حالىقارالىق ەنەرگەتيكالىق اگەنتتىكتىڭ مالىمەتى بويىنشا, قازاقستان ەكونوميكاسى الەمدەگى ەڭ كوپ ەنەرگيانى قاجەتسىنەتىن ەلدەردىڭ ءبىرى بولىپ قالۋدا. بۇگىنگى تاڭدا ءبىزدىڭ ەلىمىز 147 ەلدىڭ ىشىندە 119-ورىندا تۇر جانە ەىدۇ ەلدەرىنىڭ ورتاشا دەڭگەيىنەن 3,5 ەسە جوعارى (2010 جىلعى باعامەن مىڭ دوللارعا 0,12 توننا مۇناي بالاماسى). بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
نەگىزگى ونەركاسىپتىك كاسىپورىنداردا جۇرگىزىلگەن ەنەرگيا ءاۋديتىنىڭ ناتيجەلەرى بويىنشا ەلدەگى ەنەرگيا ۇنەمدەۋدىڭ ورتاشا الەۋەتى 10% دەڭگەيىندە انىقتالدى, ەنەرگيانى ۇنەمدەۋ بيۋدجەتتىك سەكتوردا 40%-عا جەتۋى مۇمكىن. وسى الەۋەتتى ىسكە اسىرۋ ءۇشىن يندۋستريا جانە ينفراقۇرىلىمدىق دامۋ مينيسترلىگى ەنەرگيا تيىمدىلىگى سالاسىنداعى نەگىزگى قۇجات بويىنشا جۇمىستى اياقتادى.
ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ ماسەلەلەرى بويىنشا زاڭناماعا ەنگىزىلەتىن وزگەرىستەر جوباسىنىڭ تۇجىرىمداماسى بەكىتىلگەن جانە ءتيىستى زاڭ جوباسىنىڭ نەگىزىنە الىندى. مەملەكەتتىك ەنەرگەتيكالىق ءتىزىلىمدى, ەنەرگيا ءاۋديتى جۇيەسىن جەتىلدىرۋ, ونەركاسىپتىك جابدىقتار مەن تۇرمىستىق قۇرالداردىڭ ەنەرگيا تيىمدىلىگى جونىندەگى تالاپتاردى ەنگىزۋ جانە باسقا دا شارالار سياقتى زاڭنامالىق وزگەرىستەر ەل ەكونوميكاسىنىڭ ەنەرگيا سىيىمدىلىعىن ايتارلىقتاي تومەندەتۋگە مۇمكىندىك بەرەدى.
بۇۇدب مالىمەتتەرى بويىنشا قازاقستاندا ەلەكتر ەنەرگياسىنىڭ نەگىزگى تۇتىنۋشىسى ەلەكتر قوزعالتقىشتار مەن ترانسفورماتورلار, ال تۇرمىستا – توڭازىتقىشتار مەن كونديتسيونەرلەر بولىپ تابىلادى. 2015 جىلى قازاقستاندا توڭازىتقىشتار مەن سالقىنداتقىشتاردى, قوزعالتقىشتار مەن ترانسفورماتورلاردى پايدالانۋ كەزىندە ەلەكتر ەنەرگياسىن تۇتىنۋ شامامەن 40 تۆتچ قۇرادى.
ەنەرگيا ۇنەمدەۋدى ىنتالاندىرۋ بويىنشا شارالار شەڭبەرىندە 2019 جىلعى قىركۇيەكتە نۇر-سۇلتان, الماتى, قاراعاندى, پاۆلودار جانە اقتوبە قالالارىندا ديسكونتتىق باعدارلاما ىسكە قوسىلدى. ول ەسكى تۇرمىستىق تەحنيكانى ءارى قاراي كادەگە جاراتۋ ءۇشىن ارنايى قىزمەتكە تەگىن تاپسىرۋعا جانە ارنايى سەرتيفيكات الۋعا مۇمكىندىك بەرەدى. تەحنودوم جانە مەچتا دۇكەندەر جەلىسىندە جاڭا ەنەرگوتيىمدى توڭازىتقىشتى ساتىپ الاردا ارنايى جەڭىلدىكتى پايدالانا الادى.
وسىلايشا, باعدارلامانى تابىستى ىسكە اسىرۋ ەنەرگيالىق ءتيىمدى تەحنيكا مەن جابدىقتارعا جەڭىلدىكتەر تاجىريبەسىن جالعاستىرۋ ءۇشىن كورپوراتيۆتىك كاپيتالدى (Bosch, LG) تارتۋعا مۇمكىندىك بەردى. باعدارلامانىڭ ەكىنشى فازاسى اياسىندا (2019 جىلدىڭ 1 قىركۇيەگىنەن 1 قاراشاسىنا دەيىن) قازاقستاندىقتار 16 500 تەڭگە نومينالىمەن 2 500 سەرتيفيكاتتى پايدالانا الادى, سونداي-اق ءىرى ەلەكتروندىق جانە ەلەكتر جابدىقتارىن وندىرۋشىلەردەن قوسىمشا جەڭىلدىك الا الادى.