قىزمەت كورسەتۋ دەڭگەيى باعالاندى

ادەتتە مۇنداي رەيتينگتەر مەديتسي­نالىق ۇيىمداردىڭ قىزمەت كورسەتۋ ساپاسىن ۇدايى ارتتىرۋعا, سونىمەن قاتار تۇتىنۋشىلارعا قاجەت اقپا­رات­تاردى كو­بىرەك تاراتۋ ارقىلى پاتسيەنت­تەردىڭ ەمدەۋ مەكەمەلەرىن تاڭداۋىنا مۇمكىندىك بەرەدى. بىلتىر مەنەدجمەنت كورسەتكىشتەرى بويىنشا رەيتينگتە جوعارى باعا الۋ ءۇشىن ۇلتتىق اككرەديتتەۋ راسىمىنەن ءوتۋ, مەديتسينالىق اقپاراتتىق جۇيەلەردى ەنگىزۋ بويىنشا مەديتسينالىق ۇيىمداردىڭ بەلسەندى جۇمىسى, كادرلىق رەسۋرستاردى نىعايتۋ جانە دامىتۋ, كورپوراتيۆتىك باسقارۋدى دامىتۋ ءتارىزدى فاكتورلار ەسكەرىلدى. كلينيكالىق كورسەتكىشتەر بو­يىنشا رەيتينگتە جوعارى دەڭگەيگە جە­تۋگە ىقپال ەتكەن نەگىزگى فاكتورلار قا­تارىنا ستاتسيوناردى الماستىراتىن مەدي­تسينالىق كومەك كورسەتۋدىڭ ساپاسى مەن كولەمىن جەتىلدىرۋ, جوعارى تەحنولوگيالىق مەديتسينالىق قىزمەتتەردى دامىتۋ, سون­داي-اق 2017 جىلمەن سالىستىرعاندا كلي­نيكالىق كورسەتكىشتەردىڭ وڭ سەرپىنى ءتارىزدى ولشەمدەر كىردى. ناتيجەسىندە باعا­لاۋ ادىستەمەسىندە بىرقاتار يندي­كاتورلارعا قويىلاتىن تالاپ تا كۇشەيگەن. ماسەلەن, رەيتينگ جاساۋ بارىسىندا ستاتسيونارداعى ءولىم-ءجىتىم, اقپاراتتىق مەديتسينالىق جۇيەلەردىڭ بولۋى, قىز­مەتتىڭ پاتسيەنتتەر كوڭىلىنەن شىعۋ دەڭ­گەيى, قىزمەتكەرلەردىڭ ءوز جۇمىسىنا قانا­عاتتانۋ دەڭگەيى, دارىگەردىڭ 1 ورتاشا ايلىق جالاقىسى مولشەرلەمەسىنىڭ ايماق ەكونوميكاسىنداعى ورتاشا اي­لىق ەڭبەكاقىعا اراقاتىناسى ءتارىزدى كور­سەتكىشتەر نازاردان تىس قالعان جوق. سونىمەن قاتار بيىل رەيتينگكە «ورتالىق اۋداندىق اۋرۋحانالار» دەگەن جاڭا ولشەم قوسىلدى. بۇل ءوز كەزەگىندە اۋداندىق اۋرۋحانالاردىڭ قىزمەتىن باعالاۋعا مۇم­­­كىندىك بەرىپ وتىر. ساراپشىلار رەي­تينگ­تى «جۇلدىزبەن» باعالاپتى. ياعني, ەڭ ۇزدىكتەرىنە «بەس جۇلدىزدى» دەگەن باعا بەرىلەدى, سايكەسىنشە قىزمەتى ناشار مەكەمەلەرگە «جۇلدىز» بۇيىرماي قالۋى مۇمكىن.

جاڭا رەيتينگكە قاتىسقان 163 ورتالىق اۋداندىق اۋرۋحانانىڭ 8-ءى نەمەسە 5 پايىزىنا مەنەدجمەنت كورسەتكىشتەرى بويىنشا «بەس جۇلدىزدى», 13-ىنە (8%) كلينيكالىق ولشەمدەر بويىنشا وسىنداي مارتەبە بەرىلگەن. قوس سانات بويىنشا 77 اۋرۋحانا جۇمىسى ء«تورت جۇلدىزدى» دەگەن باعا الدى. بۇل – رەيتينگكە قاتىسقان بارلىق ورتالىق اۋرۋحانالاردىڭ 47 پايىزى. وزگەلەرىنە بەرىلگەن باعا تومەن بولسا كەرەك. ال مەديتسينا سالاسىنداعى عىلىمي-زەرتتەۋ ينستيتۋتتارى مەن ورتالىقتار اراسىندا مەنەدجمەنت تۇرعىسىنان دا, كلينيكالىق ينديكاتور بويىنشا دا توپ باسىندا ءىرى مەديتسينالىق ۇيىمدار تۇر. ماسەلەن, «ۇلتتىق عىلىمي كارديوحيرۋرگيا ورتالىعى» اق قوس سانات بويىنشا «بەس جۇلدىزدى» دەپ تانىلسا, «ۇلتتىق نەيروحيرۋرگيا ورتالىعى» اق مەنەدج­مەنت بويىنشا, «كارديولوگيا جانە ىشكى اۋرۋلار عىلىمي-زەرتتەۋ ينستيتۋتى» اق كلينيكالىق كورسەتكىشتەر بويىنشا وسىنداي مارتەبەگە يە بولدى. جالپى رەيتينگكە مەديتسينالىق 17 عىلىمي-زەرتتەۋ ينستيتۋتى مەن ورتالىق قاتىستى.

جاڭا رەيتينگكە وسى جو­لى 38 پەرزەنتحانا مەن پەريناتالدىق ورتا­لىق قا­تىستى. ولاردىڭ اراسىندا كلينيكالىق جانە مەنەدجمەنت كورسەت­كىشتەرى بو­يىن­شا باتىس قازاقستان وبلى­سىنىڭ «وب­لىستىق پەريناتالدىق ورتالىعى» مەن جامبىل وبلىسىنىڭ «قالالىق پە­ري­­ناتالدىق ورتالىعى» كوشباسشى بول­­دى. سونىمەن قاتار كلينيكالىق كورسەتكىشتەرى بويىنشا 3 قالالىق جانە 1 وبلىستىق مەديتسينالىق ۇيىم, مەنەدج­مەنت كورسەتكىشتەرى بويىنشا 1 وب­لىستىق جانە 4 قالالىق بوساندىرۋ مەكەمەسى كوش­باسشىلار قاتارىنا كىردى.

جالپى, رەيتينگ ناتيجەلەرىنە كوز جۇگىرتسەك, ەلدەگى كوپتەگەن مەديتسينالىق مەكەمەلەردىڭ قىزمەتىن جەتىلدىرە ءتۇسۋ قاجەت ەكەنى بايقالادى. ايتالىق, رەيتينگكە قاتىسقان 181 مەديتسينالىق-ساني­تاريالىق العاشقى كومەك مەكەمەسىنىڭ ىشىندە 17 قالالىق ەمحانا مەنەدجمەنت بويىنشا ەڭ جوعارعى كورسەتكىشكە قول جەتكىزسە, كلينيكالىق تالاپتار بويىنشا تەك 2-ەۋى عانا ۇزدىك دەپ تانىلدى. ال رەيتينگكە قاتىسقان 78 ديسپانسەردىڭ اراسىنان مەنەدجمەنت بويىنشا 5, كلينيكالىق ينديكاتور بويىنشا تەك 2 مەكەمە عانا «بەس جۇلدىزدى» دەپ تانىلعان. بالالارعا ارنالعان مەديتسينالىق ستاتسيونارلار اراسىندا مەنەدجمەنت كورسەتكىشتەرى بويىنشا ۇزدىك دەپ تانىلعان بىردە-ءبىر مەكەمە جوق. كلينيكالىق كورسەتكىشتەر بويىنشا 2 قالالىق جانە 3 وبلىستىق بالالار ستاتسيونارى جوعارى باعا الدى. رەيتينگكە 26 بالالار ستاتسيونارى قاتىسقانىن ەسكەرسەك, بۇل كورسەتكىش ماقتانا قوياتىنداي دەڭگەي ەمەس. ءارى دەنساۋلىق ساقتاۋ ۇيىمدارى اراسىندا بالالار ستاتسيونارلارىنىڭ قىزمەتىن جەتىلدىرۋ قاجەت ەكەنىن كورسەتەدى. دەگەنمەن بالالار ستاتسيونارلارىنىڭ سانى ەرەسەكتەرگە ارنالعان مەديتسينالىق مەكەمەلەردەن ون ەسەگە جۋىق از ەكەنىن ەسكەرسەك, قىزمەت ساپاسى جاعىنان كوش سوڭىندا ەرەسەكتەر ستاتسيونارلارى تۇر-اۋ دەگەن وي تۇيەسىز. ويتكەنى رەيتينگكە 224 ەرەسەكتەر ستاتسيونارى قاتىسقان. ولاردىڭ اراسىندا وسى سانات بويىنشا الماتى قالالىق «ورتالىق كلينيكالىق اۋرۋحاناسى» اق جانە «كوكشەتاۋ قالالىق كوپبەيىندى اۋرۋحاناسى» عانا «بەس جۇلدىزعا» يە بولسا, مەنەدجمەنت ساپاسى جاعىنان ۇزدىك دەپ 6, كلينيكالىق ولشەمدەر تۇرعىسىنان 18 مەديتسينالىق ۇيىم عانا تانىلدى. ياعني, «بەس جۇلدىزدى» دەگەن اتاققا لايىق ەرەسەكتەر ستاتسيونارى قوس ساناتتى بىرىكتىرگەننىڭ وزىندە بارلىق مەكەمەلەردىڭ 10 پايىزىن عانا قۇرادى.

ارينە جىل وتكەن سايىن دەنساۋلىق ساقتاۋ مەكەمەلەرىنىڭ قىزمەت كورسەتۋ ساپاسى جاقسارىپ كەلە جاتقانىن مويىنداۋ كەرەك. ءارى وعان ناقتى باعا بەرۋ ولشەمدەرى دە كۇردەلەنە ءتۇستى. سونىمەن قاتار بيىلعى رەيتينگكە قاتىسقان مەديتسينالىق مەكەمەلەر سانى دا ارتقان. 2017 جىلعى رەيتينگكە 538 مەكەمە قاتىسسا, 2018 جىلى 724 ۇيىمنىڭ قىزمەتىنە باعا بەرىلدى. باعالاۋ ناتيجەلەرىنە قاراساق مەديتسينالىق مەكەمەلەردىڭ كلينيكالىق كورسەتكىشتەرى مەنەدجمەنتتەن گورى ءتاۋىر ەكەنى بايقالادى. جاڭا رەيتينگتە 308 مەكەمە كلينيكالىق ولشەم بويىنشا 4 جانە 5 دەگەن باعا السا, مەنەدجمەنت ساپاسى جاعىنان 277 مەكەمە مۇنداي باعالاۋعا لايىق دەپ تانىلدى. بىراق 2017 جىلعى رەيتينگتە مەنەدجمەنت ساناتى بويىنشا 538 مەكەمەنىڭ 71-ءى 4 پەن 5 جۇلدىزعا يە بولعان ەدى.