پرورۆا كەن ورىندارىندا كۇكىرتتىڭ العاشقى پارتياسى جونەلتىلدى

2018 جىلعى جەلتوقساندا ىلەسپە مۇناي گازىن دايىنداۋ قوندىرعىسىن ىسكە قوسقالى بەرى بارلىعى 350 توننا كۇكىرت ءوندىرىلدى. قازىرگى تاڭدا بۇل «ەمبىمۇنايگازداعى» ەڭ ءىرى قوندىرعى. ونىڭ قۋاتى جىلىنا 150 ملن تەكشە مەتردى قۇرايدى.

اتالعان قوندىرعىدا پرورۆا كەن ورىندارى توبىندا مۇنايدى ءوندىرۋ بارىسىندا الىنعان ىلەسپە گاز كۇكىرتتى سۋتەكتەن تازالانىپ, تاۋارلىق ءونىم دايىندالادى: تاۋارلى گاز, تۇيىرشىكتەلگەن كۇكىرت, تۇراقتى گاز كوندەنساتى.

ايتا كەتەيىك, ەكولوگيا سالاسىنداعى زاڭنامانىڭ تالاپتارىنا سايكەس ءوندىرىس بارىسىندا الىنعان ىلەسپە مۇناي گازى تولىعىمەن كادەگە جاراتىلۋى ءتيىس. قوندىرعىنى ىسكە قوسۋ گازدى جاعۋدى تولىعىمەن توقتاتۋعا مۇمكىندىك بەردى. گازدى دايىنداۋ بارىسى اۆتوماتتاندىرىلعان جانە اپاتتىق جاعدايعا قارسى قورعانىستىڭ بىرنەشە دەڭگەيىمەن قامتىلعان. ونىڭ ۇستىنە, گازدى قايتا وڭدەۋ تەحنولوگياسى ەكولوگيالىق تۇرعىدان قاۋىپسىز جانە كۇكىرتتى سۋتەكتى جويۋدىڭ جوعارى تيىمدىلىگىن قامتاماسىز ەتەدى.

قوندىرعىدا 2018 جىلى بارلىعى 147 ملن تەكشە مەتر گاز قايتا وڭدەلدى. ونىڭ 98 ملن تەكشە مەترى ساتىلدى, 34 ملن تەكشە مەترى كومپانيانىڭ ىشكى قاجەتتىلىكتەرىنە جۇمسالدى. گاز كوندەنساتىن ءوندىرۋ كولەمى 4 مىڭ توننانى قۇرادى.

«ەمبىمۇنايگازدا» بۇدان باسقا شىعىس ماقات جانە س. بالعىمباەۆ كەن ورىندارىنداعى ىلەسپە مۇناي گازىن دايىندايتىن تاعى ەكى قوندىرعى جۇمىس ىستەۋدە. ولار اتىراۋ وبلىسىنىڭ يساتاي, ماقات جانە قىزىلقوعا اۋداندارىنىڭ تۇرعىندارىن تابيعي گازبەن قامتاماسىز ەتىپ وتىر.

ماڭعىستاۋ وبلىسى