۋدى قولعا العان بولاتىن. «قىس شاناڭدى جاز سايلا» دەگەندەي, شىلدە ايىندا ء«ار قازاق – مەنىڭ جالعىزىم» ۇرانىمەن باستالعان قايىرىمدىلىق اكتسياسى ءبىر مەزەتتە ءتورت بىردەي وتباسىنىڭ باسپانالى بولۋىنا سەپ بولدى.
اۋىلدىق جەرلەردەگى ءومىر ساپاسىن جاقسارتۋ ماقساتىندا قايىرىمدىلىق شاراسىن قولعا العان «ايتىمان» قوعامدىق قورىنىڭ ديرەكتورى ج.الىمبايقىزىنىڭ ايتۋىنشا, ءتورت وتباسىن باسپانالى ەتكەن اسارعا اۋىل ازاماتتارى, جاستار, كورشىلەر مەن مەكتەپ وقۋشىلارى دا اتسالىسقان. ءبىرى باسپانانىڭ ىرگەتاسىن قۇيسا, ەكىنشىسى قابىرعاسىن قالاپتى.
– ەندى ءبىرى شاتىرىن جاۋىپ, سىلاعىن جۇرگىزگەنىنىڭ ناتيجەسىندە بۇل باسپانا نەبارى 45 كۇندە سالىنىپ ءبىتتى. جازدىڭ اپتاپ ىستىعىنا قاراماستان قۇرىلىسى قارقىندى جۇرگەن ءۇيدىڭ كىلتىن العان پاتەر يەلەرىنىڭ قۋانىشى ءبارىن مەرەيلەندىردى. وسى ساۋاپتى ءىس ارقىلى اۋىل ازاماتتارىنا ەرەكشە ريزاشىلىعىمدى بىلدىرەمىن, قۇرىلىسقا اتسالىسقان اۋىل ازاماتتارى ءوزارا ۇيىمشىل ەكەندىكتەرىن تاعى ءبىر دالەلدەدى, – دەيدى ول.
پاتەر كىلتى تابىستالار شارادا ماڭعىستاۋ اۋدانىنىڭ اكىمى ت.كوشماعانبەتوۆ ىزگى ىسكە باستاماشى بولعان ج.امانقۇلوۆا مەن ب.جاكۋپوۆاعا اۋدان تۇرعىندارى اتىنان العىس ءبىلدىرىپ, تۇرعىن ءۇيدى سالۋعا قارجىلاي كومەك كورسەتكەن «ماڭعىستاۋمۇنايگاز» اق باس ديرەكتورى ليۋ تسزينچەنگە, «قازازوت» اق «شاعىرلى-ءشومىشتى» فيليالى جشس ديرەكتورى ا.مەڭدىباەۆقا, «تەحنولوگيالىق كولىك جانە ۇڭعىمالارعا قىزمەت كورسەتۋ باسقارماسى» جشس ديرەكتورى ج.وسكىنباي ۇلىنا, «بوزاشىترانسقۇرىلىس» جشس ديرەكتورى ە.ەسبولات ۇلىنا, قۇرىلىستى سالعان ن.دۇيسەنبيەۆكە العىس حات تابىستادى.
– باسپانالى بولۋ باقىتى بۇيىرعانىنا قۋانىشتىمىن. جاقسى ىسكە مۇرىندىق بولعان قوس قىزعا, اسارعا اتسالىسقان بارلىق ازاماتتارعا ريزامىن, – دەيدى قۋانىش يەسى جۇلدىز وڭايباەۆا.
ماڭعىستاۋ وبلىسى