جاڭعىرتۋ كاسىپورىندى كۇشەيتەدى

– ستانوك پاركى, زەرتحانالار, ۇيىم­داستىرۋ تەحنيكاسى تولىق جا­ڭار­تىلدى. كونسترۋكتورلىق-تەح­نو­­لوگيالىق سالاعا بىرىڭعاي جۇيە ەنگىزىلدى. بۇل جەردە بارلىق ۇدەرىستىڭ ەكى جىل بويى جۇزەگە اسىرىلعانىن اتاپ وتكەن ءجون. وسى ۋاقىت ىشىندە زاۋىت ۇزدىكسىز جۇمىس ىستەدى, – دەيدى «مەيكەر» جشس-ءنىڭ كونسترۋكتورلىق-تەحنولوگيالىق باسقارماسىنىڭ باسشىسى ۆلاديمير ۆولىنسكي.

زاۋىتتىڭ زامان تالابىنا ساي جاڭعىرتىلۋىنا مەملەكەت تاراپىنان كورسەتىلگەن قولداۋدىڭ كوپ كومەگىن تيگىزگەنىن ايتا كەتكەن ءلازىم. جوبا «3.0 جاڭعىرتۋ» ۇلتتىق باعدارلاماسىنا ەنگەن. جاڭارۋ باستالعاننان بەرگى ۋا­قىت ىشىندە زاۋىتقا 53 بىرلىك نەگىزگى قۇرال-جابدىق جانە 230 كومەكشى قۇرال-جابدىق جەتكىزىلدى. ونىڭ 35-ءى – ەۋرووداق ەلدەرى مەن وڭتۇستىك كورەيانىڭ جەتەكشى فيرمالارىنىڭ زاماناۋي مەتالل كەسەتىن ستانوكتارى.

قازىرگى تاڭدا مەحانيكالىق قۇ­راس­تىرۋ تسەحى تولىعىمەن قال­پى­نا كەلتىرىلگەن, وندا ساندىق باع­دار­لاما ارقىلى باسقارىلاتىن جا­ڭا ستانوكتاردىڭ 80%-دان استامى جۇمىس ىستەيدى. مامانداردىڭ ايتۋىن­شا, مۇ­نىڭ ءوزى ەڭبەك ونىمدىلىگىن التى ەسەگە ارتتىرعان.

راس, بۇل جاڭعىرتۋ باسىندا وڭاي­عا تۇسپەدى. شەتەلدەن قىپ-قىزىل اق­شاعا ساتىپ اكەلگەن قىمبات قۇرال-جاب­دىقتىڭ ءتىلىن بىلەتىن مامان تاپپاي, قاتتى ساسقان كاسىپورىن باسشىلارى. سويتسە, ەلىمىزدە ءبىر دە ءبىر جوعارى وقۋ ورنى نەمەسە كوللەدج ساندىق باع­دارلاما بويىنشا باسقارىلاتىن ستانوكتاردىڭ ينجەنەرلەرى مەن وپەراتورلارىن وقىتپايدى ەكەن...

– تىعىرىقتان شىعارار جول ىز­دەدىك. سويتتىك تە, قىزمەتكەرلەرىمىزدى ءوزىمىز وقىتۋعا شەشىم قابىلدادىق. بۇل ىسكە رەسەيلىك كونسالتينگتىك كوم­پانيالاردىڭ ءبىرى قولۇشىن بەرىپ, ولار باستاپقى كەزەڭدە 52 ينجەنەر مەن 70-تەن استام جۇمىسشىنى دايارلاۋعا كو­مەك­تەستى. كەيىن ليتسەنزيالىق وقۋ باعدارلامالارىن ساتىپ الىپ, پراك­تيكالىق ساباقتار وتكىزىلەتىن كا­بينەتتى جابدىقتاپ الدىق. سودان كەيىن قاراعاندى مەملەكەتتىك تەح­نيكالىق ۋنيۆەرسيتەتى جانىنان ءوزى­مىزدىڭ كافەدرامىزدى اشتىق. ەندى ءبىزدىڭ قىزمەتكەرلەر اپتاسىنا ەكى رەت ستۋدەنتتەرگە ءدارىس وقيدى. العاشقى «قارلىعاشتارىمىز» ەكى جىلدان كەيىن دايىن بولادى, ءبىز ولاردى ءوزى­مىزدىڭ كاسىپورىندا كۇتەمىز, – دەيدى ۆ.ۆولىنسكي.

جاسىراتىنى جوق, قازىرگى تاڭدا تەحنيكالىق جوعارى وقۋ ورىندارى مەن كوللەدجدەردىڭ جاڭعىرتۋ ۇدە­رىسىن باستان كەشىپ جاتقان كاسىپ­ورىن­داردىڭ قارقىنىنا ىلەسە الماي كەلە جاتقان جايى بار. ەسكى جۇيە بويىنشا وقىتىلعان مامانداردىڭ زاماناۋي تەحنولوگيالارمەن جۇمىس ىستەي باستاعان زاۋىتتاردىڭ ماڭىنان دا جۇرە المايتىنى ەكىباستان بەلگىلى. مىنە, وسىنداي ولقىلىقتاردىڭ بار­لىعىن ەسكەرە كەلە, «مەيكەر» جشس وزىنە قاجەتتى مامانداردى وسىلايشا وزدەرى وقىتىپ, دايارلاي باستاعان.

بۇگىندە زاۋىتتا 800 ادام جۇ­مىس ىستەيدى. ولار نەگىزىنەن قوسالقى بولشەكتەر مەن اسا كۇردەلى جاب­دىق­تاردى شىعارۋمەن اينالىسادى. كاسىپورىن جىل سايىن ءوندىرىس كولەمىن ۇلعايتۋعا تىرىسادى. الداعى ۋاقىتتا ونى تاعى دا 30%-عا كوتەرۋ جوسپاردا بار ەكەن. مۇنىڭ ءوزى پرەزيدەنت قاسىم-جومارت توقاەۆتىڭ «بىرگە جۇ­زەگە اسىرامىز» باعدارلاماسىندا كورسەتىلگەن مىندەتتەرمەن ۇندەسىپ جاتىر. ال ول قۇجاتتا مەملەكەت باسشىسى ەڭبەك ونىمدىلىگىن ارتتىرۋدى ىن­تالاندىرۋ, ۇزاق مەرزىمدى باسەكەگە قابى­لەتتىلىكتى قامتاماسىز ەتۋگە جا­راي­تىن سالالار مەن باعىتتاردى انىق­­تاۋ, حالىقارالىق ساپا ستاندارتتارىن ەنگىزەتىن جانە ءوز ونىمىمەن جاڭا نا­رىق­تارعا شىعاتىن كاسىپورىنداردى قول­داۋ جانە وتاندىق ونەركاسىپتەگى ساپانى ارتتىرۋ جونىندەگى نەگىزگى با­عىتتاردى ايقىنداعان بولاتىن. بۇ­دان بولەك, ەل پرەزيدەنتى جاقىندا عانا قاراعاندىدا وتكەن ەلىمىزدىڭ ين­دۋستريالىق-يننوۆاتسيالىق دامۋى جونىندەگى كەڭەستە ء«بىز ءوزىمىزدىڭ ون­دىرۋشىلەردى بارىنشا قولدايمىز», دەدى. سايىپ كەلگەندە, مۇنداي وڭ كوز­قاراس وتاندىق ءونىم شىعارىپ, ۇلت­تىق برەندتى قالىپتاستىرۋعا بار كۇشىن سالىپ كەلە جاتقان قاراعاندى زاۋى­تىنىڭ ىسكەرلىك تۇرعىداعى كوكجيەگىن كەڭەيتە تۇسەرى ءسوزسىز.

قازىر «مەيكەر» جشس تاۋ-كەن ءون­دىرۋشى كاسىپورىندار ءۇشىن عانا ەمەس, باسقا دا ونەركاسىپشىلەر ءۇشىن دە قوسالقى بولشەكتەر دايىنداپ, بەس مىڭنان استام ءونىم ءتۇرىن شىعارۋعا قول جەتكىزگەن. نەگىزگى تاپسىرىس بە­رۋشى «قازاقمىس» كورپوراتسياسى» جشس بولعانىمەن, زاۋىت باسقا قا­زاق­ستاندىق كومپانيالارمەن دە ىسكەرلىك قارىم-قاتىناس جاسايدى. بۇ­دان بولەك, سوڭعى ۋاقىتتا شەت مەم­لەكەتتەردەن دە ىنتىماقتاستىق تۋرالى ۇسىنىستار كەلىپ ءتۇسىپ جاتقان كورىنەدى. مۇنىڭ ءوزى كاسىپورىننىڭ مەنەدجمەنتتىك جۇمىستى دا دۇرىس جولعا قويا ءبىلۋىنىڭ ناتيجەسى دەپ سەنىممەن ايتۋعا بولادى.

قاراعاندى