باس شاھاردا قازاقستاندىق-امەريكالىق جاستار فورۋمى ءوتتى. جاستار ۇيىمدارىنىڭ اراسىندا بايلانىس ورناتۋ جانە تاجىريبە الماسۋ ماقساتىندا ەكى ەلدىڭ بەلسەندىلەرى ۆولونتەرلىك قوزعالىستى دامىتۋعا ۋاعدالاستى.
جاستار ۇيىمدارىنىڭ قۇرىلتايىنا قاتىسقان اقپارات جانە قوعامدىق دامۋ ۆيتسە-ءمينيسترى دانيار ەسين بيىل قازاقستاندا جاستار جىلى جاريالانعانىن, سونداي-اق ەلوردا ينتەللەكتۋالدى ەنتۋزياست جاستار شوعىرلانعان ءىرى قالا ەكەنىن ايتتى.
– ەلىمىزدىڭ استاناسىنا كەلگەندەرىڭىزگە قۋانىشتىمىز. بۇل قالانىڭ ەرەكشە ميسسياسى بار. ەلوردامىز – بەيبىتشىلىك پەن كەلىسىمنىڭ مەكەنى. قۋانتارلىعى, اسەم شاھارىمىزدا بىتىمگەرلىك ميسسيانى ۇندەيتىن اۋقىمدى شارالار ءوتىپ تۇرادى. ونىڭ ىشىندە الەمدىك جانە ءداستۇرلى ءدىني كونفەسسيا باسشىلارىنىڭ سەزىن اتاپ وتۋگە بولادى. قازاقستاندىق-امەريكالىق جاستاردىڭ بىرلەسكەن فورۋمى ءوتىپ جاتقانىنا قۋانىشتىمىن. وسى جيىن جەمىستى بولار دەگەن ءۇمىتىمىز باسىم. ءبىزدىڭ مەملەكەتىمىزدە جاستار ماسەلەسىنە ەرەكشە دەن قويىلعان. وسى باعىتتا وزىق تاجىريبەلەر زەرتتەلىپ, ەنگىزىلىپ جاتىر. بۇگىندە ەكى ەل اراسىنداعى بايلانىستى تەك مەملەكەتتىك دەڭگەيدە عانا ەمەس, سونداي-اق جاستار ارقىلى نىعايتۋعا مۇمكىندىك بار. بۇل فورۋم سپورت, عىلىم جانە مادەنيەت سىندى بىرنەشە سالالاردا بىرلەسكەن جوبالاردى ىسكە اسىرۋعا جول اشادى دەپ ويلايمىز, – دەيدى د.ەسين.
فورۋم بارىسىندا Bolashaq قاۋىمداستىعى, «ازاماتتىق باستامالاردى قولداۋ» ورتالىعى جانە Kazakhstan Trade Council ۇيىمدارى اراسىندا ءۇش-جاقتى مەموراندۋمعا قول قويىلدى. سول سەكىلدى ەرىكتىلەر قوزعالىسىن دامىتۋ ءۇشىن Jas Otan جاستار قاناتى, Indiana University Fencing Club, استانا جاستارى جانە World Can Soar حالىقارالىق ۇيىمى اراسىندا مەموراندۋم جاسالدى.