ءبىلىم كۇنىنە وراي جامبىل وبلىسىندا بىرقاتار ءبىلىم وشاقتارى پايدالانۋعا بەرىلدى. جامبىل اۋدانى, بىرلەسۋ-ەڭبەك اۋىلىنداعى 140 ورىندىق ورتا مەكتەپتىڭ اشىلۋ سالتاناتىنا جامبىل وبلىسىنىڭ اكىمى اسقار مىرزاحمەتوۆ ارنايى قاتىسىپ, مەكەمە ۇجىمى مەن وقۋشىلاردى جاڭا وقۋ جىلىنىڭ باستالۋىمەن قۇتتىقتادى.
بىرلەسۋ-ەڭبەك ورتا مەكتەبى وڭىردەگى دەموگرافيالىق وسىمگە بايلانىستى ورىن تاپشىلىعىن جويۋ ماقساتىندا جاڭادان بوي كوتەرگەن ءبىلىم نىسانى. جاڭا ءبىلىم وشاعىندا بالالاردى ساپالى بىلىممەن قامتۋ ءۇشىن بارلىق جاعداي جاسالعان. مەكتەپتە 18 وقۋ قابينەتى, سپورت زالى, ءماجىلىس زالى, اسحانا, 2 كومپيۋتەرلىك سىنىپ, روبوتتەحنيكا جانە جاڭا موديفيكاتسيالىق كابينەتتەر بار. سونىمەن قاتار بيىل مەكتەپتە بارلىعى 250 وقۋشى 2 اۋىسىمدا وقيتىن بولادى. اتالعان مەكتەپتە 39 پەداگوگ قىزمەت ەتسە, ونىڭ 12,5 پايىزى جاس ماماندار.
ءبىلىم كۇنى قارساڭىندا بايزاق اۋدانىنىڭ اقشولاق اۋىلىندا دا 120 ورىندىق جاڭا مەكتەپ پايدالانۋعا بەرىلدى. سالتاناتتى جيىن «ونەر» مەكتەبى ونەرپازدارىنىڭ مىڭ بۇرالعان بيىمەن اشىلدى. اتالعان ءبىلىم وشاعىنىڭ اشىلۋ سالتاناتىنا وبلىس اكىمىنىڭ ورىنباسارى سۇلۋشاش قۇرمانبەكوۆا قاتىسىپ, بارلىق اتا-انالار مەن مۇعالىمدەردى, وقۋشىلاردى جاڭا وقۋ جىلىمەن قۇتتىقتادى. س.قۇرمانبەكوۆا ءوز سوزىندە سوڭعى بەس جىلدا وسى ءبىلىم مەكەمەسىنىڭ وقۋشىلارى ءۇش اۋىسىمدا وقىپ كەلگەنىن, بيىل بۇل ماسەلەنىڭ شەشىلگەنىن, وڭىردە ءۇش جىلدان بەرى ءبىلىم بەرۋ سالاسىنا ءبولىنىپ جاتقان قارجىنىڭ كولەمى ءۇش ەسە ارتىپ, 130 ملرد تەڭگەنى قۇراعانىن, ناتيجەسىندە وبلىس بويىنشا بەس مەكتەپ جاڭادان پايدالانۋعا بەرىلىپ وتىرعانىن جەتكىزدى. سونداي-اق مەكتەپ ۇجىمىنا وبلىس اكىمى ا.مىرزاحمەتوۆتىڭ ارنايى سىيلىعىن تابىس ەتتى. بۇدان كەيىن اۋىل اقساقالى, ەڭبەك ارداگەرى قالمان باقتىباەۆ ءسوز الىپ, ءبىلىم وشاعىنىڭ بوي كوتەرۋىنە اتسالىسقان بارشا ازاماتتارعا العىسىن ءبىلدىرىپ, مەكتەپ تابالدىرىعىن اتتاعان بالدىرعاندارعا ساتتىلىك تىلەدى. اشىلىپ وتىرعان جاڭا نىساننىڭ لەنتاسىن س.قۇرمانبەكوۆا مەن ق.باقتىباەۆ قيدى. جاڭا ءبىلىم ورداسى زاماناۋي قۇرال-جابدىقتارمەن قامتاماسىز ەتىلگەن. عيماراتتا ساپالى ءبىلىم الۋعا قولايلى زاماناۋي كابينەتتەر مەن زەرتحانالار, مۋلتيمەديالىق كابينەتتەر بار.
ءبىلىم كۇنىنىڭ قارساڭىندا مەركى اۋدانى, قازاق-ديحان اۋىلىنىڭ تۇرعىندارى دا ۇلكەن قۋانىشقا كەنەلدى. اتالعان ەلدى مەكەندە 120 ورىندىق جاڭا مەكتەپ پايدالانۋعا بەرىلدى. ەڭ باستىسى, اۋىل بالالارى باستاۋىشتان سوڭ ءوز بىلىمدەرىن جالعاستىرۋ ءۇشىن كورشى اۋىلعا قاتىنامايتىن بولدى. ەندى 120 ورىندىق مەكتەپتە 100-دەن اسا وقۋشى ءبىلىم نارىمەن سۋسىنداسا, مۇندا 27 مۇعالىم ەڭبەك ەتەدى. ءبىلىم نىسانىنىڭ اشىلۋ سالتاناتىنا وبلىس اكىمىنىڭ ورىنباسارى ەركەبۇلان داۋىلباەۆ قاتىسىپ, مەكتەپ ۇجىمى مەن وقۋشىلاردى قۇتتىقتادى. سونىمەن قاتار ول بيىل وڭىردە 15 مەكتەپتىڭ قۇرىلىسى جۇرگىزىلىپ, وعان 5 ميللياردتان استام قارجى جۇمسالىپ وتىرعانىن, ناتيجەسىندە اپاتتى مەكتەپتەر ماسەلەسى شەشىمىن تاپقانىن جەتكىزدى. 2018 جىلى قۇرىلىسى باستالعان نىساننىڭ مەردىگەرى – «انداس گرۋپپ» جاۋاپكەرشىلىگى شەكتەۋلى سەرىكتەستىگى. عيمارات بارلىق تالاپتارعا ساي جابدىقتالعان.
ءبىلىم كۇنى قارساڭىندا شۋ اۋدانىندا دا جاڭا مەكتەپ پايدالانۋعا بەرىلدى. اۋدانعا قاراستى «توعاي» شاعىن اۋدانىنان 300 ورىندىق جاڭا ءبىلىم وشاعى بوي كوتەردى. وسى ۋاقىتقا دەيىن «توعاي» شاعىن اۋدانىنىڭ تۇرعىندارىنا مەكتەپتىڭ ازدىعى قيىندىق تۋدىرىپ كەلگەن ەدى. بيىل بۇل ماسەلە دە ءوز شەشىمىن تاۋىپ وتىر. جوبالىق قۇنى 1,3 ملرد تەڭگەنى قۇراعان نىسانعا تۇرار رىسقۇلوۆ مەكتەبى كوشىرىلدى. ءبىلىم ۇياسىنىڭ اشىلۋىنا وبلىس اكىمىنىڭ ورىنباسارى نۇرجان كالەندەروۆ قاتىسىپ, مۇعالىمدەر مەن اتا-انالاردى جانە وقۋشىلاردى ءبىلىم كۇنىمەن قۇتتىقتادى. جاڭا مەكتەپتە بارلىق جاعداي جاسالعان. وقۋ كابينەتتەرى دە قاجەتتى قۇرال-جابدىقتارمەن قامتاماسىز ەتىلگەن. زەينەتكەر ۇستاز سەيىتقاسىم بەكەتاي ۇلى جاستارعا ءبىلىمدى ادام عانا تۇلعا بولىپ قالىپتاسا الاتىنىن, سوندىقتان دا بارلىق تالاپقا ساي مەكتەپتە تەك جاقسى وقۋ كەرەكتىگىن جەتكىزدى. ال مەكتەپ قۇرىلىسىن جۇرگىزگەن مەردىگەر كومپانيا وكىلى دانا اشىمبەكقىزى سيمۆوليكالىق كىلتتى مەكتەپ ديرەكتورى ايگۇل سەرىكقىزىنا تاپسىرىپ, كومپانيا اتىنان ارنايى سىيلىق تابىستادى.
سونىمەن قاتار ت.رىسقۇلوۆ اۋدانى, جالپاقساز اۋىلىنداعى 48 ورىندىق باستاۋىش مەكتەپ ەل يگىلىگىنە بەرىلدى. سالتاناتتى شاراعا اۋدان اكىمى ەربولات سادىرقۇلوۆ پەن وبلىستىق ءبىلىم باسقارماسىنىڭ باس مامانى جاننا قالىباەۆا قاتىستى. اۋىل مەكتەبى بارلىق تالاپقا ساي جاراقتاندىرىلعان.
جالپى, وڭىردە 2019-2020 وقۋ جىلىندا 5 مەكتەپ پايدالانۋعا بەرىلدى. ونىڭ 1-ەۋى ءۇش اۋىسىمدى, 1-ەۋى اپاتتى جانە 3-ەۋى ورىن تاپشىلىعى بار مەكتەپتىڭ ماسەلەسىن شەشتى. وبلىس اكىمدىگىنىڭ مالىمەتىنشە, جىل سوڭىنا دەيىن تاعى 4 نىسان پايدالانۋعا بەرىلەتىن بولادى. بيىل وبلىستىڭ ءبىلىم جۇيەسىن قارجىلاندىرۋعا 130 ملرد تەڭگە بولىنگەن. بۇل وتكەن جىلمەن سالىستىرعاندا 22,2 ملرد تەڭگەگە ارتىق. ونىڭ 5,1 ملرد تەڭگەسى ءبىلىم بەرۋ نىساندارىنىڭ قۇرىلىسى مەن كۇردەلى جوندەۋگە قارالىپ, بۇگىندە 16 ءبىلىم نىسانىنىڭ قۇرىلىسى جۇرگىزىلۋدە. سونىمەن قاتار, ايماق بويىنشا 28 مىڭ بالدىرعان مەكتەپ تابالدىرىعىن اتتاپ وتىر. جامبىلدىقتار جاڭا وقۋ جىلىن جاڭا لەپپەن باستادى. وڭىردە جىل سايىن جاڭا مەكتەپ پەن بالاباقشالار قۇرىلىسى قارقىن الىپ كەلەدى. مەملەكەت تاراپىنان جاسالىپ وتىرعان مۇنداي قولداۋ بولاشاقتا ەلىمىزدە ءبىلىمدى ازاماتتاردى قالىپتاستىرۋعا ءوزىنىڭ سەپتىگىن تيگىزەتىنى انىق.
جامبىل وبلىسى